سؤال يا اخوان عن طريقة دمج الغنم ببعضها + الأكل

[تاجر مواشي]

اغنام - ابل - دواجن - طيور

السلام عليكم
وكل عام وانتم بخير يا اخوان

يعلم الله اني ماسجلت في هذا المنتدى الا بسبب اعضاءه الكرام وتبادل خبراتهم اللي استفدت منها

(والمعذره من المشرفين اذا كان موضوعي بالمكان الخاطئ واتمنى نقله للمكان الصحيح)


بعض الاسئله محتاج اجابات عليها وان شاء الله مالكم الا الدعاء في ظهر الغيب

السؤال الاول :

عندي غنم نعيم دفيع ومقاريب تقريبا 15 راس مطعمه التطعيمات اللازمه شريتها من راعيها وانا عارف وش يطعمها
وراح اشتري 20 راس نعيم دفيع واضيفها للغنم ابغى اعرف الطريقه الصحيحه قبل ادمجها مع الغنم
هل اعزلها قبل هل اعطيها أبر لازمه اذا ماكان راعيها معطيها هل فيه مضادات مهمه قبل ان ادمج الغنم ببعضها ؟
طيب مثلا اخذت غنم راعيها يعطيها مثلا تبن شعير وغنم راعيها يعطيها علف رودس .الخ
انا ابغى اوحّد الطعام لجميع الغنم ماهي الطريقه الصحيحه في تدريج الطعام لها وتعويدها عليه
علماً اني اتكلم بهالحسبه الصغيره لاني ان شاء الله راح اكرر هالطريقه الى ان اوصل لعدد معيّن
والطريقه اللي تنصحوني فيها ان شاء الله راح اعتمدها على كل غنم اشتريها .. وهكذا

السؤال الثاني :

اغلب الناس تقول لي ان الغنم النعيم نادر ماتلد على 2 غالبا يكون 1 والطريقه الصحيحه بعد الله ان الشاه تلد 2 هو طعامها قبل يقرّعها الفحل
يعني بعد ماتلد الشاه مثلا وبفتره جاها الفحل اكرمها بالبرسيم ولا بعد مايقرعها افكها مع الغنم اللي راح يكون طعامه تبن وشعير وقليل برسيم ؟
وبالمناسبه هل للتبن مضار وايش منافعه ( واذا احد عنده خبره بطريقه في اطعام الغنم وتكون غير مكلّفه مادياً اتمنى مايبخل علي ) غير الرغايث طبعا

السؤال الثالث :

انا بديت بالمشروع بمده قريبه مع العلم ان عندي خبره بسيطه في البيع والشراء والاضاحي فقط بس التربيه اول مره ابدا فيها واللي استغربت منه
مقولة ان البرسيم يرتفع سعره في الشتاء ! هل صحيح هالكلام واذا هو صحيح لماذا؟ وماهو الوقت المناسب لشراء كميه كبيره لتفادي ارتفاع الاسعار


.
.


للي بيتكرّم ويجاوب على هالاسئله اتمنى انه يتشعّب في اجابته بقدر المستطاع ويعلم ان اي معلومه يجدها بسيطه قد تكون مفيده لي

بانتظاركم يا كرام