دعاء وآيه احنا متهاونين فيها والبعض يجهل فضلهـــــــــــــــــــــ ـا

[أسواق]

بسم الله الرحمن الرحيم


السلام عليكم ورحمة الله وبركاته


طبعا حبيت اقولكم فضل دعاء وآيه نستهين فيها او البعض يجهلها ويجهل فضلها


طبعا الآيه هي (( قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شي قدير))


والدعاء هو (( اللهم اني استودعتك .......... وتقولين حاجتك ......... فاحفظها بحفظك ))
طبعا الصيغه هذي في الدعاء انا اقولها انتي تجيبينها بأي طريقه عادي المهم في الموضوع انك تستودعي الله كل مالديكي في هذه الدنيا
(( والله خير حافظا ))



طبعا راح اقولكم قصص صارتلي قريب وبفضل من الله ثم الهامه لي بأن اقول هذا الدعاء الحمد لله وجدت ضالتي


1/ طبعا القصة هذي صارتلي في عيد الفطر .. كنت في السوق انا واختي وكان عندي تعليقه وخاتم ذهب كانت مع اختي وبعدها اختي قالتلي خذي اشيائك وطبعا انا كنت شايله اكياس كثير واغراض فسبحان الذي الهمني اني استودعه ذهبي فاستودعته الله وكانت يدي مليانه زي ماقلت بالاغراض وكنت ناويه احطها في الشنطة لكن مع الدوشة والاشياه رميتها في كيس من الاكياس اللي كنت شايلتها ورجعنا البيت طبعا انا ماقلت لاختي اني حطيتها في الكيس واختي ماتدري فقعدنا نقيس الملابس بعضها طلعت واسعه اختي قالت خلاص ابوديها للخياط يقصرها وسبحان الله ماجات عينها الا ع الكيس اللي حطيت فيه الذهب وانا مانتبهت لها انها بتاخذه ولاعلمتها ان الذهب فيه وهي على طول اخذته على بالها فاضي لانه لو فيه لبس كان بين بس الذهب حجمه صغير فمالفت انتباهها المهم حطت الملابس وودتها للخياط ولين رجعت وقعدنا وسولفنا الا واتذكر الذهب واقوم واقلب في الاغراض والاكياس وماخليت احد في البيت الا وسألته وكنت مقهورة اكثر شي ع الخاتم لانه هديه من اخوي وبعدها خلاص فقدت الامل بعد شوي الا واتذكر الكيس وسألت اختي قالت وديته للخياط بعدها قلت اجل راح الذهب وقعدنا يمكن يومين وامي تقول روحو للخياط يمكن يطلع ولد حلال ويردها وانا فاقده الامل ومو راضيه اروح لين اليوم الثالث قلت خليني اروح واسأل مو خسرانه شي يعني نفسيا اتقبلت الفكرة انها تكون ضاعت فلو انكر مارح يتغير شي ولو لقيتها احمد ربي واشكر فضله
وفعلا رحنا وكنت وانا في الطريق اردد اللهم اني استودعتك ذهبي فاحفظه لي ورده الي ودخلنا للخياط مجرد ماسألناه كأنه كان مستنينا ع طول طلعه من العلبه وعطانا ياها فحمدت الله وكنت ابتشقق من الفرحد (( والله خير حافظا ))


2/ قبل سنتين تقريبا نفس الشي في السوق كان يوم اثنين على مااظن او خميس المهم اللي اذكره اني كنت صايمه اذن المغرب فقعدنا انا واختي نفطر وحطيت المحفظه حقتي جنبي ع الكرسي وكان فيها جوالاتي اثنين وفلوس تقريبا مبلغ فوق الالف وكان فيها اشياء ثانيه بس هذي المهمه
المهم بعد ما افطرنا اخذنا اغراضنا وقمنا ونسيت المحفظه ع الكرسي ورحنا ونلف في السوق فجأة تذكرت المحفظه وبغيت انجن وادور بالاكياس واسأل اختي قالت ماشفتها قلت مافي الا اني ارجع نفس المكان اللي كنا قاعدين فيه وكنت اقول بالعقل مارح القاها يعني مين حيشوف محفظه طايحه ويسيبها لكن اتوكلت على الله ورحت وانا ماشيه كنت اردد الايه (( قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شي قدير )) وكنت اقول ياربي انت تعلم ان كل مافي المحفظه مال حلال ياربي تردلي محفظتي وارددها لين وصلت لنفس الكرسي اللي كنت قاعده عليه الا لقيت حرمتين قاعدين وحده كبيرة وبنت شابه فكان باين علي اني مفجوعه وكنت ادور ورى الكرسي واقلب في الاوراق اللي ع الارض لعلها طاحت وغطتها الاوراق وماحد انتبه الا شافتني البنت وسألتني اش تدوري قلت محفظتي ضايعه كنت قاعده ع الكرسي هذا ونسيتها وقمت الا وهي تطلعها وقالت هذي هي والله والله من فرحتي قلتلها شكرا الله يسعدك وكنت اتلعثم بالكلام مادري كيف اشكرها وحمدت ربي سبحانه (( والله خير حافظا ))



طبعا والقصص والله كثيرة بس ماتحضرني الحين ولو اكتبها مارح تخلص
لكن المختصر اللي ابيه يوصل اننا مارح نخسر شي كلمه مارح تكلفنا شي ولاراح تعطلنا وتاخذ من وقتنا لكن مفعولها عجيب وكثير منا يجهلها او يستهين فيها



طبعا هذا غير انك تستودعين الاشخاص الغاليين عليكي
زوجك .. ابنك .. بنتك .. او حتى .. بيتك .. مالك .. نفسك .. وأي شي لانه (( الله خير حافظا ))


تستودعين الله دينهم وامانتهم وخواتيم اعمالهم كل يوم وهم رايحين المدارس او الدوامات او سفريات او حتى السوبر ماركت اللي تحت بيتك وراح ترتاحي بعدها ومارح تشيلي هم لانه (( الله خير حافظا ))



اخيرا اخواتي الغاليات اتمنى اني ما اكون طولت عليكم واعذروني وسامحوني


وجزاكم الله خير الجزاء
ولاتنسوني من دعواتكم فوالله اني احتاجها جدا
وصلى الله على سيدنا محمد وعلى اله وصحبه وسلم