الكيراتين وطلاقي )=

[حواء غرابيل]

يابنات هذي وحده نقلت موضوعها يارب يرد شعرها مثل اول واحسن وتفرح بزواجها يااارب :yaaaaaarb:









اقتباس:
انا الصراحة مابقول غير الله يعينج عقب شهر من الي بيصير فرآسج

والبيزات الي بتدبلين امها في مراكز التجميل والعيادات

الله يهداج هالكيراتين للحين مصدقين سالفته !!! لا ومسوية صبغة بعد وعقب كيراتيين

اسمحيلي يعني وين تفكيرج ؟؟؟ قصت عليج وبقوووووووووة

شي معروف صبغة وتمليس مايتخاوون حتى المشقر والحنا مايتخاوون ف مابالج التمليس او الكيراتيين

هذا بدا ينمنع في امريكا والبرازيل وانتم مصدقين للحين !!

ع فكرة مابرمس من كلام فاظي او بييب رمسة حد

ترى بيتنا 4 بنات جربناه

اول شهر ياحلاااااات روسنا وعلى فكرة كل وحده سوته في مكان

وانا وختيه سويناه هنيه فالبلاد , والباجيات برة وفي أغلى صالون ومعرووووف واااايد بدون تشهير وذكر اسماء

واغلى كيراتين الي كاتبين عليه بدون مواد ضارة و.... الخ

انا سويت البرازيلي وختيه الايطالي

شعري طااااااااااح والحين اعاني فراغات الله لايراويج اقسم بالله ادفع دم قلبي كل شهر لافايدة ولا عايدة

ختيه شعرها يطيح فأيد ريلها بالخصل لانها صابغه ومسوية كيراتين عقبها بفترة والحين تتعالج برا البلاد

ويقولها الدكتور الاجنبي نحن نحذر هنيه محد يسويه ويطالبون وايد شركات بمنعها لانها تحوي فورمالديهايد

ولو اتابعين برامج جوفي ذا دكتور ودكتور اوز و غيره

اما ختيه الاخيرة خذ منها شهور لين اخترب شعرها رغم شعرنا بين ناعم سايح ومتموج وكيرلي مكسات البيت @__@

وربيعاتي نفس الحالة وكل من اعرفها سوت بعد فترة ولو ماضر الحين بيضر ع المدى البعيد

حتى ربيع اخويه سار سوى في صالون رجالي والحين مستوي قحطه ع قولة اخويه @@

ومن كثر ماجاف اتصل بحرمته ( لازال مالج ) قال والله ماتسوينه

وسوووري يعني الصالونات مايهمهم غير البيزات عادي تقولج انتي جمييييييييلة وغزال و...الخ ومنااااك ولا منه في ذمتيه

الربح المادي اهم , ويقصون ع الخلق والله محد طلع قدها غير ختيه العودة ابدد ماطيع في شعرها لا تمليس ولا كيراتين ولا صبغ

وماشاء الله شعرها يا زينه ,, والله ياما رمست في الموقع من سنتين ويا تكلمت بس بعضهن طاحن علي وقالن لا شعرنا اوك

والحين منزلات مواضيع يتشكن و2 طرشن لي ليتنا ماسويناه وصدقتي في الي قلتيه

والله ثم والله هذي 3 سنة من سويته وشعري حرام مب راظي يعتدل او يطلع

الكيراتين خرب لي فروة راسي بكبرها حتى الشعرة الي تطلع جنها محروقة ,, يقول لي اخويه حلقي ع الزيرو ابركلج عن هالمخاسير في العيادات

الله الشاهد اني للحين مخسرة فوق الـ 20 ألف ع الفاظي ع زيوت وفيتامينات وخرابيط

رجعت اتعالج للمرة الالف واغسل شعري بماي مسافي ويشلون البلازما من دمي ويحطونها في راسي عسبة لعل وعسى يرجع يطلع

لاني متخوفة من الزرع

هذي معاناتي واجزم انها معاناة واااااااااااااااااايديييي ييييييين رياييل وحريم وبرجع اطرح كلامي في موضوع مستقل

عشت نفسية في الحضيض وخواتي نفس الحال بعد رغم حفاظنا عليه بالشامبو المخصص بعد الكيراتين وبزيوت وكريمات الا انه خلاص ماينففففع

واذ تبين صور تشهد انا مستعدة اراويج ,, انا مابا اخوفج بس ها الي صار

وعلى فكرة انا لما غبت عن الموقع كنت مالجة وطلبت الطلاق بسبب نفسيتي وعيزوا اخواني يطلعوني من الحالة الي انا فيها

لان الريال ونعم فييييه من قلب حبني وحبيته خلال فترة الملجة حتى هلي حزنانين علي لان كان فيني المس العاشق وتعالجت منه وعانيت لين تعافيت

عالجت نفسي بنفسي بالقرآن والزيت المقري وماي زمزم والفروض والسنن و...الخ ولله الحمد لأول مرة عقب الي شكثر يوني تمشي خطبتي ع خير ومن ثم ملجتي

مادري كيف وصلت السالفة لأمه وسوت سالفة مالها اول ولا تالي وقالت اني غشيتهم ومادري شو قالت بعد

نحن للامانة ماسوينا حفلة ملجة ملجنا فالمحكمة بس عزمنا امه وخواته ع العشا وخواتي خلن مالت الصالون تحطلي كم وصلة ورا واييبونها ع جدام

مارمنا نتغاضى عن هالشي لاني صراحة ماقدر اغشه بالفعل وماقدر ارد كلمة امه وهي ملزززمة تبا عشا يعني يا اطلع عروس متحجبة ولا عروس صلعه !!!

وعدت الليلة ع خير يومتها وهو قعد معاي بين هلي وهله والامور طيبة كانت

, عقب فترة امه ماقصرت بالديوان الشعري الي قصدته فيني عند الناس والعرس مقررينه عقب 6 شهور

وهو حليله ياني يهدي الوضع وعلى نياته قال لبسي باروكة شو فيها قلتله والله لو اراويك راسي بتغير رايك فيني قال مستعد اوديج وين ماتبين اعالجج

انا البقررررة فترة الخطبة تميت كل يوووم استخير بعد كل صلاة وكنت دوم انش من رقادي متضيجة بس لانه عجبني في الشوفة تغاضيت عن هالضيج لاني بقرة

بس عقب ها كله قلت لهلي ماقدر اعيش وانا جي حتى هلي فالبيت ماقدر اجابلهم الا متحجبه ,, فما بالكم شريك حياتي وللحين يزورنا ووده ياخذني مرة ثانيه

قالولي انتي مضخمة الامور ومخلتنها كبيرة وختيه قالت جوفيني ام عيال وشعري يطيح شكثر فأيد ريلي وفأيدي

قلتلها ماشاء الله انتي متزوجة من سنييييين مب ماخذنج قرعة
انا مابي اي عتب ع قرار طلاقي بس قلت لهلي والله اني ندمانه ع ايامي الي عشتها وانا مب متحجبة وعلى كل شعره طلعتها باستهانة

عشت كل حياتي وفالته هالقذلة بألوان واشكال يمكن هالندم يا متؤخر بس عسى الله يسامحني

قالولي عين و.....الخ بس الحمدلله الحمدلله الحمدلله الحمدلله الله ابعد عني سرطنة قشرة الراس وعافاني ومابتلاني بها

وهذا الي يفرحني فهالمعاناة

ولا تصدقون الي يقولكم مملس او كيراتين بدون مواد ضارة وهالخربطان

شعري كان تحت ركبتي للي حاب ينصعق اكثر =) والي براويها شعري كيف كان وكيف صار ياليت تكون قد الامانة وتمسحهن ع طول

عموما اسمحولي ماقدر اراويكم حالياً كيف

اعفوني عن الاحراج لا ازيد عن نفسيتي اكثر

براويكم الدمار الي وصل قبل 8 شهور , والي قبل سنتين أو 3 تقريبا ً كيف شعري كان

صارت الشعرة محروقه ويالله يالله هالشعرتين يلتمن غير الفراغات الي ودكن تكتبن فيها حلول ضد التصحر في الامارات

الحمدلله ع كل حال اكيد انا احسن عن غيري ناس مايطلع فيها ابد وناس تعاني من الكيماوي

وماطلعني من هالحالة غير زيارتي لأطفال السرطان مع عمي ومن قلبي شاكرتله انه طلعني من هالحالة لما جفت مصايب غيري

هانت علي مصيبتي

مودتي