...... الضيقة .......

[أسواق]

الضيقة اللي دايمٍ تالي عصير ..::.. وش حيلتي وأردها لا تجيني


لا طال ظل العود حزة عشى الطير ..::.. كنها على سجن الحديد تحديني


يضيق صدري كل ما جات وأسير ..::.. ولايخفف سوج رجلي حنيني


لا حولنا مشراف ولا أقدر أطير ..::.. يالله قسمة خير لا تبتليني


وعقارب الساعة توقف عن السير ..::.. ولا كنّ في الدوحة سواتي حزيني


والعبره اللي تاصل الحلق وتحير ..::.. يا قربها لو قيل لي يا عويني


أمل شوف الناس ورد ومصادير ..::.. واللي يقول أشفيك كنه يهجيني


يعني على ما قيل من باب تصوير ..::.. لأحدٍ أبي قربه ولا أحدٍ يبيني


أروح أدور خط مابه دواوير ..::.. وأدور اللي هادها تهتديني


وآخذ مع الهاجوس سجه وتفكير ..::.. وأراجع اللي فات بيني وبيني


وأحسّب ذنوبي وأدور لتكفير ..::.. عساي ما قصرت في والديني


وعساي ما قارنت من ينفخ الكير ..::.. واللي يحمل المسك جعله قريني


ويطري علي يوم الحشر وأطلب مجير ... ما أعطى كتابي في شقيقة يميني


ويطري علي صدقان كثر الدنانير ..::.. اللي تعاديني إلا كثر ديني


وراعي الهروج اللي سوات المناشير ..::.. أصد عنه وأدري إنه يعنيني


الله حسيبه يوم عرض القواوير ..::.. والله حسبي من صواب مكيني


وإلى طرالي واحد كانه صغير ..::.. أما أصغر بيومين ولا سنيني


دريت وش قومي وعينت تفسير ..::.. للضيقة اللي من زمن تعتليني


حبه بصدري سالفة سر في بير ..::.. وكن الفواد يقول هذا زبيني


أشفق على علمٍ يجي منه من غير ..::.. لا يسمع اللي سولفوا به ونيني


يا كثرهم غيره ولكن خبر خير ..::.. ما غير شوفه في الوجود يهنيني


رأيي كذا يا عاشقين الغنادير ..::.. ماله على وجه البسيطه وزيني


العام أجيهم من حساب المسايير ..::.. واليوم حال عداي وينه وويني


خطاي تعليق الأمل في المدابير ..::.. الين راح وشفت حقري بعيني


صبرٍ جميل وخابر إنها مقادير ..::.. والله على تخفيف حزني عويني


ذي حالتي لين اتغبا الشمس واصير ..::.. معطى سراحي عقب مانا سجيني


واذا أمتلى جوف الشجر بالعصافير ..::.. طلبت من رب العباد يهديني


يعتقني المأذن عقب ضيقة عصير ..::.. اللي على سجن الفراق أتحديني




محمد ابن فطيس