استفسار

[تاجر مواشي]

اغنام - ابل - دواجن - طيور

مساء الخير للجميع
ومبروك عليكم الشهر وكل عام وانتم طيبين
اخواني بصراحه ما انزل استفسار الا الاقي اجابات شافيه وافية من الاخوان اهل الخبره
انا عندي مبلغ بحدود ال 40 يمكن اوصله الى 50 الف وكل تقريباً 3 شهور يجيني مبلغ 11 الف تقريباً ربي يرزقي ويرزقكم ويرزق جميع اخواني المسلمين
المشكلة يا اخوان اي مبلغ يجيني ما استفيد منه ابد يا ادخل الاسهم واخسر او انه يطير من هنا وهنا قبل شهرين سافرت وطارت مني 20 الف وقبل اسبوع دخلت سوق الاسهم وخسرت بحدود 14 الف والان متعلق بسوق الاسهم واذا ببيع راح ابيع بخساره
نصحني احد الاخوان قلي اشتر 20 راس نعيم معاها عيالها و20 راس معزا معاها عيالها وبصراحه انا متوفر عندي مكان بدون اجار وعامل لكن مو متفرغ يعني يجي يعلف ويمشي ولا له اي دخل باي شي ثاني والماء متوفر يعني اشتري اشراع واملاه على طول العلف قريب وبامكاني اشتري حق شهرين او ثلاثه في كل مره
المشكله اللي تواجهني يا اخوان هي اني ما اقدر اجلس عند الحلال مستحيل لان عملي بعيد ولا اجي الا بالشهر مرتين وفي كل مره اجلس 5 ايام
تعتقدون ان طريقتي صحيحة او غلط
لان تفكيري اني احطلي شبك واشتري 40 راس مثل ماذكرت فوق وخلي العامل يعلفها وتجلس بشبكها واذا جيت الاربع ايام اطلعها لان مكانها على طرف شعيب يعني خارج البنيان والارض اللي قدامها مفتوحه ولا عندها احد يعني اقرب مزرعة عندي يمكن 5 كيلو
يصلح احجزها بالشبك مع العلم ان الشبك كبير وواسع ولا راح تضايق بعض ولا اطلعها الا 4 ايام ثم ارجعها للشبك واحجزها 15 يوم وهكذا
والمشكلة الثانية اخاف تمرض وتعدي بعضها ونا ماني موجود ويبيلها تطعيمات انا ما اعرفلها وشغلة طويله عريضه
فية شخص اخر شار علي يقول اشتر 20 راس فقط
وفية ناس يقولون 20 راس تتعبك وتخسرك ولا منها الا التعب

لكن انا ما اشوف قدامي الا هذا المشروع واخاف ادخله واتوهق يموت حلالي ولا يمرض ونا ما اعرفله ولا عندي خبره
انتظر الاجابات من الاخوان ومشكورين