المساعد الشخصي الرقمي

مشاهدة النسخة كاملة : ( أبوعبدالرحمن + النصاب ) على كرسي الاعتراف رقم 000 32


الأميرة الناعمة
12-03-2005, 08:21 PM
يلا

عشقوه

نصبيكوو

لا تهبلوني مثل وليف و الغريب

:ندو:
قلم صريح
12-03-2005, 09:29 PM
انني متشوق لأرى كلمات الاخ النصاب الذي طالما اكتب يكون لي بالمرصاد
م.عبدالله
12-03-2005, 10:29 PM
مرحبا سعد..

اول شي مشكوره حسحس على هالموضوع وكرسي الاعتراف مع اني جلست بس شنسوي :(

اخوي ابو عبدالرحمن

اول سؤال لك بيكون

انت رجال متزوج وابو عيال كيف توفق بين اسرتك وبين عملك وبين المنتدى.. انا مجرد دراستي وماني قادر ادخل المنتدى فما بالك بكل هالاعمال...


متى تقول للنت يكفي؟!؟


من اكثر من جرحك في المنتدى


ما هي علاقتك بكل من حولك من المشرفين بالمنتدى

وماهو رايك في انا شخصيا

جاوب وبجي اسألك
أبوعبدالرحمن
13-03-2005, 10:33 AM
هلا بالنصاب وبحاول اجاوب بصراحة


متى تقول للنت يكفي؟!؟

مدري والله


من اكثر من جرحك في المنتدى

سيف العز


ما هي علاقتك بكل من حولك من المشرفين بالمنتدى

حب واحترام واخوة بكل ماتعنيه الكلمة .

وماهو رايك في انا شخصيا

صديق صدوق مخلص , وانت من القلة الذين اثق بهم في عالم النت








//



نفس الاسئلة أوجهها لك :


متى تقول للنت يكفي؟!؟


من اكثر من جرحك في المنتدى


ما هي علاقتك بكل من حولك من المشرفين بالمنتدى

وماهو رايك في انا شخصيا ؟
م.عبدالله
13-03-2005, 06:39 PM
متى تقول للنت يكفي؟!؟

اقول للنت يكفي عندما يؤثر في حياتي بشكل سلبي سواء صحيا او اجتماعيا..


من اكثر من جرحك في المنتدى

امتنع عن قول الاسم... ولكنها شخصيه ظننت بها خيرا واكتشفت بانها تنقل اخبارا كاذبة عني للناس في محاولة لتشويه سمعتي؟!؟




ما هي علاقتك بكل من حولك من المشرفين بالمنتدى


اكثر من رائعه كلهم يحبوني0 ان شاء الله) ما عدا وليف الهم يخاف مني ههههههههههههههههههههههه وانا احب الجميع وبينا كل خير ما عدا الرهيبه ادورلها مقلب من سنه وماني قادر عليها..



وماهو رايك في انا شخصيا ؟


انت رائع وطيب القلب ولكن بك عيوب لا يعاني احد من نتائجها الا انت..

===========================

اخوي ابو عبدالرحمن


مع اني اعرف بعض هالمعلومات بس علشان اللي توه مسجل ووده يشوف معلومات عنك

اسمك

قبيلتك

اسماء اولادك

من متى وانت على الشبكه

كم ساعه تقضي باليوم

الاعضاء التاليه اسماءهم

الرائد.. الرهيبه.. الرئيسه... وليف الهم.. خالد... محمد الدغيري.. طيف نجد.. سيف العز.. سيف العلي.. ابو جاسم..ذهينه.. السبيعي... ابو سيف.. سهم المنايا.. حساسه.. النصاب

ماهي علاقتك بهم .. ومن اي جهه تعرفت عليهم.. وماذا قدموا للمنتدى..وماذا تتوقع ان يقدموا بالمستقبل.. وماذا تقول لكل واحد منهم... وماهو ترتيب معزتهم في قلبك..

الرجاء عدم تجاوز السؤال بعبارات سياسيه..( ابي ابلشك)

ماهو اكبر خطأ اخطأته في حياتك.. وتتمنى لو يعود الزمان ولا تنفذه..او تنفذه بشكل اخر..

ايهما اعلى في مراتب الاداره حساسه ام رهيبه ( يبي يسوي مشكله غصب) ولماذا لا تصبح حساسه مديره على رهيبه ( يا كرهي للرهيبه)اياني واياك تجاوب وتقول كلنا اخوان ومافي احد فوق احد وكلام الملح هذا

ركز معاي بالسؤال القادم...


لو خيرت... بين شخصين.. سهم المنايا والرهيبه.. ايهما تطرد من المنتدى؟!؟! (( اليوم بسوي مشكله ما بأذني ماي)

شنو سيارتك..

ومين من ربعك عنده احلى سياره..

وليه ما تشتري سياره زي الناس خخخخخخخخخخخخخخخخخخ


برب

=================
لما تجي تسالني لا تسرق اسئلتي حط اسئله لك لحالك..
أبوعبدالرحمن
14-03-2005, 12:57 AM
هذي مهي اسئلة هذي مصايب

الله يعين وتكفون لا تزعلون مني لاني بتكلم بصراحة

اسمك

سعد

قبيلتك

عتيبي

اسماء اولادك

اسيل 7 دحومي 5 حمودي سنه ونص

من متى وانت على الشبكه

اربع سنوات

كم ساعه تقضي باليوم

خمس ساعات تقريبا

========

الرائد // تعرفت عليه في غرابيل , وقدم لغرابيل كل ما استطاع حينما كانت ظروفه تساعده , اتوقع ان يعود بقووة فقد اشتقنا له

اوجه له كلمة بسيطة :

سننتظر عودتك فأنت قلب للمنتدى ولا يمكن ان نستغني عنك , واتمنى ان اقابلك مرة آخرى فمقابلتي الأولى لك لم اكن اعلم انك انت الرائد .

الرهيبة //

اعرفها من اربع سنوات في منتدى آخر

قدمت للمنتدى كل ما تستطيع من جهد وتنظيم ودعم مالي

اتوقع ان تقدم لنا ما يوازي عقليتها الناضجة وخبرتها في النت والمنتديات ..

اقول لها اهديك كل حرف في هذه القصيدة

http://www.r0007.com/mycard/create.php?card_id=78


=======
الرئيسة //

تعرفت عليها بغرابيل وقدمت لغرابيل كل ما تستطيع من جهد وسهر ومتابعة ,

واريد ان اوجه لها كلمة // هدي اعصابك يام تركي ونحن بانتظار عودتك لقيادة المنتديات العامة

=========

وليف الهم //

تعرفت عليه من اربع سنوات , صديق مخلص وصادق , انا شخصيا لم اقدم لغرابيل ما قدمه وليف

كلمتي له // انت غالي غالي

========

خالد // الكل في الكل ,, يحب غرابيل اكثر مني :خجل: تعرفت عليه من اربع سنوات وكان علة وريد بس الحين تحسنت اخلاقه شوي ومعاد يناشبني كثير

كلمتي له // يشهد الله اني احبك

===========

محمد الدغيري // نعرفت عليه بمنتدى آخر وتفارقنا لمدة سنتين وفي احدى المحاورات بمنتدى اخر وجدت انه هو الوحيد الذي يقف بصفي وعندما علمت انه محمد الدغيري فرحت كثيرا فقد اشتقت له
قدم لغرابيل الكثير والكثير وهو من اكثر الاعضاء نشاطا في تقديم الدعوات كذلك في الدعم المالي

كلمتي له // جميلك على راسي يابوفيصل

=============

طيف نجد // تعرفت عليها بمنتدى التعليم وتهاوشنا هناك وبعدها قدمت لها الدعوة

كلمتي لها // منتدى الخواطر سيقفز قفزات كبيرة بوجودك ,, شدي حيلك

=========

سيف العز // اخ وصديق تعرفت عليه بغرابيل واتمنى مايكون زعل مني البارح لاني كنت صريح زيادة عن اللزوم

كلمتي له // تبقى غالي يادحووم

==========

سيف العلي // تعرفت عليه بغرتبيل

اقول له وينك ياسيف اشتقنا لك والله يوفقك في دراستك

===========

ابوجاسم // تعرفت عليه بغرابيل وياليتني ماتعرفت محد تعبني وطفشني وطفش الاعضاء كثره

اقول له // متى تخلص دراستك وترجع للديرة وتترك النت عنك

==========

ذهينه // ما اعرفها

========

محمد السبيعي // تعرفت عليه عندما كان يقوم بانشاء مشروع تعليمي وهو بمثابة استاذي واخي

كلمتي له // بقولها جوال

=========

ابوسيف // اخ لم اقابله حتى الان

تعرفت عليه بمنتدى اخر قبل ثلاث سنوات وله دور كبير في وصول غرابيل للقمة ولله الحمد
كلمتي له : لا تشغلك الدنيا عنا


==========

سهم المنايا // هنا ما اعرف اعبر صراحة
ولكن مفرح مناحي استاذي ,,,, استاذي الذي تعلمت على يديه الشعر وهو أخ لي لم تلده امي

============

حساسة // حساسة نور عيني وبس

============

النصاب // اول مرة تعرفت عليه بهوشة في قضية البنت الهاجرية اللي قتلت على يد سعوديين وهو فهمني غلط اكيد
طبعا الكلام ذا قديم قبل اربع سنوات

ولكن مع الايام اكتشفت ان هذا الانسان معدنه مثل الذهب واتحسف على كل يوم قضيته وانا ماتعرفت عليه

=============


ترتيبهم صعب والله

كلهم غالين على قلبي



ماهو اكبر خطأ اخطأته في حياتك.. وتتمنى لو يعود الزمان ولا تنفذه..او تنفذه بشكل اخر

اني وثقت في ناس مهم قد الثقة


ايهما اعلى في مراتب الاداره حساسه ام رهيبه

كلهم عينين في راس


لو خيرت... بين شخصين.. سهم المنايا والرهيبه.. ايهما تطرد من المنتدى؟!؟!

الله لا يجيب هاليوم

بطرد نفسي قبل الاثنين


وبعدين هم اصحاب البيت لهم فيه مثل مالي فيه




شنو سيارتك..

ومين من ربعك عنده احلى سياره..

وليه ما تشتري سياره زي الناس

سيارتي كامري موديل 2002 ذهبي

كل ربعي رايحين فيها سيارتي اطلق سيارة بالخرج

هات فلوس وانا اشتري ددسن غمارتين مكيف بعد


=========


سؤالي :



النصــــاب :
انت رائع وطيب القلب ولكن بك عيوب لا يعاني احد من نتائجها الا انت..

ممكن شرح مفصل لهذا السطر في ردك السابق ؟
م.عبدالله
14-03-2005, 01:45 AM
بس كذا


مسكين الله يانك طحت بواحد نشبه

المهم انا بطلع كل اللي بقلبي وبخليك تخر كل شي عندك


جوابي على سؤالك

انت يا سعد فيك اكثر من عيب وهم..

طيب زياده عن اللزوم

تحرج وتخجل بسرعه..

تجامل الناس على حسابك الشخصي..

تخدم على حساب صحتك..

وتعمل في المنتدى دون اجر الا زعل الناس منك على حساب اسرتك وعائلتك..

هذه هي عيوبك ولا يعاني منها الا انت واسرتك وكل من يحبك.. فصحتك متضرره وحياتك الاجتماعيه في تدهور بسبب زعل ناس كثيرين منك.. ومجاملاتك التي لا تنتهي لناس كثيرين.. تعود اليك بالضرر في النهايه بسبب خسارتك لناس تحبهم اكثر

اعتقد بانك فهمتني واعذرني على صراحتي

================================
نعود للأسئله

ماهي مستحقاتك الماليه الشهريه من مهنة التدريس وكم عليك من اقساط تسدد شهريا وكم يبقى لك لمعيشتك.. هل تملك اي عقار او اراضي..


هل احببت قبل الزواج.. وهل تؤمن بالزواج من اخرى..

ماهو طموحك للمستقبل هل ترى نفسك في مكان معين.. او تتمنى ان ترى نفسك في هذا المكان ام انك تمشي بجانب الحائط مستترا بالضغوط الدوليه والاجتماعيه مكتفيا بمكانتك الماليه والاجتماعيه..

لو عينت رئيسا على دوله عربيه ماهي اهمس خمسة قرارات تتخذها

نعود للمنتديات..

متى ترى بان الشخص يستحق الطرد بالفعل.. ومتى ترى بانه يستحق الرجوع..

كم شخص عملتله باند حتى الان وكم واحد بسبب النصاب..

اذكر موضوع تعرفك على النصاب لأني بصراحه ما اذكره خخخخخخخخخخخ ولو تجيب لقطات من الموضوع ابرك..

متى اخر مره رفعت اسيل فوق كتفيك ولعبت معها؟!؟

ماهو شعورك من ناحية البنات وهل ترى بان الاطفال البنات افضل من الاولاد ام انك لا ترى اي فرق..

هل تتمنى ان ترزق باطفال اخرين واي الجنسين تفضل ان يكونوا؟

جاوبهم على ما اجيك
أبوعبدالرحمن
14-03-2005, 09:42 PM
ماهي مستحقاتك الماليه الشهريه من مهنة التدريس وكم عليك من اقساط تسدد شهريا وكم يبقى لك لمعيشتك.. هل تملك اي عقار او اراضي..


مرتبي حوالي تسعة الالف وتنقص شيء بسيط ماني متاكد

الاقساط عشرة الالف :خجل:


هل احببت قبل الزواج.. وهل تؤمن بالزواج من اخرى..

ليه المشاكل :خجل:


ماهو طموحك للمستقبل هل ترى نفسك في مكان معين.. او تتمنى ان ترى نفسك في هذا المكان ام انك تمشي بجانب الحائط مستترا بالضغوط الدوليه والاجتماعيه مكتفيا بمكانتك الماليه والاجتماعيه..

الحمد لله على كل حال وانا طموحاتي بسيطه جدا ولا تتعدى اليوم الذي اعيش فيه


لو عينت رئيسا على دوله عربيه ماهي اهمس خمسة قرارات تتخذها

جاني الضغط من منتدى كيف لو صرت رئيس دوله


متى ترى بان الشخص يستحق الطرد بالفعل.. ومتى ترى بانه يستحق الرجوع..

يستحق الطرد عندما يكون مزعج لعضو آخر ,, هنا يطرد وبدون نقاش

أو عندما يتوقع أن المنتدى بيت رمل عند الخروج منه يجب ان يهدمه

ويستحق الرجوع عندما يقدم اعتذاره



كم شخص عملتله باند حتى الان

81 عضو حسب معلومات لوحة التحكم


وكم واحد بسبب النصاب

ثلاثة على ما اتوقع


اذكر موضوع تعرفك على النصاب لأني بصراحه ما اذكره خخخ ولو تجيب لقطات من الموضوع ابرك..

اذا ماتذكر ما فيه داعي ,, انت بتشتم وتمشي


متى اخر مره رفعت اسيل فوق كتفيك ولعبت معها؟!؟

يوم ولادة دحومي :خجل:


ماهو شعورك من ناحية البنات وهل ترى بان الاطفال البنات افضل من الاولاد ام انك لا ترى اي فرق..

صراحة يبان الفرق بينهم ليلة العيد او قبل اي مناسبة والولد ثوب بعشره ريال والبنت فستان بخمس مية وذهب وقلة حيا



هل تتمنى ان ترزق باطفال اخرين واي الجنسين تفضل ان يكونوا؟

اتمنى طبعا واللي يجي من الله حياه الله

=============


استلم يابونصب :


وش رايك بسم النصاب ؟

وما ودك تغيره ؟

هل انت نصاب حقاً ؟

ليه اي مشرف معك بالعام يطفش ويترك المنتدى كله ؟

وش رايك بحركتي فيك انا والرهيبة ؟ ووش كان شعورك بكل صدق ؟ وياليت تقول للاعضاء قصتك معنا ومقلبنا فيك

وش علاقتك بالجنس اللطيف ؟

ووش رايك بوسن ؟


جاوب يالله
مخاوف قلب
14-03-2005, 09:54 PM
هههاااااااااااااااااااااا اااااااااااااااااااااااي


نويصب وربي انك شي



اشوا من النايمين وليف والغريب



كملوا بس وينك ياعشق وين مدافعك وجهها عليه



انا ماني مع احد انا عليكم كلكم


خخخخخخخخخخخخخخخخ



صي يوووو
م.عبدالله
14-03-2005, 11:54 PM
استلم يابونصب :



هات ما عندك

وش رايك بسم النصاب ؟

النصاب اسم سلس وحلو لفظه وكمان يحمله شخص على الرغم من كونه مذنب الا انه دائما يصل الى غرضه عن طريق الحيله والذكاء على قولة المصريين الفهلوه.. وقد لا يحتفظ بالشيء الذي يريده انما يود اثبات مقدرته للحصول عليه فقط...



وما ودك تغيره ؟

ودي اغيره بس لي بالنت من اول ما حطوه.. ووهذا اسمي بالاضافه الى اسمي ايام المراهقه ( قبل لا ينزل بالسعوديه نت) شكو شكو

وبغيره طبعا اول ما اتخرج بخلي كل شي للنصاب للنصاب.. وبنشيء قاعده جديده من الايميلات والمواقع بأسمي الحقيقي لمارسة عملي..



هل انت نصاب حقاً ؟

انا لا اكذب الا فيما ندر...ولا اذكر اخر مره كذبت بها..ولكني اكذب.. وهذا واقع ..وكلمة النصاب هي كما اسلفت كلمه تطلق على الاذكياء..



ليه اي مشرف معك بالعام يطفش ويترك المنتدى كله ؟

لأني انا وياه نطفش وانا تمسكون فيني تقولون اجلس يا نصاب محلك لا نضربك على دميجتك.. والثاني يروح ويجي على راحته

مشتهي ادل على يوم واشتمكم كلكم علشان تشيلون مني الاشراف هههههههههههههههههه

اذا تبي تعرف... تعال امسك العام

وش رايك بحركتي فيك انا والرهيبة ؟ ووش كان شعورك بكل صدق ؟ وياليت تقول للاعضاء قصتك معنا ومقلبنا فيك


لالالالالالالالالالالالال الالالالالالالالالالالالا لالالا

كنت اتمنى انك ما تقولها..هذا طال عمركم سويت مقالب كثيره بكل اللي بالمنتدى خصوصا المشرفين.. وبيوم من الايام..سويت مقلب يمكن بالرهيبه وسكرت الكمبيوتر ورحت نمت وانا اضحك اقول هاع هاع هاع اليوم بينصدمون واجي اقولهم الحقيقه..

نمت وصحيت وجيت النت معاي البسكوت والشاي.. وافتح المنتدى ولا مكتوب تحت اسم الرهيبه باند؟!؟!
وعلى نفس الموضوع الرهيبه تتهم الاداره بعشق ليل انها تبي تطردها بس مكسوفين وانهم مخلين النصاب يقولها.. وهوشه عنيفه بين رهيبه وعشق ليل.. انا انصددددددددددددددددددمت

يا جماعه مزوح تجي وتروح ماكو فايده

ويدخل عشق ليل.. اقوله السلام عليكم وهو طايح سب بالرهيبه ههههههههههههههههههههههههه ه ( هذي ما قلتها للرهيبه الا اورطك يا سعد) وارسل رساله للرهيبه تعالي الماسنجر وتدخل وهذي تسبه وهذا يسبها وانا ابي اصلح بينهم وارجع ودي اقول لسعد ابي اترك المنتدى ان طلعت رهيبه.. وما اقدر هذا سعد حبيب قلبي المهم وربي اني دمعت

شوي ولا يضحكون

اكرررررررررررررهكم قفلت النت ورحت البيت معصب ووبس :(


وش علاقتك بالجنس اللطيف ؟

مثل علاقتي وياك بالضبط ههههههههههههههههههههههههه هه

والله لا علاقه ولا بطيخ بس اشاعات ما خلو وحده وما قالو اني احبها..خابرهم يطلعون اشاعات عالبنات مو عالشباب.. ولا انا من حطيت خلفيه وردي وهم ماخذين عني فكره ماش..




ووش رايك بوسن ؟


في عضوه كانت هنا اسمها كابتشينو.. هالعضوه ما اعرفها ولا بيني وبينها صراحه اي كلام بس كنت اموت على مواضيعها.. تكتب باسلوب بالصرقعه راااااااااائع وتخليك تضحك غصب... هالعضوه كتبت موضوع مره عن رحلتنا للبر انا وبنات المنتدى . موجود لو حبيتو تشوفونه..

من مجمل الموضوع كاتبه ان وسن معاهم وعهي صغيره وتقرى مجلة ميكي.. ومن يومها وانا اتخيلها صغيره جدا وتقرا مجلة ميكي هي تقولي عمي 38 وعندي عيال وانا مقتنع انها طفله خخخخخخخخخخخخخخخخ

وضعيفه ومسكينه تسمع الكلام تجيني تقول ابي احط نومينيه ومدري شنو والخ ومعصبه اقولها كلمتين تقتنع مو نفس رهيبه هواش انا وياه بالماسنجر ماسنجرها كله بيض وكلينكس ونعول قديمه من التحذف
================================================== ========

تعال يا روح ماما

منو من المنتدى شفتهم بعينك.. ومنو منهم شفته وزعلك.. ومنو منهم شفته وعلاقتك فيه زي علاقة الضفدع بالطياره..

شنو تسوي كل يوم ( روتينك)

كم طالب من طلبتك حافظ اسمه..

منو المدرسين اللي تكرههم ( اللي يدرسون اي تخصص)

كم مره حصلتلك مشكله بالمدرسه ( ان قلت مافي ذبحتك)

متى اخر مره ضربك ابوك وشو كان السبب..
تحب ابوك اكثر او امك..

كم تعطي مصروف لعيالك..

وش رايك بالمشرفين الجدد اللي تعينو من شهرين وجاي هل تراهم يأدون واجبهم على اتم وجه ام ترى نقص..

مشرف اعطيته الاشراف وندمت عليه

شخص دعوته للمنتدى وندمت ..

متى اخر مره زرت مخفر الشرطه وماهو السبب..

هل ترى بان الشجار بين الرجال مطلب ضروري لتوضيح نظريه.. او اثبات وجهة نظر..؟!

هل تجد في الشجار حل سريع لمشاكلك؟!؟

متى اخر مره اختلفت انت ومفرح وماهو السبب..؟!

لماذا حساسه في الاداره مسكينه وضعيفه ورهيبه مهاوشه كل البشر؟!

مخاوف قلب.. ماهو رأيك فيها وكيف تعرفت عليها وماهو سبب اشرافها وخروجها.. ومن صاحب التوصيه بتعيينها مشرفه؟!؟

السؤال الاخير..

اذكر المشكله اللي حصلت بيني وبينك وجيب نصوص الموضوع.. ولا تتهرب من اي سؤال ولا تسألني بأسئلتي

جاوب واجيك... هالكرسي ما تقوم منه الا اطلع كل شي بجعبتك
أبوعبدالرحمن
15-03-2005, 12:38 AM
اجل مثل علاقتك فيني ؟؟؟ طيب طيب


منو من المنتدى شفتهم بعينك.. ومنو منهم شفته وزعلك.. ومنو منهم شفته وعلاقتك فيه زي علاقة الضفدع بالطياره..

كثير مقدر اعددهم بس بقي فيصل


شنو تسوي كل يوم ( روتينك)

مدرسة + بيت + استراحة + نوم


كم طالب من طلبتك حافظ اسمه..

سبع سنوات تعليم وش احفظ ووش اخلي ؟


منو المدرسين اللي تكرههم ( اللي يدرسون اي تخصص)

مافيش


كم مره حصلتلك مشكله بالمدرسه ( ان قلت مافي ذبحتك)

مافيش


متى اخر مره ضربك ابوك وشو كان السبب..

قريب من سنه يمكن السبب ضربت دحومي :خجل:


تحب ابوك اكثر او امك..

كلهم


كم تعطي مصروف لعيالك..

ثلاث ريال


وش رايك بالمشرفين الجدد اللي تعينو من شهرين وجاي هل تراهم يأدون واجبهم على اتم وجه ام ترى نقص..

مهم مقصرين ابد


مشرف اعطيته الاشراف وندمت عليه

هجوووولة


شخص دعوته للمنتدى وندمت ..

مافيه ,, ماني زيك اقدم الدعوات واندم


متى اخر مره زرت مخفر الشرطه وماهو السبب..

هذا اللي عمري ما طبيته ابد


هل ترى بان الشجار بين الرجال مطلب ضروري لتوضيح نظريه.. او اثبات وجهة نظر..؟!


فتل عضلات


هل تجد في الشجار حل سريع لمشاكلك؟!؟

لا


متى اخر مره اختلفت انت ومفرح وماهو السبب..؟!

كل يوم نختلف


لماذا حساسه في الاداره مسكينه وضعيفه ورهيبه مهاوشه كل البشر؟!

لانهم يكملون بعض


مخاوف قلب.. ماهو رأيك فيها وكيف تعرفت عليها

تعرفت عليها عشر مرات كانت كل يوم تغير اسمها مرة شلة بنات ومرة زينب الشراري ومره ورده وكل مرة تعلقني حب وتتركني :خجل:


وماهو سبب اشرافها وخروجها.. ومن صاحب التوصيه بتعيينها مشرفه؟!؟

مخاوف مشرفة عامة بغرابيل وصلاحياتها مفتوحة

وهي الوحيدة اللي جت غرابيل مشرفه على طول كنا نرحب فيها وهي مشرفة






اذكر المشكله اللي حصلت بيني وبينك وجيب نصوص الموضوع.. ولا تتهرب من اي سؤال ولا تسألني بأسئلتي

والله مافيني شده اروح ادور لك الموضوع


========

استلم :

لماذا قررت انزال صورتك بالتوقيع ؟ وهل انت مقتنع بطريقة وقفتك في الصورة ؟


امتنع عن قول الاسم... ولكنها شخصيه ظننت بها خيرا واكتشفت بانها تنقل اخبارا كاذبة عني للناس في محاولة لتشويه سمعتي؟!؟

اعترف من هو الشخص ؟ ووجه له كلمه من هنا .

هل هناك شلليه في غرابيل ؟

وهل يوجد مجاملات ؟ حدد ان وجد .
م.عبدالله
15-03-2005, 01:48 PM
لماذا قررت انزال صورتك بالتوقيع ؟ وهل انت مقتنع بطريقة وقفتك في الصورة ؟




صورتي من زمان ودي انزلها... والسبب اني شوفتها لشخص بالمنتدى وقالي انا متوقعك دب واسمر ومعصب ومدري شنو.. فحبيت ان كل الاعضاء يشوفوني على طبيعتي.. علشان ما يحاولون تشكيل صوره خياليه بناء على الكتابه.. وطريقة الوقفه مو انا المصور قالي وقف كذا احلى شي وانا توني صاحي من النوم مدري وين الله قاطني.. واللي بهدل الصوره اكثر التصميم..الوردي


اعترف من هو الشخص ؟ ووجه له كلمه من هنا .

الشخص لن اقول اسمه .. لانني لا املك دليلا ضده وانما هو كلام وكلام.. وانا لا اصدق شيئا على احد ان لم اراه بعيني.. او اسمعه من شخص اثق به جدا..والرساله..

اولا.. انت اتفه من ان تنقل كلام عني..ورصيدي والحمدلله الثقه من الجميع..وكل بنات المنتدى بمثابة اخواتي.. خصوصا من يستحق منهن..اما انت.. فانت تافه.. تحاول ان تتحدث فيما تعلم وفيما لا تعلم..اتق الله..ولا تتكلم في اعراض الناس..ولا تغتب..

هل هناك شلليه في غرابيل ؟


نعم هنالك شلليه بعضها بحسن نيه وبعضها بسوء نيه.. واتمنى ان تندمج ويسهل الانضامام فيها حتى تتكون كتله من المنتدى باكمله ست الاف شخص فتكون اقوى وارقى..


وهل يوجد مجاملات ؟ حدد ان وجد

المجاملات كثيره خصوصا في قسم الاستقبال والمناسبات..وبعض المواضيع المنقوله ( بالنسبه للردود)

وهنالك بعض الاعضاء ( الشلليه على قولتك) يردون على مواضيع بعض لرفع ارصدتهم في المنتدى.. وهنالك بعض المشرفين يردون على مواضيع المشرفين على حساب بعض مواضيع الاعضاء .. وهنالك اشخاص غير محترمين... احترمهم تقديرا لأصدقائهم او اقربائهم في المنتدى :)


شوف منتهى الصراحه اجاوبك.. وانت تقول مفيش.. وكثير ماني معدد..

ياليت تجاوب زي الناس ولا انطق برا

انا بسألك كم سؤال واذا ما جاوبت بصراحه بيكونون اخر اسئلتي صراحه...

اولا شنو رأيك بوسن وليش سالتني عنها بالذات..

ثانيا.. الاعمار بيد الله وكلنا بنموت بس انت كيف متوقع انك تموت بحادث ولا مرض ولا كيف..

ثالثا
شنو احلى هديه اخذتها بحياتك سواء ماديه او معنويه ومن مين؟!

شنو نسبتك بالثانويه العامه.. واي قسم؟

شرايك بالسفر معي الى دبي بالصيف القادم؟!؟( تغيير جو)

بعدين بلنسبه للأسئله.. السابقه.. حطيتلك اسماء وقلتلك رتبهم حسب محبتك وما رتبتهم.. ارجوك ارجع جيبهم ورتبهم من فوق لتحت..



جاوبهم وباجيك وياليت الحكم حسحس او مخمخ تتدخل لصالحي وتخلي الطرف الاخر يجاوب زي الناس

خخخخخخخخخخخخخخخ

<< بايعها
أبوعبدالرحمن
15-03-2005, 10:09 PM
شكلك تنفخ هههههههههه

هد اعصابك وبوريك الصراحة اللي بتطير عقلك :خجل:


==========



اولا شنو رأيك بوسن وليش سالتني عنها بالذات..


سالتك لانك ماجبت اسمها مع الاسماء ..
وسن ملح المنتدى كله ومن اسباب بقائي في النت , مافي احد يحبني ويتابعني كثرها وهالقصيدة كتبتها فيها بمناسبة عيد ميلادها الــ ( 19 ) قبل عشرين سنه تقريباُ


العمر كله يا وسن فرح وسرور = نشعل لك الليلة شموع السعاده
اليوم كنّ البدر يضحك ومغرور = له حق يفرح ويتباهى زياده
تسعة عشر عامٍ تزينّك بالنور = ما كنّها إلا فوق صدرك قلاده
كل البشر تكبر مع الوقت بالدور = وأنتي كما طفلٍ يعانق مهاده
فيك البراءة والنقاء فيك مخبور = والصدق دايم تحت راسك وساده
لا من حكيتي وانكشف كل مستور = عرفت إن الله يميّز عباده
زينك لو إنه في الجرايد ومنشور = لا شك محدٍ ذاق لذة رقاده
( عبير ) هاتي للزمن روح وشعور = بإحساسك اللي ما يحب النكاده
يا ملح يا سكر على الناس منثور = أنتي الحلا وباقي الحور ساده
يا ( كبرياء القلب ) يا ( قمة الحور ) = لا ما انتظرنتي من قصيدي إشاده
مبروك عيدك قلت للعيد مشكور = لأنه يذكرني أجيه في معاده




ثانيا.. الاعمار بيد الله وكلنا بنموت بس انت كيف متوقع انك تموت بحادث ولا مرض ولا كيف..

بنجلط من اسئلتك


ثالثا
شنو احلى هديه اخذتها بحياتك سواء ماديه او معنويه ومن مين؟!
عطر من شخص غالي



شرايك بالسفر معي الى دبي بالصيف القادم؟!؟( تغيير جو)

OK
ومايرد الكريم إلا اللئيم


بعدين بلنسبه للأسئله.. السابقه.. حطيتلك اسماء وقلتلك رتبهم حسب محبتك وما رتبتهم.. ارجوك ارجع جيبهم ورتبهم من فوق لتحت..

لو تموت مارتبتهم


=======

استلم انت وخشتك

وش رايك بشخصية مخاوف ؟ ما تحس انها مهزوزة ؟

كيف تتوقع شكل حساسة ؟ حلوة ؟ شينه ؟ جنية ؟ نعّومه ؟

الرهيبة ماليه الدنيا وشاغله الناس ... تتوقع ليه ؟

وش شعورك يوم شفت محمد السبيعي بالكام ؟

تتوقع مفرح مناحي شخص سوي وذو عقليه متزنه ؟

وش رايك بابوعبدالله وقيادته الحكيمه للمنتدى ؟ وما تحس انه شايب ؟

منت خايف يصيبك السرطان مثل احمد زكي من كثر الدعاوي عليك في صلاة الجمعة ؟

انا حلمت ان الطيارة بتطيح فيك اذا جيت راجع للكويت ومعك شهادة التخرج وكل اللي بالطيارة بيموتون إلا انت بتدخل غيبوبه مدى الحياة ,,, تتوقع يتحقق حلمي ؟

تحبني ؟ واذا لا لازم تقول ليه ؟. واذا الجواب نعم مافي داعي تقول لان الناس كلها تحبني :خجل:
خــــالـــــد
16-03-2005, 12:26 AM
أنا نشبة ؟؟؟؟؟؟؟؟؟؟؟؟؟؟؟؟؟؟؟

زين يا سعيداااااااااااااااااان

بتشووف إذا ما نشبت لك .... ههههههههههههااااي

إذا كا خليتك تبيع غراابيل , علي بـ 10 رياال

ما أكون خالد
م.عبدالله
16-03-2005, 01:50 AM
استلم انت وخشتك

هات

وش رايك بشخصية مخاوف ؟ ما تحس انها مهزوزة ؟

مخاوف قلب انسانه رائعه وطيوبه جدا.. ومصرقعه رائعه واحس انها تعاني كثير بحياتها بس تكتم بقلبها وتغطي على هالشي بضحكتها الحلوه << ابسطي مخاوف


كيف تتوقع شكل حساسة ؟ حلوة ؟ شينه ؟ جنية ؟ نعّومه ؟

حساسه همممممممممم اهم شي الاخلاق ههههههههههههههههههههههههه هههههههه
بس اتخيل نعومه لانها تكتب وردي دايما ..

الرهيبة ماليه الدنيا وشاغله الناس ... تتوقع ليه ؟

الرهيبه انسانه مريضه نفسيا ومحصوره اجتماعيا عقلها عقل رجال وجسمها جسم انثى وتحاول تطلع من هالجسم بسبب ديننا السمح الي يعطل قليلا من تعاطيها مع الرجال خصوصا وانها لا تستطيع التفاهم مع النساء لاختلاف عقلياتهم لذلك تجدها في الانترنت دائما تبحث عن مصارعة الرجال.. وما اتوقع اشوفها مرقمه بنت بيوم من الايام ههههههههههههههههههههه


وش شعورك يوم شفت محمد السبيعي بالكام ؟

يا ولد حلو.. قطعه... اول واحد شكله يفتح النفس من الاداره ههههههههههههههههههههههههه ههههههههههههههههههههههههه ههههههههههههههههههههههههه ههههههههههههههههههههههههه ههههههههههههه



تتوقع مفرح مناحي شخص سوي وذو عقليه متزنه ؟

واللهي اذا هو خويك... والطيور تقع على اشكالها.. انت وش رأيك؟!؟


وش رايك بابوعبدالله وقيادته الحكيمه للمنتدى ؟ وما تحس انه شايب ؟

ابو عبدالله رهيب ياخي واحبه مدري ليه هو وابو سيف اللي غادرنا.. احس انهم طيبين .. ومن ناحية شايب شايب.. ما عمري شفته ذب نكته ( ذب هذي مالت وه يا ملحي) وبعدين صارتلي مره نشبه معاه تهورت ونقلت له موضوع وارسلتله رساله قلتله هذا مو مكانه وبغيت انطرد من جمهورية مصر العربيه كلها مو بس المنتدى بس الله ستر


منت خايف يصيبك السرطان مثل احمد زكي من كثر الدعاوي عليك في صلاة الجمعة ؟

والله اللي يجي من الله حياه الله وانا مؤمن بالقضاء والقدر واذا انت انجلطت وش اسوي بالدنيا من بعدك يا بتعه

انا حلمت ان الطيارة بتطيح فيك اذا جيت راجع للكويت ومعك شهادة التخرج وكل اللي بالطيارة بيموتون إلا انت بتدخل غيبوبه مدى الحياة ,,, تتوقع يتحقق حلمي ؟

انت كل يوم تحلم انك مليونير لو تحققت احلامك بيتحقق هالحلم.. وعالعموم زيادة تأكيد بروح بر عن طريق المملكه وبالمره ناخذلنا عمره بس متى ارجججججججججججع بس


تحبني ؟ واذا لا لازم تقول ليه ؟. واذا الجواب نعم مافي داعي تقول لان الناس كلها تحبني

اموت عليك...( افهمها متل ما بدك)

=====================================

استلم

شنو هواياتك وشنو تعرف عن الكيرم والبلي ستيشن.. والبلوت ما تموت.. خخخخخخخخخ

شنو وجباتك المفضله وشنهي الوجبه اللي تروح للوالده تقولها سويها لفشل ام عبدالرحمن ( وغالب نساء اليوم) ةفي طبخها..

شنو رأيك انت بالرهيبه .. اقصد بنت مطوعه وخبله ومصرقعه ومو صاحيه مره شاعره ومره راعية بسطه مره تحس ومره مدب لو نغزتها بسيف ما درت عنك؟!


بما انك فتحت موضوع الشوف وتوقع البنات حلوات او لأ بعطيك شوية اسماء وابيك توصفهم بحسب كتاباتهم

حساسه

رهيبه

وسن

طيف نجد

شمى

وه يا ملحي

مخاوف

سود العيون ( الله يرجعها بالسلامه)

كيلوبترا

اختها القطوه

حذامي

عذاب ( الله يعينها)

الحنونه

غناتي

خخخخخخخخخخخخخخخ ابي وصف كامل ودقيق حسب خيالك خل نشوف كم وحده تجيبها صح..

وسؤالي الاخير لهذا اليوم..

عمرك رقمت بنت في الانترنت او حبيتها!؟

جاوب على ما اجيك
أبوعبدالرحمن
16-03-2005, 10:35 AM
شنو هواياتك وشنو تعرف عن الكيرم والبلي ستيشن.. والبلوت ما تموت.. خخخخخخخخخ
زمان كرة القدم والرسم
الان خلاص مافي هوايات


شنو وجباتك المفضله

الفول


شنو رأيك انت بالرهيبه .. اقصد بنت مطوعه وخبله ومصرقعه ومو صاحيه مره شاعره ومره راعية بسطه مره تحس ومره مدب لو نغزتها بسيف ما درت عنك؟!

شهادتي في امل مجروحة جمعت العقل والطيبة والحكمة وخفة الدم والشعر

بنت كامله والكامل وجهه سبحانه وتعالى




خل العواذل تنقهـر منـك وتمـوت =لو قالوا ... وقالوا ... وظلوا يقولون



لك حرف غطى من جماله على التوت=ولك رأي ثابت في المواقف وموزون


كن الخلايق صابابها صمت وسكـوت=لا من كتبتـي مالهـم غيـر يقـرون



مثل الطيور إذا غدت تطلـب القـوت=جميع الأعضاء صوب حرفك يطيرون


أنتي حكاية حرف من أصـل ياقـوت=وأنتي الزمرد والذهب منـك مغبـون


بما انك فتحت موضوع الشوف وتوقع البنات حلوات او لأ بعطيك شوية اسماء وابيك توصفهم بحسب كتاباتهم


حساسه
ميرنا << هذي متأكد منها


رهيبه
باسكال


وسن
وسن خليفه


طيف نجد
زهره الخرجي


شمى

زينب العسكري



وه يا ملحي
الشاعرة / مليحة


مخاوف

لطيفه المجرن


سود العيون ( الله يرجعها بالسلامه)
هند رستم


كيلوبترا
سحر رامي


اختها القطوه
عُلا رامي


حذامي
رجاء الجداوي


عذاب ( الله يعينها)
روح شوف صورتها بمنتدى الصور


الحنونه
عتاب


غناتي

اريام


عمرك رقمت بنت في الانترنت

كثير


او حبيتها!؟
الملهمه وحده بس :خجل:


قالوا تحب وقلت وشلون مااحب=الحب اشمه مثل عطر النسايم

كنت احسب إن الحب مايدخل القلب = واثرك دخلت بقلب مغرم وهايم


============

استلم يابونصب :


من اكثر البنات ذكاء بالمنتدى ؟


من أقوى قلم نسائي بالمنتدى ؟

لكل عضو بالمنتدى مجال يبدع فيه , وش ابدعت فيه انت ؟

من اطيب قلب في غرابيل ؟

وش علاقتك بالأسماء التالية :

مخاوف

الرهيبة

سود العيون

حساسة


هل سبق وان انظردت من المحاضرة ؟ ووش السبب ؟

اذا سرحت بخيالك , من يطري على بالك ؟

إذا جيت تاكل كشري وتذكرت ان اهلك متجمعين على مكبوس ويسولفون ويضحكون وش يكون شعورك ؟ << انا مريت بهالموقف


أنت كريم ؟

طلعتنا لدبي من بيدفع تكاليفها ؟

من ترشح ينوب عني في المنتدى اذا سافرت على حسابك لدبي ؟

اقدر أخذ مفرح معي في سفرتنا ؟ او تبي تنفرد فيني ؟ :خجل:


جاوب يلاا
م.عبدالله
16-03-2005, 09:58 PM
استلم يابونصب :


هات


من اكثر البنات ذكاء بالمنتدى ؟

حسااااااااااااااااااااااا اااااااااااااسه بلوه مسيحه اشك ان فيها عرج مصري


من أقوى قلم نسائي بالمنتدى ؟

امل عبدالعزيز( مو ملاحظ صارت الاسئله كلها عليها

لكل عضو بالمنتدى مجال يبدع فيه , وش ابدعت فيه انت ؟

اييييييييييييييه جيت عالجرح..

انا ميولي واكثر شي اعرفه محاورة المسيحيين..ودعوتهم للأسلام... وفي محاورتي ما استخدم ايات قرآنيه او احاديث استخدم المنطق والعقل..وفي المنتدى طبعا مافي مسيحيين.. ولكن في ناس عقولهم تحتاج الى تصليح ( وليس تصحيح) اذ انهم يتميزون بأفكار غريبه.. .

انا لست كاتبا متميزا في الشعر.. لست شاعرا..
ولست متميزا في التصميم والصور..

ولست متميزا في نقل الاخبار..

ولست متميزا في كتابة الخواطر..

ولست متميزا في الكمبيوتر والبرامج والهواتف.

ولست متميزا في المحاوره والنقاش..

كل اقسام المنتدى لست متميزا في اي شيء بها وان كانت اقسام تطغى على اقسام مثل الخواطر والعام على الشعر والتصاميم وغيرها..

ولكني اعرف القليل عن الكثير.. اي انني احاول محاولات شعريه.. واحاول بالخواطر.. واحاور في العام.. واحاول في البرامج والتلفونات وغيره..ولكني لست متميزا في مجال واحد.. ولو كان التعيين في المنتدى على اساس الاكثر خبره لكنت مشرفا على قسم الكمبيوتر .. ولا انت شرايك خخخخخخخخخخ



من اطيب قلب في غرابيل ؟

حساسه..

وش علاقتك بالأسماء التالية :

مخاوف

داجه ومو صاحيه احس ان شخصيتها قريبه من شخصيتي..

الرهيبة

داجه ومو صاحيه ايضا.. بس الحمدلله اني ماني زيها..( الله يشفيها)

سود العيون

مشتاقين لها ولقلمها الجميل..اتمتع بأي خاطره تكتبها.. سواء هي او ناصر العبدالله

حساسة
..
احترمها بطريقه ما تتصورها..

هل سبق وان انظردت من المحاضرة ؟ ووش السبب ؟

كثيييييييييير.. اكثر وحده اثرت... رحت عالمحاضره متأخر وما كان معاي لا ساعه ولا جوال..وانا من النوع اللي ما ادر الوقت يعني الساعه 12 بالليل زي الساعه 3 الفجر .. سألت واحد جالس بره كم الساعه قالي وحده وربع..والمحاضره تبدأ وحده.. فطقيت الباب ودخلت السلام عليكم وعليكم السلام... نعم يا ابني.. يا دكتور انا مع الدفعه دي ( اول مره يشوف وجهي) طيب انت مع السكشن الثالث ولا الرابع... قلتله الثالث.. قال طيب ساعتك كام.. قلتله وحده وربع... قال وحده وربع طيب اطلع بره

انا انصدمت..

معقوله كل هذا على ربع ساعه؟!

رجعت لنفس الشخص اللي سألته قلتله كم الساعه.. قال انت بتستعبط ولا ايه.. قلتله لأ بس انا انطردت من المحاضره والسبب انت شكلك ساعتك مهويه.. قام طلع جواله ولا الساعه 2 وربع يعني متأخر عن المحاضره ساعه وربع وهي المحاضره كلها ساعه ونص خخخخخخخخخخخخ

وظل الدكتور حاقد علي سنتين ليما جبتله اللي فيه النصيب ومشاني خخخخخ



اذا سرحت بخيالك , من يطري على بالك ؟

اخواني الصغار بالكويت وعيال اختي..

إذا جيت تاكل كشري وتذكرت ان اهلك متجمعين على مكبوس ويسولفون ويضحكون وش يكون شعورك ؟ << انا مريت بهالموقف

والله عادي.. اولا انا ما اكل كشري.. وهنا في كل الاكل بس مشوار بعيد مالي خلق اتعنى لجامعة الدول علشان اكل من حضرموت او السمار.. او ريدان رشوش ولحم صغار وشاي عدني خخخخخخخخ.. بس اشتهي اكلات كثيره تسويها الوالده ووجبتي المفضله اللي اشتهيها دايما ( الفقع)


أنت كريم ؟

جدا..

طلعتنا لدبي من بيدفع تكاليفها ؟

انت : )

من ترشح ينوب عني في المنتدى اذا سافرت على حسابك لدبي ؟

حسابك ...مو حسابي.. ما تشوفني سألتك عن مرتبك قبلها هههههههههههههه... محد ينوب عنك نخليه يحترق هههههههههه

اقدر أخذ مفرح معي في سفرتنا ؟ او تبي تنفرد فيني ؟

مفرح يروح قبلك.. ولو تجيبون سياره كبيره نجمع باقي الشباب خالد وناصر وسيف والهمام نسوي حفله




انا اكتفي بهذا القدر من الاسئله ولا انت وش رايك سعد؟!
أبوعبدالرحمن
16-03-2005, 10:29 PM
الله يعطيك العافية يابونصب

واستمتعت معك ومع اسالتك



الوعد دبي إن شاء الله

وعلى حسابك
م.عبدالله
18-03-2005, 01:11 PM
حسابك انت

يعطيك العافيه احسك كنت مستحي اول شي لما بديت تكثر الاسئله بطلت خخخخخخخخخخخخخخخ


وين اللي ورانا يجلسون..

الحين اظن خلص كرسي الاعتراف بكره حسحس تخترع اختراع جديد وترجع تجلسنا ههههههههههههههههه

يا بنت ترانا شيبنا على الكراسي.. نبي مطارح
روعــة
19-03-2005, 01:38 AM
يا بنت ترانا شيبنا على الكراسي.. نبي مطارح

ههههههههههههههههههههههههه ههههههههههههههههههههههههه ههههههههههههههههههههههههه ههههههههههههههههههههههههه ههههههههههههههههههههههههه ههههههههههههههههههههههههه ههههههههههههههههههههههههه ههه


خلاص انتظركم على منتدى البلوتوث
شعاع الحزن
19-03-2005, 02:17 PM
انا اكتشفت من هالكرسي ان ابو عبد الرحمن شخص متزن وعقله كبير

ونصابووو كمان بس يحب الفرفشه والهيصه اكثر ...

صح تحليلي او غلط ؟؟؟
المملوووحة
19-03-2005, 02:30 PM
ابو عبد الرحمن

ابو نصب


والله استمتعناااا بهالجمعه والردود اللي زي العسل


وش حلاااااتكم

موفقين


بس ملحوظه

ترا ما اشبه مليحه اشبه فطومه<< بس لاحد يدري خخخخخخخخخ


تحياتي

,,المملووووووووووووحه,,
الأميرة الناعمة
19-03-2005, 02:33 PM
نصابيكو

و ابو عبدالرحمن

بصراحة استمتعنا بمحاورتكم الرائعة

و بما ان يالله لك الحمد مافي احد نزل موضوع كرسي الاعتراف

بنعطيكم اجازة اسبوع

:ندو: