الفـــــــــــاضيه ترعص هنا ..!

[الرويحـــي]

اولا :
مساكم الله بالخير
وشلونتسن عساستن طيبااااااااااات

اسمعن
يومنتسن فاضياااات وماعندتسن ماعند جدتي الله يرحمها
ابغى تدورن لي علاج للقشره
اكلتني ولعبت بحسبتي
واللي علاجها ينفع لها من عندي جايزه
لن اصرح بها
وهالحين تقدرن توكلن على الله


يالله يالله اظربن الباااب ولاتجني الا والدواء معتسن

[سمووره]

هلا الرويحي

تبي شووري احلق صلعه والقشره تروح على طوول خخخخخخ

لا امزح معك

ولا يهمك بإذن الله ادور لك على علاج يقضي على القشره بسرعه فتاكه وبإذن الله البنيات ماراح يقصرن معك

شكرالك

[إيلاف]

........نصيحتي لس ياوخيتي أنك تقومين وتأخذين حنا وتعجنيها وتخلينها شوي سايله وتلطخيها على شعرك وكرري العملية كل ما فضيتي منها تكسبين لون ومنها تروح القشرة وإذا كنتي صابغة شعرك ولا تفكرين أنك تصبغين فلا تسوينها ......راح أعطيس الطبخة الثانيه روحي لمطبخس وخذيلس خل التفاح وخففيه بشوي مويه ونقعيبه شعرك آسفه أقصد أغسلي شعرك به وتركيه عليه نص ساعه والله يوفقس...... :غمزه:

[طـيـف نـجـد]

تبين نصيحتى روحي لطيب جلديه

[الرويحـــي]

انا ولد ابوي
ابك يالبجع انا شنب عساتسن ماتربحن
وش حطي وجيبي اححححححححححح

سموره انتظر ردتس والا البجع الباقيات غسلت يدي

سلاموووووو عليكم

[الأميرة الناعمة]

هلا اخوي الغالي

انا اخوي كانت فيه قشره و راح لدكتور جلديه

و عطاه مثل الدواء سائل

يحطه على شعره كل يوم

و الحمدلله اختفت القشرة

صدقني احسن شي انك تروح لطبيب لان القشرة اسبابها كثيرة

[بـــشـــرى]

حياك الـلـه أخوي

فيه دواء للقشره أظن إسمـه سيبا ميد

بس أحسن شي روح أخصائي جلديـه

وهو يقولك العلاج

أختك .. بــشــرى

[سكر بنات]

انــــــــــــا عندي ومضمووووووووووووووووووووو وووووووون :11kia:



كـــــــــم تعطيني واعلمك سلم واستلم :004:

[الرويحـــي]

( حساسه )

انا ماحب اروح للدكاتره ابي علاج من صيدليه من بقاله من عطار
شوفي لي وش اسم العلاج هذا وعطيني اسمه وبعدين القشره وحده اذا هي انفعت له بتنفعلي

شاكر ومقدر تعاونكم معنا

[الرويحـــي]

بشرى الله يطول عمرتس

ماستفدنا كل ماجت وحده قالت رح للطبيب اجل وشهوله اسألتسن

خلي الطبيب على جنب وبعدين سيبا ميد هذا ينفع والا انتي قلتيه كذا
ماتدرين وشهو ؟؟؟
انا ابي شي مجرب

[الرويحـــي]

اخوي (qjherf;hwr;ilurui)

انت قلي وابشر بس تروح القشره !

[رماد الجرح]

الرويحي اسمع كلام اختك اللي هي انا
والله اني مجربته ومضموووووووووونومستحيل استغني عنننننه ابد ابد ابد لاني شفت نتيجته ن اول وثاني غسله
وتراه شامبو موجود بالصيدليه اسمه ( نيزورال)لعلاج قشرة الشعر والتهاب الجلد الدهني00وب27 ريال بس
وربي يريح ولاتروح لا دكتور ولا غيره ادع لي بزوج الصالح
وسلامتك اختك رمــــــاد الجرح

[lam2005]

حقيقه القشره غثيثه لكن في طريقة سهله وهي
ملعقة خل اسود تخفف بكاس ماء كبير ويشطف بها الشعر
ثم يغسل الشعر بعد خمس دقائق مع تحذير عدم وجود حساسية :11umbup: :11umbup

[مهافيصل]

أقول أخوي
عليك بالحنا
طب الرسول عليه الصلاة والسلام

[(*)~سدوومة~(*)]

هلاااااااااااابكــ اخوي

الرويحي

الله يعينكـ والله ذا القشره مبلشه العالم والله بس شف اخوي انصحكــ تحلق شعركـ ما انكــ رجل

ولا تستخدم طاقيه مكتومه خليه من الطاقيات المشخله ولا تكثر من لبسها

خلي شعركـ يطقه الهووووووووواء

وبعدين عليكـ بالخل فهو يعدل نسبة الحموضه داخل فروة الراس وتتعدل النسب

وفيه طريقه بعد اتمني تستفيد منها يارب

الطريقة الأولى ...

فنجان قهوة زيت زيتون
ونصف فنجان زيت الخروع
وعشر قطرات من عصارة الصبر

تمزج جيداً ثم تفرك بها فروة الرأس عند النوم وتغسل في الصباح الباكر وتكرر العملية كل ثلاثة أيام حتى زوال القشرة باذن الله..

الأستاذ الدكتور: جابر بن سالم القحطاني "استاذ العقاقير"
جريدة الرياض
*
*

الطريقة الثانية ...

ملعقة صغيرة من بذور السفرجل المطحونة..
توضع في كأس من الماء العادي(الغير مغلي)..

تترك لمدة 24 ساعة..
تصفي..

تدلك فروة الرأس يوميا قبل النوم..

الأستاذ الدكتور: جابر بن سالم القحطاني "استاذ العقاقير"
برنامج طب الأعشاب


تقبل شكري وتقديري

[روعــة]

مثل ماقالت اختي سدوومه

لاتلبس طاقيه

وعليك بالخل مخفف بمويه

وبالشفاء ان شاء الله

[رماد الجرح]

ها اخوي الرويحي طمنا راحت القشرة
استخدمت الششاممبو اللي قلت لك
اختك رماد الجرح