سلام

[عوادالعلي]

الاخوه الشعراء لم اكن ادرك ان من يعرفكم لايستطيع الابتعاد عنكم اليوم ازوركم كاشاعر نظم واهدي لكم هذه الابيات


وصل سلامي يابعيد المراميس=وابد بأسامه ثم ربح وآسامي
وثنه على هداج راع النواميس=قله يخصك صاحبك بالسلامي
وان شفت ابو راشد زبون المفاليس=وابن دخيل الله عضيدي حزامي
سلام من عواد ولد السناعيس=للي لهم بالقلب قدر ومقامي
لولا الملامه واختلاف التضاريس=واخاف اضيع هيبتي واحترامي
اني فلا ارضى من بعدكم جواليس=والمعذره عن ذكر كل الاسامي
نويت اكمل واشغلتني هواجيس=انا اعجلوني ربعنا للدوامي1

الدوام/ يعني مستلم لاني عسكري مهي تصريفه

المهم ارجو تقبلها وانا الان اتدرب على المحاوره وسوف اعود بشكل آخر



اخوكم/ عواد

[محمد الدهمشي]

حياك الله واستلم هالبيوت المتواضعه ولو ماجاني النوم اخليها معلقه وتستاهل اكثر


يامرحبا ترحيبتن مالها قيس=اعدادوبلن مقتفيه الغمامي
وعدادماخط القلم بالقراطيس=باهل السخى واهل العقول الفهامي
عزالله انك ياقليل الاجانيس=لك منزلن بين الرجال الحشامي
مامثل جدانك على الخيل فريس=يومنها بين اللحم والعظامي
وطلتك الليله ونس القلب تونيس=وغيبتك البارح كالعجاج الكتامي

[عبد العزيز سبيل الحربي]

ياسلام ياسلام

علاك يالشمري

صح لسانك ولاهنت كفيت ووفيت

,,,,,,,,,,,,


صح لسانك ابو راشد

ولاهنت

يالقرم

[ابن دخيل الله]

الاخوه الشعراء لم اكن ادرك ان من يعرفكم لايستطيع الابتعاد عنكم اليوم ازوركم كاشاعر نظم واهدي لكم هذه الابيات


وصل سلامي يابعيد المراميس=وابد بأسامه ثم ربح وآسامي
وثنه على هداج راع النواميس=قله يخصك صاحبك بالسلامي
وان شفت ابو راشد زبون المفاليس=وابن دخيل الله عضيدي حزامي
سلام من عواد ولد السناعيس=للي لهم بالقلب قدر ومقامي
لولا الملامه واختلاف التضاريس=واخاف اضيع هيبتي واحترامي
اني فلا ارضى من بعدكم جواليس=والمعذره عن ذكر كل الاسامي
نويت اكمل واشغلتني هواجيس=انا اعجلوني ربعنا للدوامي1

الدوام/ يعني مستلم لاني عسكري مهي تصريفه

المهم ارجو تقبلها وانا الان اتدرب على المحاوره وسوف اعود بشكل آخر



اخوكم/ عواد

استلم من رفيقك ومحبك الصقر البرازي


ياصاحبي لبسك جديد الملابيس ==ماتلبس السمله وقطع الهلامي

والله عرفتك ماتحب البرابيس == ولا تقرب الغيبه ونشر النمامي

وهذي فعايل من تعوذ من ابليس == كمّل لدينه والمراجل تمامي

وحنا نعدك من ربوعن مشاويس == اهل الفزايع محزمين الحزامي

والله نعزك مابها اليوم تهليس == كلمة صدق والله علي الحرامي

[سعد البراق]

السلام عليكم ورحمة الله وبركاته

الله يحييك يا عواد بين اخوانك


عداد ما سار القلم بالقراطيس = يا مرحبا بك يا رفيع المقامي
يا حر من نسل الحرار القرانيس = يا معشية سرحان ذيب الظلامي
شمر هل الطولات واهل النواميس = حدب السيوف الي تقص العظامي
لاثارت الهيجا وراحت مقابيس = فريس فوق الخيل سم الخصامي

[محمد الدهمشي]

صح لسانك يابن دخيل واسامه 0000


ودائماً ابوسعد ماحدقده000شيخ+شاعر+رسام+قناص

[هداج تيماء]

السلام عليكم ورحمة الله وبركاته


أولاً / صحت السنتكم جميعاً ايها الشعراء المتميزين


عواد العلي ///// ابو راشد ////// ابن دخيل الله /////// اسامه سعد


قصايدكم جزله ومن روس جزله


ثانياً /

الاخ والشاعر/ عواد العلي

غلبتنا بنبل اخلاقك وجميل شمائلك التي تتبين لي من خلال كتاباتك

النثرية والشعرية

واستلم لا هنت


يا مرحبا يابن الرجال الاشاويس= ترحيبةً تجمع جزيل الكلامي
الطيب لاهل الطيبه يابيض الفيس=ونبل الخصايل من طبوع الكرامي
حلقت يا عواد بين القرانيس=انته وربعك محتمين الجهامي
مثلك ليا جانا نشب الفوانيس= ونستقبله رسمي بشكلً نظامي
ونحمس جويد البن فوق المحاميس = والكبش الاقرن نذبحه للهمامي
شرواك يا عواد ينثر له الكيس = وياخذ على طيب الفعايل وسامي
غيرك يعدي في ظهور الجواميس= والاانت ترقى يالعلي فالسنامي
يالله يا مذري هبوب النسانيس= نطلبك يا منشي صدوق الغمامي
تحفظ لنا عواد من فتنة ابليس = ومن فتنة الدنيا وكيد اللئامي
وختامها لو في يدي عرش بلقيس= اترك لك شداد الجمل والمسامي
لك خالص التقدير يا حادي العيس=وعساك سالم يارفيع المقامي
يسرنا تواجدك في قسم المحاورة

واذا كنت في قسم الشعر فهو قريب حذفة عصا

واعتبرنا اخوان يا عواد

اخوكم / هداج تيماء

[اسامي]

عواد صح لسانك ولاهنت يابعد حيي

شرفتني بهالابيات التي اعتز بها

ويشرفني اكثر اني اجاريك بابيات متواضعه

ان شاء الله تلاقي قبول عندك

وصح لسان الاخوان ولاهانوا



يامرحبا بك عد سكّان باريس = واعداد من طاف الحرم بالحرامي
عواد يازبن الرجال المتاعيس = ياللي تجيب الوافيه بالتمامي
من روس قوم ٍ ينطحون الفواريس= وافعالهم ذكرت بشرق ٍ وشامي
نفرح ليا شفناك وسط المجاليس= وشلون مانفرح بحر ٍ قطامي
منته من اللي يكتبون الدنافيس= جزل ٍ وشعرك مثل شعر الزلامي



.

[سعد البراق]

صح السانك يا اسامي

لكن لو قلت بالشطر الثاني من البيت الاخير (جزلً وشعرك ما به اية كلامي )

لان وانا اخوك لو يجتمع شعراء هالمنتدى كله من نظم ومحاورة ما جابوا مثل شعر الزلامي

اعــــــــــــــــذروني فانا من عشاق قصيد الشاعر / رشيد الزلامي ، سواء نظم او محاورة .

[ابن دخيل الله]

اسامه سعد

ملاحظه في غير محلها

وهذا تشبيه مافيه شي

والقصد منه المبالغه


لو قال واحد لاخر انت مثل الجدي فوق

هل هو مثله ميه بالميه

لا ولا المقصود المبالغه


وثانيا هل تنكر ان احدا مايجي مثل الزلامي بل ويتعداه بمسافات

ارجو عدم الغلو



ولك التحيه ياشيخ


اخوك الحامي حامي \ ابن دخيل الله

[بعيد المراميس]

صح لسانك ياعواد صح لسانك

جزله من راس جزل


والاخوان ماقصروا ردوا ووفوا وكفوا

وانا ماقريتها الا ذلحين ولو دريت عنها بدري رديت عليك لاكن ماقصروا الاخوان اخذوا المواقف الزينه ومابقى الا الهزيل اللي مايناسب مقامك


تحياتي لك

وصحت السنة الاخوان

[عوادالعلي]

الاخ / ابو راشد صح لسانك ولاهنت

وتقبل تحياتي

[عوادالعلي]

الاخ/ كحيلان

صح بدنك يالغالي

تقبل تحياتي

[عوادالعلي]

الاخ / ابن دخيل الله / الصقر البرازي

صح لسانك يالذيب لاهنت

وشهادتي فيك مجروحه

تقبل تحياتي

[عوادالعلي]

الاخ / اسامه سعد

صح لسانك يالذيب وانا اتفق معك في رفض مقارنتي بالعملاق رشيد الزلامي

ولكن كما قال الاخ / بن دخيل الله هي تشبيه مبالغ فيه

وتقبل تحياتي

[عوادالعلي]

الاخ / هداج تيماء

صح لسانك يالنشمي وانا اشهد انك اسم على مسمى

وتقبل تحياتي

[عوادالعلي]

الاخ/ اسامي

صح لسانك واشكرك جزيل الشكر على الثناء

واعتز بكل حرف كتبته لي

وتقبل تحياتي

[عوادالعلي]

الاخ/ بعيد المراميس

صح بدنك يالغالي

ومحشوم من الهزيل ومرورك يكفي

تقبل تحياتي