يآ سعودي ،، لا تشتكي من قلة الوظائف ..~

[تاجر مواشي]

اغنام - ابل - دواجن - طيور

السلام عليكم ورحمة الله وبركاته


اللهم صلي على نبينا محمد وعلى آله وصحبه أجمعين


ذهبت يوم الجمعة الماضية بتاريخ 1433/6/13هـ لسوق الأغنام ببريدة ووجدت شي يطيب الخاطر من كثرة المعروض ومن طيبه وماشاء الله تبارك الرحمن

وأكثر المعروض من المعزا عكس الجمعة التي سبقتها فقد نزلت اعداد هائلة من الضان في السوق ونزلت اسعارها جداً حتى وصلت الطليان ابو ثلاثة اشهر 600 مع الحراج وأكثر اللي يبون شي للأضاحي شروا الاسبوع الماضي

اما الجمعه هاذي استلغيت الفرصه وأخذت لي كم راس معزا صغيرات اعمارهم 4 إلى 6 شهور على 500 ريال عوارضي ما شاء الله طيبات جداً من رجل سعودي معروف بالسوق ورجال راعي ذمة

المهم لما اشتريت وركبتهم السيارة وعلى الساعة ثمانية ونصف تقريباً بدا السوق يخف ،، رحت لشبوك الغنم الي فالسوق وعمالها سودانيين الله لا يبلانا

واسأل عن شي اصغر من المعزا اللي انا شاري ،، تقريبا اعمارهم 3 شهور توهم مفطومين

لقيت اسعارهم 700 ريال !! قلت لهم بلا لعب على خلق الله ،، انا توي شاري بخمس مية افضل من هاذولي بمراحل !

واتلاقط انا وسوداني قال لي والله لو انهم زي هاذولي اشتريهم منك كلهم بـ 600 ريال

المهم واروح انا وياه للسيارة واخليه يشوفهن ,, يوم شافهن قلت له يالله عطني الـستميه انا ابي امشي ،، بدا يحك راسه

قال لي ما ادري كيف انهم طيبات وبدا يتهرب

عرفت انه كذاب دجال ولا عندهم الا اللعب على الناس

،،

اليوم رجعت للسوق العصر والقا هالسودانيين ،، وارجع لخويي السوداني اللي تلاقطت انا واياه البارح

والقا عنده رجال سعودي بعمر ابوي اشترى تيس مندي عمره الله العالم 4 شهور بـ 800 !!

إنا لله وإنا إليه راجعون

لعب على الناس وحركات قذرة !!

ليش شبابنا قاعدين بالبيوت وما حصلوا وظايف والسودانيين لاعبين بالسوق لعب ؟! وينكم يا شباب

عاد انا اعرف سوداني عامل عند واحد من جيراننا يقول لي ان ولد خاله جاء للسعوديه واشتغل بالسوق ورجع للسودان بعد سنتين معه 50 ألف ريال ،،

هالمبلغ ما يطلعه بعض الشباب السعوديين باكثر من سنتين !

لا احد يحسبني تحيزي ولا عنصري لا والله بالعكس السودانيين اخواننا واهلنا

ولكن فيهم ناس أخبث من ابليس

هل توافقونني الفكرة ؟!

ينطبق هالموضوع بسوق التمر ولعب الباكستانيين فيه

وسوق الخضار ولعب كل الجنسيات فيه

ننتظر تعليقاتكم ..~