زوجج مايبيج؟! دشي مني

[حواء غرابيل]

السلام عليكم ورحمة الله وبركاته..

خواتي.. أنا من متابعين المنتدى من 4 سنوات تقريبا.. كنت دايما أدور عالمواضيع اللي لها علاقة بمشكلتي عشان أشوف اذا ممكن أطبقها في حياتي.. وبعد هالمدة قررت أسجل وأشارك.. عشان اللي عندها تجربة مثلي تقدر تفيدنا..
أنا ما قاعدة أدور حل لمشكلتي، لأني الحمدلله أخيرا اقتنعت أني ضيعت من عمري وايد أدور حل.. فالحل اللي لقيته أني اغصب نفسي على التعايش مع مشكلتي لأنها ولو كانت مؤلمة فالحمدلله الواحد يشوف مصايب غيره فتهون مصيبته.. فالحمدلله على كل حال..

راح أقولكم سالفتي وبختصر كثر ما أقدر.. أنا تزوجت من 5 سنين والحمدلله الله عندي عيال الله يحفظهم لي، طبعا خذيت ريلي عن حب واهو يقربلي بالأساس.. اول ما تزوجنا كنت احس صج يحبني ويبيني لكن بعد اقل من شهرين بديت أحسه ما يبيني، طبعا أنا بعد مده فتحت معاه الموضوع، وقالي لا يتروالج، رحنا شهر العسل وبديت احس انه بالفعل مايبي يلمسني، مني مناك ومحاولات صار.. المهم كانت تمر اشهر ما يلمسني، عادي مثلا 4 أشهر.. ومرات مره كل شهر او شهرين، من حنتي راح دكاترة بس مشكلته مايبي علاج ولا يلتزم مع الدكاترة فما بين شالسالفة.. طبعا طحت عليه مرات ومرات يحاجي بنات وخرابيط وعقب النجرة يعتذر.. علاقته بالبنات ما تتعدا المسجات وهذا شي أنا متأكدة منه.. اهو كله يقولي أنا احبج ومن هالحجي.. لكن مع الوقت قلبي ما عاد مثل الأول.. وعقب 4 سنين انفجرت وقلت حق أمي بس بينتلي انه اهم شي العيال (ما قتلها انه ما يلمسني) بس عن زفه لي من الصبح لي الليل ووايد أشياء. كنت مقررة أني انفصل وارتاح..

طبعا أنا عارفة انه كل مشاكلنا تصير بسبب علاقتنا كزوجين شبه معدومة.. أنا وصلت لمرحلة اقدر أعيش من دونه لان طول الخمس سنوات وأنا كل يومين اذا مو كل يوم ابجي بليل من القهر (والله إحساس انه اللي تحبينه مايبيج ولا حتى يشوفج كأنثى جدا جدا صعب وما تفهمه إلا اللي عاشته).. فراش واحد يجمعنا اهو بعد اللي يذبح من داخل.. أنا ماراح أسوي روحي ما اهتم.. أنا ابي هالعلاقة ومن حقي لكن مليت وزهقت فقررت التعايش ووضع حد لسخافتي اللي كل ليلة تبدي بلوم النفس والبجي.. مابي أدش بتفاصيل أكثر لأني طولت ولو أتكلم لي باجر ماراح اخلص..

بس أنا ادري انه في وايد بنات جذي مثلي وفي منكم أكبر مني ويمكن تعايشت معاه. دكتورتي النفسية قالتلي اذا ماتبين تتطلقين تعايشي مع الموضوع.. اكو حريم عندي ماشاءالله 9 سنين ماكو علاقة مع أزواجهم رغم صغر سنهم.. وأنا على فكرة شاغله روحي علطول بس الليل يا بنات الليل طويل طويل طويل ويخلي الواحد يفكر بأحداث الخمس سنين بتفاصيله..

أبي البنات اللي لهم نفس مشكلتي وقرروا التعايش معاها يقولون لي شسويتوا؟

أنا مو قادرة افصل بين هالمشكلة وبين اي شي له علاقه مباشرة بريلي، فأبدي اعصب عليه.. ابي اعرف شلون أعيش معاه بدون لا أتألم كل ليلة.. أدري طبعا ذكر الله سبحانه وتعالى والاستغفار.. بس ابي تجاربكم..

وسامحوني ع الإطالة ومشكورين أنكم تحملتوا كثرة كلامي :)