انا وزوجي ومرت حماي

[حواء غرابيل]

السلام عليكم ورحمه الله وبركاته

ببدأ في الموضوع على طول ..واتمنى القى الحل المناسب

المشكله ومافيها ان من فتره بديت اشك في زوجي وفي مرت اخوه الكبير وطبعا انا من النوع العقلاني واوزن الامور وغيرتي قليلة جدا

صرت اراقب الجوال وكانت رسايل عادية جدا على الواتساب وبعدها قلت هذي وساوس الشيطان ونسيت الموضوع واتفرغت لنفسي ووظيفتي وبيتي

بعدها بفتره كنت ماخده جواله مو لقصد التفتيش كنت برسل لي اشياء منه ومن باب الفضول قرأت محادثاته مع زوجه اخوه

وكانت كلها في اوقات عمله يعني الصباح او الظهر .. اللي خلاني اشك قاعده تستشيره في اسم بنتها اللي توها مولوده اسميها هذا لو هذا

وقلت بعرف كل شئ بطريقتي .. صرت اذا رحنا بيت اهل زوجي هي تشق حلقها وهو بعد لأنهم ساكنين في بيت اهل زوجي .. مره تمدح في نفسها ومره في طبخها ومن هالسوالف

صارت تتعمد تشيل له من طباخها ..وهو كثرت روحاته لبيت اهله

وقعدت استرجع الاحداث من اول زواجي الى يومي هذا واكتشفت اني غبية وانهم استغفلوني وعلشان تكونو في الصورة بعرض عليكم كم مثال

اول حمل لي هي كانت حامل بعد ووقت اشتهيت آكل فاكهه معينة وهي اشتهت لوز وتخيلو ماكان موسم اللوز وصار كل يوم يرجع من عمله ويدور لها من كل مكان واني صارخ علي قال انا مو فاضي ادور لش ومادورتي تشتهي الا هذي الفاكهه وانا ماكنت ادري عنه يدور لوز لمرت اخوه بس عرفت بالصدفه من حمواتي خواته قالو لي نيالش بزوجش اذا زوجة اخوه يدور لها من مكان لمكان كيف انتي ؟؟ طبعا انصدمت وحطيتها في قلبي

موقف ثاني فيه مره تزاعلت الست مع زوجها وراحت بيت اهلها .. وطبعا من اللي راح يراضيها ام زوجي وزوجي

اليوم تكلمت معاه وطلعت اللي في قلبي كله لأني مقهوره تخيلو ويش كان موقفه

ظل يدافع عنها وطلعني انا الغلطانه ومريضه وتفكيري فيه شئ

قلت له كلام يبين الفرق بيني وبينها قلت له انا بنت ناس ومحترمه وجامعية وموظفه وشايفه خير مو مثلها حتى ثانوي ماعندها وقعدت اذم فيها

ويش رايكم ؟؟