نصيحة قبل ان تشتري حلال جاي من مكان بعيد

[تاجر مواشي]

اغنام - ابل - دواجن - طيور

السلام عليكم

الكل يدري ان الحلال يتعرض للامراض وانتقال العدوى بسرعه ومن باب نصيحتي لاهل الهوايه وخصوصا اللي عندهم حلال مهجن ومتعوب عليه او حتى حلال عادي فهو ثمين عند راعيه

وكل مربي للحلال قد تعرض لمثل هذه المشكلة واهل التربية المعروفين يحذرون من دخول حلال جديد على حلالك الاول

وكنت زاير لاحد المربين وقد اشترى حلال جاي من ديرة مجاورة وبصراحة تضرر مراحه كثير

ولو ما كنت معاه في احد المختبرات لاجل يشرح المصابات كان والله ما نزلت هالموضوع ، علشان ما احد يفهمني غلط او يظن ان الموضوع مقصود فيه احد

المساله نصيحة للاخوان المربين والتعبانين في مرحهم انتبهوا من ادخال حلال جديد قبل ما ياخذ كل التحصينات اللازمه مثل دموي والمعوي والمجترات

وعندي صور وانا مع بعض حلال خويي المصاب وهو مشرح اللي يبي ارسلها له على الخاص ما عندي مانع


اكرر المقصد نصيحة للجميع وليس تشكيك في احد

واوجه باسمي وباسم كل اهل الجنوبيات لاخواننا اللي يبيعون حلال جاي من برا او من مكان بعيد انهم يحصنون حلالهم قبل البيع او على الاقل يخبرون المشتري ان الحلال ما اخذ التطعيمات او ناقصه التطعيمه الفلانيه

ونقول لهم الله يرزقكم ويبارك في سلعتكم بس الصدق والوضوح ابرك للشاري والبايع والحديث معروف





تحياتي للجميع