حميسة النخي أوصلت و بهل البرد و يا زينها من اكله لذيذه و مشهيه !!!

[حواء غرابيل]

مرحبا بالبنات...

اليوم قلت لزم انزل لكم طريقة حميسة النخي ألي آنه مشهوره فيها ...

المقادير:

1 علبة نخي ( او أذا عندج نخي سالقته و مطبوخ هم يكون أفضل )
2 بطاطس مقطع مكعبات و مسلوق
قبضة يد كزبره
قبضة يد شبت
3 حبات طماطم مفروم
2 راس بصل مفروم فرم ناعم
فصين ثوم مهروسين
2 ملعقة طعام طماطم معجون

البهارات:

ملح و فلفل أسود و كركم و بزار وكركم وشوية من بهار الجرم مساله و كمون..
( طبعا البهارات أنتي تتحكمين شكثر تحطين على كيفج بس لا تكثرين يعني من كل شي ربع ملعقه صغيره يكفي ) طبعا ما عدا الملح تذوقين و تضيفين الملح...

الطريقه:

تحمرين البصل في الجدر لين يذوب و تالي تضيفين الطماط لين ذاب الطماط تضيفين عليه البطاطس و تحركينه شوي... تالي ضيفي الثوم وصلصة الطماط و النخي .. في هل الوقت شوفي أذا احتاج ماي تضيفين قياس فنيال و تحوسينه شوية وعقب حطي كل البهارات...
وآخر شي تضيفين الكزبره و الشبت... وشوفي عقب أنتي تتحكمين في قوامها لا تزيدين وايد ماي بس شويه لا تخلينها تكون يامده وايد بحيث تقدرين تاكلينها مع الخبز...

و عاد مري الخباز و اخذي لج خبز التنور ولا مري على أي مطعم هندي و اخذي لج جباتي ويا سلام .. و غوصي بالخمس...

يكفي أنه شغل بيت و شغل أيدج و انظف ...

و عليكم بالعافيه...