قـــصـــة وقـــصـــيــــدة

[تاج الوفا]

السلام عليكم ورحمة الله وبركاته


لنفتح هنا في هذا الموضوع قصص وقصائد للشعار وطرائفهم واحزانهم وحكمهم


قصائد رثاء

قصائد غزليه

قصائد بها حكم

قصائد تحث على الشجاعه

وسابدأ انا بقصة للشعار


عبد الله بن محمد السياري

شاعرنا له اولاد اكبرهم اسمه خالد

خالد هذا كان اطيب عياله

درس وتخرج من الجامعه وكان خالد هب ريح وكان محبوب ودمث الاخلاق ويتعب الانسان وهو يقول رجل

بعد فتره من تزوج

وبعد ماتزوج بنا له بيت بينتقل بزوجته لبيته الجديد

خالد من يوم هو صغير كان عنده مشكله في الصمام بالقلب واعتقد له فتره ماتابعه او شي من كذا

وفي ذاك اليوم وهو يشتغل في بيته الجديد راح للرجال في مجلس ابوه

كان بيت ابوه عاامر بالرجال وفي ذاك اليوم بعد مارجع لغرفته قام يسولف مع زوجته شوي بعدها قال يامره نادي ابوي وامي

قالت خير ؟؟

قال ناديهم ابيه بسررعه

يوم جو عنده قالوا له خير ياولدي سلامات ؟؟

قال والله يابوي مدري احس ماني نشيط بس ان شا الله اني بخير بس بوصيكم وصاه

وقبل الوصاه بطلب منكم طلب انت يا ابوي وانتي يا امي وعمي الي حاظر وكلكم

انا اطلب منكم تسامحوني وتحللوني ووصيتي لكم

هذي زوجتي حامل

ان جاني ولد سمووه على اسم جدي محمد

وان جاني بنت سمووها على اسم امي

وطاح عليهم شوي الا يوم فاظت روحه رحمة الله عليه

قامت بعض الجرايد تنشر قصائد رثاء فيه

مرت الايام وجابت زوجته بنت وسموها ساره على اسم امه

بعد حوالي 3 سنين

كانت ساره تجي عند جدها الخميس والجمعه وكاانوا كلهم يقولون سبحاان الله نسخة من ابوها

وكان جدها يحبها حب جنوني

بنت ولده ولازم يحبها

وكانت البنت ذكيه وكان الرجال يقولون تعالي يابنتي وهذا يقول تعالي يابنتي

الي يعطيها حلاوه والي يلاعبها

وهي ماتدري ابوها من في هذولي كل واحد يقول تعالي يابنتي

عاد الجرح الي في كبد عبد الله السياري ماطاب

وكان يصد عنها ويسفح بالدمع ومايبي احد يشوفه

وفي ذاك اليوم طلع برا البيت على سيارته وطلع للبر

وكتب القصيده هذي رثااء في ولده




ويقوول






متى مالعباير ضيقت صدري المشحون
ونوت عيني الحرا تنثر عبايرها

ركبت المصفح مبعد الهقوه المامون
وتنزحت بعيونن على الصبر عاسرها

وتعليت لي رجم على الوادي المصيون
تعليت به والعين جابت ذخايرها

على فقد خالد ونتي ونة المطعون
تكض العيون الدمع والحزن حاشرها

انا اضني احيا مابقالي وانا محزون
من الصدمه الي رب الارباب خابرها

الى شفت ساره تدرج بينهم بالهون
تعثر وتنهض واقشر الحظ عاثرها

اتنادي بابا مادرت ذخرها مدفون
تعلق بمن شافت وتنخى عشايرها

تنحيت عنهم واسبلت عيني المخزون
اطمن وألد بناظري لا يناظرها

ولاخف حزني صحت ياربعنا تكفون
على الكبد حطوها تطفي سعايرها

هلا مرحبا ياكل عمري ونون النون
ضنا من خياله شايفه في نواضرها

انا اشم ريحه فيتس لو قيل لي مجنون
عيون الخلي لو نامت الليل عاذرها


والله ياجمااعه قصيده تشيب الراس

رحم الله خالد واسكنه فسيح جناته


اتمنى ان تنال على اعجابكم


تحيتي لكم

[فايز آل بذال]

وعليكم السلام

اولا الله يحييك في رحاب الغرابيل

مليون هلا ومسهلا من شرم أبحر الى حدود الوسيع

موضوعك رائع وجميل وقصه وقصيده مؤثره لاشك

لكن قسم الموروث هو اولى بها من قسم الشعر النبطي

لاهنت ولا عدمنا تواصلك



اخوك

[أبوعبدالرحمن]

الله يعطيك الف عافية

وماقصرت

[ذيب بن زيد]

قصه وقصيدة في قمت اروعة وقد سمعتهااا بشريط


واشكرك اخي تاج الوفا

على ذا القصه والقصيد

ولاهنت

[تاج الوفا]

ياهلا وغلا بالجميع

ياليت نرا من شعارنا الكرام مثل هذي القصص والقصائد


تحية عطره لكم

[al_talhi]

الله يجبر بخاطره وبخاطر ساره


مشكور تاج الوفا على القصة الشعرية

أخوك

al_talhi

[تاج الوفا]

العفوا يالغالي

سلمت لمرورك


تحيتي لك

[ليــن القســا]

قصة محزنة وقصيدة شجية
بارك الله جهودك أخي ..

[تاج الوفا]

ياهلا فيك لين

الف شكر لمرورك


تحيتي لك

[فايز ماجد]

الله يعطيك العافية

اخوي

تاج الوفا

قصيدة مؤثرة

والله يرحم خالد

ويصبر ابوه

ويحفظ بنته

[زبن بن عمير]

الله يرحم خالد وكان يسمى صديق والده فقد عرفته وقابلته

ومن يعرف ال السياري فلا يستغرب عليهم كرم ومرجلة ولطافة وادب
هم رجال نادرون
وزاد جرح عبدالله بوفاة ابنه المعاق ورثاه مرثية مؤلمة



الى شفت ساره تدرج بينهم بالهون
تعثر وتنهض واقشر الحظ عاثرها

اتنادي بابا مادرت ذخرها مدفون
تعلق بمن شافت وتنخى عشايرها



سلمت ودمت ياخوي

[تاج الوفا]

رحمة الله عليه


وصبر ابواه على مصابهم

الف شكر لمروركم


تحيتي لكم