مابي عيالي يصيرون مثلي !!!!!!!!!!!

[أسواق]

بسم الله الرحمن الرحيم


اليوم راح أناقش معكم موضوع لمسته بحياة الناس حولي
و تصرفات أستغربتها حيل
صح لها تفسير عقلاني بس أحسها زادت عن حدها

أعطيكم أمثله توضح قصدي

واحد ولده شرس و مأذي لدرجة كبيرة يبطش و يضرب و ما عنده تفاهم إلا باليد
لما تعاتب أبوه يقول
(( ما أبي ولدي يصير مثلي ضعيف خلوه يأخذ حقة بيده علشان ما أحد يدوس له على طرف
أنا ما أبي أربيه زي ما أهلي ربوني على الطاعة و تجنب الشر))

وحده بنتها لسانها طويل و ترادد الأكبر بالسن منها
و لما تعاتبون أمها تقول
(( ما أبي بنتي تصير مثلي مسكينه و على نياتها خليها توقف الناس عند حدها و تهابها
ما أبي أكتم حريتها و أفشلها قدام الناس و أكسر شوكتها مثل ما أمي كانت تسوي فيني بمجالس الحريم ))

ناس تصرف ألوف على الأكل و المطاعم لدرجة تضغط على نفسها و تبالغ بالشراء الزائد عن الحاجة
لما تنصحهم يقولون
(( ما أبي عيالي ينحرمون مثلي
كانوا أهلي ما يهتمون غير بالأكل الأساسي و أنا محروم من غيره أشوفه مع الناس و أتحسر))

يصرفون مبالغ غير معقولة على الملابس بكل وقت و بدون مناسبة أو حاجة
و لما تناقشهم يردون
(( ما أبي عيالي ينحرمون و يصيرون أقل من غيرهم
أنا ما أبي أبخل عليهم و أحسسهم بالنقص مثل ما كنت يوم أني صغير الملابس من مناسبة لمناسبة بس ))


و كثير من الأمثلة صدقوني لو تدورون تلقونها بحياتكم و حولكم و يمكن حتى داخلكم أنتم لو بكم قليل
تصرفات نشوفها و نلاحظها حتى لو ما صرحوا فيها
راح تلاحظونها بتصرفاتهم و طريقة تربية أبنائهم

(( طفولتنا تتأثر بطريقة تربية أولادنا))

هي خلاصة الموضوع
أنا مؤمنه بهذه العباره و صحتها

بس هنا الخوف من المبالغة و التطرف
فيه ناس تحاول تعوض نقص كانت تعاني منه بطفولتها بأبناءها
و هذا شيء خطير إذا زاد عن حده
فيه من يصل لمرحلة العتب على الأهل و هذا من أنواع جحد الجميل
يلومونهم على أشياء إذا مو بالكلام المباشر راح يكون بتربية أولادهم بطريقة تختلف جذرياً عن طريقة تربية أهلهم

كثير أسمع عبارة
(( سبحان الله فلان أبد ماهو مثل أهله أطباعة غير))
ما فكرتم أنه ممكن السبب مو فيه الخطأ بتربية أهله
و أنهم ما يبون عيالهم يصيرون مثلهم

نسوا أنه (( بالرغم من كل عيوب تلك التربية الي هم يشوفونها خطأ ربت رجال و حريم لهم مكانه بالمجتمع ))


ساحة النقاش مفتوحة لكم
و منتظرة رأيكم و ملاحظاتكم