(الفشل ) أبرز صفات جاروليم + هاردلكم الخسارة

[الاهلي الراقي]

بسم الله الرحمن الرحيم ،/

السلام عليكم ورحمة الله وبركاته

كيف حالكم يا اخوان ؟

هاردلكم على الهزيمة .. ومبروك للأتفاق .. استحق الفوز وعرف من أين تؤكل الكتف بالتقفيل الدفاعي < نقطة ضعفنا

بالبداية بتكلم عن جاروليم .. نعيد ونكرر .. جاروليم ماعنده خطة او تكتيك يعتمد عليه .. فيوم فقدنا صانع اللعب الفريق صعب جدا يصنع كورة .. وهذه تعتبر عار على المدرب .. لأنه المدرب الحقيقي والناجح هو الي يصنع التكتيك الي يهاجم فيه ويدافع فيه .. وجاروليم ما يملك هذا الشي لأنه مرة نشوفه كور طويلة مرة بينيات مرات اختراقات < والتنويع افضل شي في كرة القدم .. لأأنه خصمك مايدري وش هجمتك الجاية من وين وكيف .. لكن تنويع اللعب يحتاج لاعبين احترافيين على مستوى عالي يستطيعون دمج افكارهم مع الخطط و التكتيكات المتغيرة وهذه الصفات ما يملكها الاعبين السغوديين الا قليل منهم .. فكيف جاروليم يعتمد على اساليب متنوعة وهو اصلا ما يملك الادوات !! بعدين جاروليم ماعمري سمعت او شفت انه يطبق خطط تكتيكية في التدريبات الا قليل .. كلها لياقية ومناورة اذا كان العذر ضيق الوقت .. طبق التمارين الصباحية وهنا الاحتراف الحقيقي لكن جاروليم للأسف ماطبق هذا الشي هذه نقطة .


النقطة الثانية شفنا الاهلي اذا لعب مع اي فريق .. وكنا مسيطرين .. بعدين الخصم اخذ الكورة .. نشوفه يتناقل كرات في نص ملعبنا بدون ضغط ولا اي حاجة .. وين المشكلة ؟؟


المشكلة في تشكيلة 4-4-2 .. هذه التشكيلة تحتاج فيها محاور خرافيين .. ليش ؟ لأنه اصلا وقت امتلاك الخصم للكورة راح تلاقي نقص عددي في الوسط فتحتاج جهود من المحاور جهود كبيرة .. طيب اذا ما نملك محاور ممتازين .. وش الحل ؟ اللعب بطريقة 4-5-1 وهذا الطريقة تسهل قطع الكورة من الخصم .. ولكن حتى لو لم تقطع اقلها ما تخليه يتناقل كرات في وسط ملعبك وتخليه يرجع للدفاع للتحضير ..
وتكون مضيق على الخصم في جميع الحالات ..


في الناحية الهجومية بتشكيلة 4-5-1 اذا امتلكت الكورة صعب جدا تنقطع منك .. وهذا يرجع لكثرة لاعبين الوسط وكثرة التمريرات الي راح تكون .. وتعطيك فرصة لصناعة فرص اكثر .. صحيح المهاجم راح يكون محاصر .. وهنا يجي دور المدرب بحيث يوعز للأجنحة الدخول كرأس حربة مع المهاجم بحيث الكورة كانت من اليسار يدخل الجناح اليمين وكذا .. راح تعطيك فعالية هجومية ممتازة
تشكيلة 4-5-1 تعطيك حلول كثيرة كالتسديد من خارج منطقة الـ18 او الاطراف وهذه أهم مميزاتها

بالنسبة لمشكلة صناعة اللعب .. صدقوني المدرب الحقيقي هو الي يصنع شخصية للفريق في الملعب من حيث الدفاع والهجوم .. صحيح في لاعبين ممتازين وصعب تعوضهم .. لكن الحل هنا تغيير بعض الخطط والاعتماد على مفاتيح لعب أخرى وهذه يفتقدها جاروليم

فيه بعض الجماهير يقولون جاروليم بدع في مباراة الاتحاد الثانية .. اقوله غلطان .. لأنه وقتها قابلنا فريق كبار في السن .. ومتهالك وكان المفروض هزيمتهم وانهائها من الذهاب لكن قدر الله وما شاء فعل

بالنسبة للجهاز اللياقي .. وهنا خطأ الادارة .. فريقنا الموسم الماضي من افضل الفرق من الناحية اللياقية .. ليش التغيير ؟

الجهاز الطبي .. اعتقد اذا الادارة الان ما تملك الجرأة وتغير الجهاز الطبي عليها الرحيل

بتكلم عن بعض الاعبين :

موراليس .. من الخطأ اننا نقول موراليس لاعب فاشل < ممكن نقول فشل في التجربة الاحترافية .. لكن موراليس يملك امكانيات عالية .. العب بخمس وسط وعطه الحرية كما في ذهاب مبااراة سابهان وراح نشوف ابداع


تيسير الجاسم .. الي يقول انخفض مستواه اقوله غلطان .. تيسير الجاسم لاتلزمه بصناعة اللعب وتبلشه فيها وهذا خلاه يطلع بهذا الشكل .. حط تيسير بمكانه وراح يبدع

بالمينو .. صراحة نجم نحسد عليه .. دفاعيا وهجوميا .. مباراة امس شفنا اخر الدقايق يوم يتقدم ويرجع للوسط ويقطع كورة ويتقدم واستقبل كذا كورة طويلة الي ماقدروا المهاجمين يستقبلونها طوال الـ90 دقيقة

مصطفى بصاص .. اتمنى ان لا يسقط كما حال الاهلي الان

معتز .. لو يخفف من وزنه راح يكون من افضل لاعبين الاهلي .. لأنه ممتاز في صناعة اللعب عند خطط جاروليم




وخيرا .. انا كتبت موضوع بعد فوزنا على الوحدة .. وقلت يجب التعاقد مع مدرب عالمي ( بالسر ) ونجعله يتابع الاهلي الى نهاية الموسم .. وراح تشوفون الدوري واسيا بأذن الله

على فكرة .. مدرب النصر ممتاز جدا .. والي يتابع النصر يشوف مقدار التغير الي احدثه من حيث التكتيكات الحلوة الي يعتمد عليها


خلاصة الامر .. اذا اردنا التطور .. فتشكيلة 4-5-1 واحد تشكيلة جبارة متى ماوجد التزام بالتكتيك



على فكرة مو يعني اني تكلمت عن جاروليم .. يعني انه هو لحاله الي فشل .. لا كل الاعبين لابد ان يحاسبون بأستثناء بالمينو البطل ..




كل ما كتب في الاعلى هو وجهة نظر .. اتقبل النقاش وابداء وجهات النظر بكل احترام



أطيب تحية