كما تدين تدان

[حواء غرابيل]

السلام عليكم ورحمة الله وبركاته
ترددت وايد قبل لا اكتب هلموضوع
بس تعبت من الظلم وابي افضفض هني

بداية السالفه قبل 3 سنين
ما كنت متزوجه
واحنا في دولة اجنبيه
يعني ماكو عوايل وايد
فقلنا لمرت عمي وخالتي تدور عروس لاخوي

دقو علينا وقالو هذه وحده خوش بنيه وساكته و ابوهم مسنعهم
وما تطلع ومن هلسوالف
قلنا اوكي مدام محترمين و البنت ما يطلع حسها

خطبو وصار العرس وجت العروس وسكنت عندنا على ما تجهز شقتها
كنا انا وامي مره كبيره في البيت
انا استانست فيها قلت يتني اخت تونسني
وخواتي متزوجات ولاهين بحياتهم
وفرحت و صرت لها اكثر من ااخت وربي يشهد علي
قالت نفسي بسباجتي
والله والله والله
رح الجمعيه و شريت اغراض ورحت طبخت لها
وهي بسابع نومه
انطرها تقعد عشان تطبخ معاي
ماكو فايده
قلت ميخالف عروس
المهم
اجيب القهوه والحلو واروحلهاا غرفتها
واطلعها
وهي ساكته ماكو ولا كلمه بس تهز راسها
قلنا مستحيه
وامي عيوز
تطبخ وتحط جدامها
وانا اشيل الصحون واغسلها
وهي اذا القنفه تحركت
هي تتحرك
حتى مره تكرمون نعالها انقطع
رحت شريت لها نعول يدد

بدينا نلاحظ انها تنافخ
مو عاجبها العجب
اخوي سجلها في مدرسه لغة
عشان تتعلم
والله تجي تلقى غداها جاهز
تاكل وتقط المواعين ع المغسله وتنزل
تنام او تمسك اتلفون
وانا اغسل المواعين
في الزواره نقعد انا وخواتي نسوالف
ما نحس الا وهي هي قايمه
بنص السالفه
لا احم ولا دستور
يعني من الذوق تقول عن اذنككم

نطلع مرات انا وهي واختي نتمشى في الحديقه
تقوم من جدامنا و ترد البيت
حتى ما تقول باي
تفضلو معاي
يعني هي يايه مععانا واحنا عازمينها
كل هذا طاف
ما اهتمينا
حى اذا جونا ضيوف
هي قاعده ع القنفه
وانا اقدم الضيافه
حتى ما تكلف على عمرها
وتجاملني
تقولون مو ملزومه
مو شرط ملزومه
بس ذوق وادب
مره قلت لها شنو على قناة ام بي سي
والله يا بنات حذفت الريموت على حافه الكنبه
وعشانها في بيتنا
طوفتها
امي قاعده وهي ولا همها
تعلي على صوت الاغاني و تغني مع المطربه
ورب الكعبه ما جذبت بكلمه

بعد فتره طلعت بشقه بروحها
لو جتنا زياره
امي تخدمها وهي حاطه ريل على ريل و تنافخ
ويوم حملت باول مولود
وربي بجينا من الفرح
والدنيا مو سايعتنا
ولدت وجابت بنت
كل ما نبي نشيل بنتها
توقف على روسنا
جنا بناكل بنتها
وصارت تقول لاخوي عن طلعاتنا ومشاويرنا
واذا شافت وحده لابسه ولا كاشخه او شاريه جهاز يديد
تقوم تبجي و تشكى لريلها
وهو يهاوشنا
كل ما تجينا ينقلب البيت نكد
وتقط كلام علينا
اول ما تزوجت
حتى كلمة مبروك ما قالت
وقعدت تقط نغزات على ريلي
وتقول لبنتها لا تطالعين عمتج

امي فيها التهاب مفاصل و ما تقدر تقوم
وعندي ولد اختي عمره سنه ونص
ركض للشارع واحنا وراه خفنا عليه
وامي من الخرعه قامت تركض
جان تقول هذه اللي مسويه روحها ما تقدر تمشي
على بالها انا مو وراها
امي شايلتها شيل من الدلع
ونفاسها تطبخ و تودي لها
واخر شي تقول محد عبرني
حتى ماي محد عطاني
جابت ولد الحين
حتى امي ما علموها
وصارلهم سنه ما يونا
والحين فااضحتنا فضيحه
واسرار بيتنا كلها نسمعها من الناس
حتى مشاكل اختي مع ريلها قالتها للناس
واحنا ساكتين والله قلنا عنها شي رغم كل اللي سوتا

ادري طولت عليكم
بس بفضفض