يعني خلاص ؟؟؟

[االزعيم الهلالي]

بسم الله الرحمن الرحيم
السلام عليكم ورحمة الله وبركاته
هاردلكم الخروج المستحق للاسف
اولا انا من قبل مباراة الاتفاق بالدور الاول ماكتبت اي موضوع احكم فيه عن مدرب او اي لاعب
من اجل يكون اخذ الفرصة الكاملة
*اولا ابدا بمباراة اليوم
صراحة هاسيك مفلس ولا يستحق ومستواه تحت مستوى الهلال بكثير
يعني انت تلعب محتاج هدف وتلعب بمحورين ليش الغنام كان يكفي
واللعب بمهاجمين المحياني الي اثبت لنا انه خسارة التفريط فيه ومعه يو بيونق الغير مقنع بالشكل المطلوب لكن يبقى افضل من العربي الفردي لان يو يمديك تستفيد منه بالرأسيات او بالسرعة والازعاج للدفاع يعني مكمل للمحياني
وتبديل الفريدي هو الي خلاني اجزم انه مفلس ومايملك من التدريب الا اسمه
يعني انت بالظبط متاخر بهدف ومستمر تلعب بمحورين
خلاص اسحب محور الي هو القرني ودخل يو
يعني تلاحظون بعد التبديل الوسط اختفى بغياب نواف الي اتوقع ارهق بعد المستوى الكبير الي بالشوط الاول بعد الاصابة
وويلي حتى لو كان يقدم نص مستواه مايكفي لصناعة اللعب لذالك شفنا يو يرجع وياخذ الكورة وينطلق فيها

* الفردية اهم الاسباب التي اخرجت الهلال اليوم
يعني بالشوط الاول حتى وانت متاخر بهدف وخارج ارضك تقعد تسحب وتستعرض وهذي لاحظتها بكثرة من نواف وهوساوي والغنام والزوري وسبحان الله ياليت ذا الاستعراض يكون بملعبهم لا بنص ملعبنا
واكثر من هجمة مرتدة خسرناها بسبب الفردية هذي


*ثانيا بعد نهاية موسمنا المحلي ببطولة وحيدة للاسف
ايقنت ان العربي ماعندك احد وياليت نستغل عقده ونبيعه قبل لاتطير العروض المقدمه له
وهرماش اشوف انه لاعب كبير وينفعنا اذا كان محور متراجع يعني لاعب دفاعي
يعني لو تلاحظون اغلب الجمهور يقولون مامنه فايدة لانه صار يلعب محور هجومي او صانع لعب واشوف انه لازم نستغني عنه ونستفيد من مكانه بقلب دفاع اجنبي
لان عندنا الغنام والفرج والقرني الي لازم ياخذ فرصته كاملة او انه راح ينتهي

اما يو اشوف انه لاعب راح يفيدنا لو تأقلم مع الاجواء لان حياته بالرياض جدا صعبة
مايتكلم الا كوري ولاعب صغير عمره 23 واول مرة يحترف خارج كوريا
علشان كذا اتمنى يبقى مع ياسر للموسم القادم باذن الله لو رجع وانا اجزم لكم انه راح ينجح

وويلي خلاص مو ويلي الموسم الماضي والي قبله يعني خلاص اشوف ان روحه وعشقه للفريق لان شفنا لقطة بكائه بمباراة الغرافة والولاء للنادي خلاص راح
واقرب دليل على كلامي هدف الاهلي الاول الكورة تمر من عنده وتعدي وتدخل قول وهو مايحرك ساكن

* بالنسبة للمحليين
*اول شيء اشكر العابد والزوري واحييهم على مستواهم اليوم
والزوري ذكرني بايام 2009 شفناه صنع كم كورة وغطى كماتشو الي ماشفناه الا بكورتين الهدفين الي كانت كور ثابتة
وغطى فيكتور

العابد الله يسعده يارب على روحه وعشقة للفريق وماعندي اكثر من كذا علشان اوفيك حقك

*كذلك اشكر المرشدي الي اي لاعب بعد الكلام الي يسمعه ويشوفه منكم راح يوقف الكورة لكن هو اليوم لعب مباراة كبيرة بالنسبة لوضعه
لكن اتمنى توقفون معه ونكون الجمهور الوافي الي يوقف مع ابناء النادي
يعني مستواه بكاس الخليج خلاص نسيتوه
ليش وش الفرق بينه وبين ياسر

*اليوم اعجبني الدفاع باكثر من نقطة :
كانوا على خط واحد واجبروا الاهلي على تسللين من اول عشرين دقيقة
وكانت تغطيتهم للاعبين الاهلي رائعة وشفنا باكثر من هجمة منها هجمة فيكتور الي سددها بالشبك الجانبي لان هوساوي مغطيه والمرشدي مغطي الحوسني واجبره على التسديد
وهجمة الحوسني الي كان شبه منفرد ولولا الله ثم تغطية الزوري لكماتشو والمرشدي لفيكتور لكانت تشكل خطر كبير لذالك انجبر الحوسني لقتل الهجمة واعادتها للخلف

*البيشي عليه اكثر من استفهام يعني كان يتقدم للهجوم بشكل مبالغ فيه وبدون فائدة ويترك مركزه ويضطر القرني لتغطية مكانه

*الفريدي على مستواه اليوم تحت المتوسط لكن مع ذلك اتمنى عدم التفريط فيه لانه نجم متى ماكان بمستواه راح ينفعك ويكون ابرز لاعبين الهلال المؤثرين

*كنت اتمنى اشوف شيء من الجمهور للمحياني على وفائه لنا
لكن ان شاء مباراة الغرافة

*سمعت عن ايقاف الفهمي واتمنى الهلال مايقدم اعتراض ليست مثالية ولكن انت ماتاهلت بالملعب والفهمي ماكن نقطة تحول بالمباراة
والاهلي كان يستحق التاهل اكثر الله يعوضنا بالاسيوية


ـــــــــــــــــــــــــ ـــــــــــــــــــــــــ ـــــــــــــــــــــــــ ـ
اليوم كنت اشوف المباراة بالمقهى بعد ماانتهت المباراة قالي خويي اجل بتتاهلون
انا صار وجهي كذا :yes: مادري وش اقول
ورديت عليه وقلت اهم شيء ماهزمتونا رايح جاي
يعني لهالدرجة صار طموحنا مع هاسيك :cry:

اعتذر عن عدم تنسيق الموضوع
ان اصبت فمن الله وان اخطات فمني والشيطان

تحياتي لكم