اقرو قصة ولادتي ولكم الحم على دكتورتي

[حواء غرابيل]

ولادتي برويال حياة ودكتورتي ناهده العلي

انا كان موعد ولادتي 8/11 ورحت حق الدكتوره 30/10 فحصتني وكنت مفتوحه نص سانتي بس طلعت ايدها جان اتقولي لحظه
فجي ريلج مره ثانيه سئلتها ليش قالت بتئكد
زوجي كان قاعد معاي وشافها دخلت اكثر من صبع وقالت لا نص سانتي بس
رديت البيت وقعت وتشورت كالعاده صليت الفير وحطيت راسي ونمت الساعه 6 وشي الصبح
حاشني عوار بعزيزووي وهذا العوار من اول ما حملت لي الحين واهو فيني
قمت الساعه 10 الصبح تكرمون الحمام حسراااانه جان اشوف بقعه صغيره على الاندر وير شفافه جنها ماي
انا عبالي سويتها على روحي
لبست واحد يديد ورديت نمت قمت على 12 وشي حسرانه تكرمون هم شفت نفس البقعه بس كان عليها شي ابيض خفييييييف
مافيها ريحة تكرمون بول جان ابدل والبس واحد ثاني
الساعه 1 الظهر قمت من الفراش حسرانه بس قمت وقفت على حيلي نزل علي ماي خفيف يس دمر الاندر وير ووقف
دقيت على امي قالتلي يمكن هذا ماي نزل عليج روحي الطبيب وفعلا رحت وصلت 2 نزلت من السياره نزل علي ماي
بس وايد على طول دخلوني غرفة تحظير الولاده ركبواي ادرب ومافيني طلق بس الماي كل فتره والثانيه ينزل
حطو على بطني جهاز مال نبظ البيبي والطلق
شوي وتييني دكتوره فحصتني انا مفتوحه نص ستنتي جان اتقولي بحطلج حبه اتحمي الطلق قلتلها مابي
جان يودوني غرفه ثانيه وشوي وتييني نفس الدكتوره بفحصج وبحطلج الحبه قلتلها مابي تفحصيني ولا ابي حبتج
جان اتقولي لا لازم انتي قاعده اتنزلين ماي ومافي طلق ونص سانتي مفتوحه وموعد ولادتج طاف
قلتلها منو قالج طاف انا ولادتي 9/11 وهذا بجر عادي اعوشر
جان اتقولي اذا ماخليتيني افحصج واحطلج هالحبه راح انولدج سيزيريا اهني امي سفلت فيها قالتلها ليش اتخرعين البنيه
شالكلام الفاضي اهني شوي بلشت اطلق طبعا صارت الساعه 5 المغرب ودكتورتي ليلحين مايت وخليتها تفحصني وتحطلي
الحبه صارت الساعه 9 جان اتييني تبي تفحصني مره ثالثه قلتلها مابي جان ادق على دكتورتي اتقولها ماتبي تفحص وانا
بالفحص الثاني انفتحت سانتيين
كلمتني الدكتوره اتقولي يابنتي لازم تفحصج علشان انعرف جم انفتحتي وطلقج بارد ياماما نبي نطمن عليج قلتلها اوكي
وفحصتني مره ثالثه انا سانتيين والطلق صار كلل 10 دقايق
صارت الساعه 11 بليل ودكتورتي مايت
جان ادش علي نفس الدكتوره قالتي اشرايج تاخذذين ابرة ظهر ماراح اتحسين اب اي شي وراح نقدر نفحصج ونوسعج شوي من
غير ماتحسين
الطلق عواره كنت قادره اتحمله بس تعبت وقلت ابي ابره مابي احس بشي امي وزوجي حاولو يقنعوني ما اخذها الا اذا خلاص بالمره
ماني قادره اتحمل بس انا قلت لا مابي اتعذب واتحمل انا تعبانه وخذيت ابرة الظهر
والدكتور لمه عطاني ياها اطلعت روحي مت من البجي مت مت مت من البجي اهني جان تي الدكتووره الساعه 11 و40 دقيقه بليل
يت طالعتني وانا اطالعها دقيقتين من خذيت الابره الجهاز مال نبض البيبي قام يصفر والدكتوره اتصاره نفس ياماما اخذي نفس
وانا اتنفس وتصره اخذي نفس نبظ البيبي قاعد يروح اخذي نفسسسس واخذي نفسسسس وتصرخ باعلى صوت مت من الخوف


جان اتقول سيزيريان فجت ريلي جدام امي وزوجي ودخلت البربيش مكان المثانه تكرمون جان امي اتقولها شنو بتحولينها سيزيريان
جان الدكتوره اتقولها اي النبظ قاعد يروح وتصررخ علي تنفسي ياماما تنفسييييييييي وانا اتنفس واشفط بهالاكسجين واهي تصارخ
وامي اتقولها البنت ماكان فيها شي شحطيتو بالابره شقلتيلهم شسويتو بالبنت
ووانا صج ماكان فيني شي طلقي والبيبي كان اوكي من خذيت الابره اتنكست
واقول حق امي انا ما اجازف بالبنت والبيبي
جان اتصرخ بويه زوجي اتقوله انت زوجها البيبي راح يمووت انا سمعت هالكلمه جان اطيح على. الفراش اطالع زوجي وهو يطالعني
وامي اتقولها اكو دكتوره اتقول جذي وهدتنا وراحت الدكتوره ودوني غرفة العمليات وسوتلي سيزيريان وفوق هذا كله شارطه ولدي بالمشرط
صوب عينه بشوي
يعني الله حفظ عين ولدي وماحاشته بالمشرط
ولي يومكم صارلي 10 ايام احس بتئنيب الضمير لاني كنت احن ابي اولد ولاني كابرت وخذيت ابرة الظهر ولاني ماسمعت كلام امي لمه قالتلي
لاتستعيلين على البيبي وخليه بطنج
اهمه من دشيت المستشفى محظريني سيزيريان بس ماقالولنا وسو هالفلم
لان مستحل يعطوني ابرة الظهر من غير تعليمات. دكتورتي الله يسامحها لان كانت اتقول بكيف منو عطيتوها هالابره وتصارخ
واااي صوتها واسلوبها وكلمتها شلون فاولت على ولدي ليلحين اترنن رننننن بذوني
واتذكر شكل ريلي شلون بغى يطيح من طوله لمه سمع الكلمه تخنقني العبره وابجي واحس بتئنيب الضمير
وبسسس هذا الي صار معاي ويارب مايصير مع غيري