قصة ولادة ابنتي المبكره

[حواء غرابيل]

<div>السلام عليكم حبيباتي

من زمان كنت حابه انزل قصة ولادة بنتي الله يخليها لي ويفرحني بشوفتها عروس :yaaaaaarb:

بس ماكتب الله

واليوم تشجعت وتحمست اكتبها بالتفصيل الممل وان شاءالله تستفيدون منها

وربي يسهل على كل حامل ويهون عليها ويتمم حملها على خير ويبعد عنكم الولادة المبكره
ويرزق كل محرررررروم ياحي ياقيوم

مناير وخالتي قماشه وام دليار وحدي عسل وكثثثثثثثثثثثثثثثثثثثثثثث ثثثير بس نسيتهم
الله يسمعنا الاخبار الحلوه ونفرح فيهم ياكريم عاجل غير اجل



ابدأ قصة ولادتي من احساسي الغريب وتصرفاتي اللي سبحان الله مالقيت لها تفسير
قبل الولاده بيوم

يوم الثلاثاء 20 _7 _2011 كنت حامل بالشهر الثامن بالاسبوع 31

كنت عند اهلي وجلست اصبغ حواجبي واضبطها واختي تقولي وش عندك
انت دايم تشقرين حواجبك بس مو من عادتك تصبغين بالاسود
قلت مادري ودي اجرب وابي اتعود عشان لاجاء وقت ولادتي الا حواجبي حلوه

وضبطت حواجبي وكشخت واخذت الكام وقلت صوروني ابي بنتي تشوفني وانا حامل فيها
وابيها للذكرى بعد

المهم مر اليوم وانا مرتاحه ومبسووووطه ورجعت لشقتي
وسهرت ونمت بعد صلاة الفجر
الظهر صحيت اصلي واتصل زوجي قالي لاتسوين شي بجيب غدا معي
تغدينا ودخلنا الغرفه ننسدح تقريبا الساعه 2 ونصف
وكنت من امس بالليل احس بحركه بسيطه بباخر بطني كان بنتي تنغزني بطرف اصبعها
وفرحانه فيها انا لان بنتي هااااااااديه جدا مااحس بحركات ركل لا بس دوران
واقول لزوجي تحسسني وقال الحركه غريبه قلت له عادي مافي شي غريب ويخوف
انت موسوس

المهم هالحركه تكررت من بكرى 21 _7بعد الغدا وجلسنا نسولف عادي فجأء سمعت وحسيت بشي انفجر مني
مثل البالون اذا انفقع حتى زوجي سمع الصوت
انا قمت اركض واقول بسم الله بسم الله زوجي قام مفزوع وش فيك وانا اركض ومويه دافيه تنزل
مني ولا رديت عليه اصلا ارجف ويالله شلت نفسي ووصلت للحمام وانا متمسكه بالجدران

اول مانزلت بنطلون البجامه وشفت المويه ورديه عرفت انها موية الراس
لاني كنت قريت قبل باسبوع علامات الولاده ولاقبل كنت مستحيل اقراء اي شي عن الولاده عشان مااتوتررررر
وبصوت يرجف قلت عطني ملابس وعباتي
ويعطيني ملابسي ياحياتي انواع الترقيع فتح الدولاب واخذ اي شي قدامه

المهم لبست وحطيت فوطه صحيه وطيران على المستشفى الساعه 3 وشوي العصر
الحمدالله ماكان فيه زحمه وانا مختاره مستشفى قريب مو بعيد تحسبا للطوارئ
وزوجي مسسرع وقطع كل الاشارات
وانا بس اسمي واذكر الله مرررتااااااااااااااااعه على الاخر
وادخل على الطوارئ ويدخلوني الغرفه وياخذون قياس وزني وطولي ويسألوني انت اي اسبوع قلت 31 قالوا اوووف يعني ولاده مبكره
افتحي رجولك مدام عشان نشوف
وافتحها وانا الله اعلم بحالي ماافكرت بالم ولاشي اللهم استحيييييت لاني اول مره اكشف
وقالت مفتوح رحمك 3 سم ولاده
مين دكتورتك قلت لها مين واتصلوا عليها وصرفتني :eh_s(14): حسبي الله ونعم الوكيل
قالوا اختاري موجوده د خالده ود ماجده
قلت ابي خالده لاني سامعه فيها ومادحينها
على طول طلبوا من زوجي يوقع اوراق
وخلوني افسخ اللي علي ولبسوني لبس المستشفى
وطلعوني للغرفة الولاده



اخذوني بالسرير وغطيت وجهي عشان بطلع لغرفة الولاده
مااشوف شي دمووووووووووووووع وبس والدنيا تلف فيني
مو مستوعبه اللي يصير لان حملي سليم مافيني الا العافيه
ولا طلق ولا تعب ولا اي مقدمات بس كل شي مكتوب ومقدر

وصلت غرفة الولاده
وحطولي اجهزه على بطني عشان مراقبة حالة الجنين وسوولي سونار
واتضح لهم اني بالاسبوع 32

زوجي جاني وكان وجهه اسوود مررتاع انا يوم شفته مسكت نفسي
وصرت انا اهديه
ويقولي بتصل بامك لازم احد معي انا مااعرف ومااتحمل مثل هالمواقف ابي احد عنده خبره
قلت له لا تكلمها اليوم اربعاء اكيد راحوا للمزرعه لاتخوفهم علي وطريقهم بعيد
قال يصير خير
ودخلت علي دكتوره خالده وجلست تسولف معي وطمنتني عسى ربي يطمن قلبها
بس تذكر الله وتهديني وتقول مافيك الا العافيه وشرحت لي كل شي
وقالت بنحاول نخليك تحت الملاحظه وبنعطيك مثبتات على الاقل لمدة اسبوعين
ونولدك عقبها
انت ارتاحي وتوكلي على الله ولاتضيقين صدرك ويالله انا الحمدالله تطمنت عليك
اخليك اللحين عندي ولاده تامرين على شي قلت سلامتك