من اقوى الخيانه

[غرابيل زمان]

لا ردك الله ولا اطلب ترديــن **** ادعي عليك بعثرة في صلاتــي
عثـرة تشلك مابعدها تقوميــن **** يا قاتلتني يوم صرتي حياتــي
خدان لك بالقلب كانت بساتيــن **** وريضان وغصونٍ بها يا نعاتـي
كنت مناة القلب والروح والعيـن **** واليوم عينك يعلـها ما تباتــي
كنت أحسبك للعهد والحب توفيـن **** قلتي الغدر بالحب ماهي بسواتــي
و حلفتي يمين الله ما منك اثنتيــن **** وانك مـلاك دون كل البناتــي
وانك على عهد المودة تسيريــن **** ولا تسمعين أهل الحسد والوشاتـي
وصار اليمين ستار خلفه تواريــن **** ورماح غدرك بالخفا مشرعاتــي
وبان الغدر سـم جرى بالشراييــن **** الله عسى يسقيك سـم الفعاتــي
كلي سقيتك حـب واليوم تنسيــن **** تقولين حلم أيـام واليوم فاتــي
خذتي الهوى لعبة على ما تحبيــن **** لين عصفت بالهوى عاصفاتــي
من زينك يا بنت بالشعر تزييــن **** من صـورك بابياته الطايلاتــي
أنا من غرامي قلت كانك تذكريــن **** قلت الخجل صاب البدر من مناتـي
وصرتي بشعري في العذارى تباهين **** تقولين أنا شمس العصر في حلاتي
زينتك بشعري ولا غربك الزيــن **** ما زانتك صبغات حمر الشفاتــي
صورتك بالشعر حزام ورياحيـن **** واثرك هضاب وشوك مابه هداتــي
رسمتك سحابة خير قطر تنفيــن **** فزت لك الصحراء زهور ونباتــي
رسمتك مهاة للجميلة تقوديــن **** واثرك قطيـعه وضيعتها الرعاتــي
واثرك غراب يوم سدل الجناحيــن **** كنت احسب اني شايف لي قطاتــي
بالشـعر غليتك على كل غاليــن **** واثرك دنــيه تعشقين الدناتــي
وبالشـعر عاتبتك عتاب المحبيــن **** أنا من يسوم الروح لك ياغناتــي
توسلت لك خايف على حـب عاميــن **** عامين لكن في حسابي مئاتــي
ناديت لكن لي ابد ما تسمعيــن **** عمري وروحي فكـري في ثباتــي
حذراك للشينات عمري تماشيــن **** عديمات اصل اخلاقهن دانياتــي
غاب الولي عنهن ولعبن بحبليــن **** يا خس واليهن وخس الولاتــي
ما همهن في الناس زين ولا شيــن **** وقلوبهن من حقدهن مظلماتــي
وقلتي وربـك لو يكونٍ ملاييــن **** ما غيرن باطباعهن من سماتــي
تحسبين انــك بالمهافة ترقيــن **** كيف الصعود يكون للهاوياتــي
وخنتي وبعـتي كل عهد واياميـن **** ما عاد يفرق بين ماضي واتــي
وصرتي مثل غيرك برخص تبيعيـن **** يا مرخصتني ما بقى لك غلاتـي
صبري نفذ واليوم ثارت براكيــن ****مظلوم انا وباكر تحل ادعواتــي
سمعي عسى من بعدها ما تسمعيـن **** سمعي دعا من صار قلبه حصاتـي
ادعي عسى من ناظرك ما تشوفيــن **** وتطحن بك الايام طحن الرحاتــي
وعساك عوق منه ما عاد تتبريــن **** عوق تشافق له قلوب العداتــي
ويالله عسى يحتار فيك المداويــن **** تبين الممات ولا يجيك المماتــي
ويالله عسى كف الندامة تعضيــن **** تندمين يوم انه يفوت الفواتــي
وتبكـين دم من مـقلة العيــن **** وتحتار امـك عن عناك وتحاتــي
عسى ما تلاقي من له القلب تهديـن **** وان حصل ادعي عساك الشتاتــي
يا بلوة اللي وسط بيته تعيشيــن **** ساهي وحوله شب جمر الغضاتــي
عسـى بعمرك ساعه ما تهنيــن **** وتمضي حياتك بين هـم وشقاتــي
يا بنت قلبـي وين مثله تلاقيــن؟ **** قـلبٍ عطاك الحب ما قال هاتــي
جيتك وروحي شلـتها لك بكفيــن **** وفي التالية رمح الخيانة جزاتــي
يالله عساك الـنار يا أم وجهيــن **** كلـه انكشف لا ما تفيد العباتــي
ويالله عسى تلبسك جن وشياطيــن **** وتكونين مدعاة الحكي والشماتــي
يا حـية رقـطا تقود الثعابيـــن **** بـاكر تحـن أيـامك المعتماتــي
وبـاكر على فعلك بمثله تجازيـــن **** ظلم المشاعر ما تحكمه قضاتــي
بيني وبينك تحكم أيـام وسنيــن **** وأن شاهدي قـلبٍ من الغدر ماتــي
ويا دمـعة التمساح لا لا تذرفيــن **** العيـون رغم ادموعها كاذباتــي
لا ما عرفتي الحب لا ما تحسيــن **** وغدرك تعدى غدر ذيب الفلاتــي
الـذيب يعوي قبل يغدر بمسكيــن **** وانتي غدرتي خافقي في سباتــي
لو كان غدرك في كفوف الموازيــن **** لكان رجـح كل غدر البناتــي
انتِ السبب سقتي على القلب جرحيــن **** غدر الغرام وموجع الذكرياتــي
وانتِ السبب و اليوم لا لا تلوميــن **** وان جاك باكر شوفي شلون يأتــي
والله لاكتب وافضحك في دواويــن **** وارقص واغني يوم خبر الوفاتــي
وارسم لاهل العشق قلب وسهميــن **** وقصة خيانه ما روتها الرواتــي
ويمين لانشر فوق اسمك عناويــن **** واشهرك من قاصي اليمن للفراتــي
ومن غرب هالدنيا إلى قاصي الصيـن **** ديوان غدر فيه كل اللغاتــي
والبادي أظلم سنة العين بالعيــن **** والا فذي لا عادتي ولا صفاتــي
ويا شبه انسان براس ورجليــن **** أعوذ بالرحمـن منك بصلاتــي

منقول ..

[مشاعر حالمه]

مشكور أخوي غرابيل زمان على النقل الجميل ..



انشالله نشوفك مستمر معنا بمواضيعك الحلوة والجديده ..


تحيتي لك أختك / مشاعر حالمــه