حر و رمضان؟ لا لا لا يبيله هالمحلبية

[حواء غرابيل]

يعتبر الليمون سبحان الله أكبر قاتل للعطش من بعد الجاي فشرايكم أسويلكم محلبية ليمون باردة تسرسح على جبودكم؟ يالله بسم الله

المقادير
أربع بيضات مفصولة (البياض بروح و الصفار بروح)

200 غرام سكر الكاستر

4 ملاعق جيلاتين

500 مل كريمة سائلة

4 نقاط فانيللا

قشرة ليمونتين مبشورة

عصير ليمونتين

الطريقة:

ذوبي الجيلاتين بملعقتين ماي حار و خليه يبرد على ما تحضرين الآتي

في طاسة اخلطي صفار البيض مع السكر تمام حتى يصير خفيف القوام بعدين ضيفي عصير الليمون و القشرة المبشورة و اخلطيهم زين

ألحين صبي الجيلاتين على الخليط مع الفانيللا

في طاسة ثانية أضربي بياض البيض بالخفاقة الكهربائية لين يجمد شوي

و في طاسة ثالثة اضربي الكريمة السائلة و لو عندج الزاهبة يكون أحسن و أسرع

بعدين شوي شوي حطي من بياض البيض على مزيج الليمون و اخلطي و تالي الكريمة و اخلطيهم بملعقة مو الخفاقة أوكي؟

و صبيه بقلاصات أو طوس و حطيه بالثلاجة لساعات حتى يجمد و بالعافية