أحلى ورق عنب جربيها و ما راح تندمين ...

[حواء غرابيل]

السلام عليكم

اليوم قلت لزم انزل طريقة ورق العنب ألي ياكلها لمن أسويها لزم ياخذ مني الطريقه و يطبقها و تكون طريقته المعتاده على طول ...


المقادير:
غرشة ورق عنب العلالي ترى في نوعين اخذي ألي ورقتها ملزوقه على الغرشه زرقه مو الصفره...

المقادير:
3 بصل متوسط الحجم مفروم
3 حبات طمام مفروم
كزبره و نعناع و شبت و بقدونش مفروم ( من كل نوع قبضه يد )
فصين ثوم مدقوقين
2 ملعقة طعام معجون طماط
رشة ملح و فلفل اسود
ربع ملعقه صغيره قرفه بودره
ربع ملعقه صغيره بزار وربع ملعقه صغيره كركم و ربع ملعقه صغيره ملح ليمون
وربع ملعقه بهارات التندوري
مكعب ماجي مهروس
كوبين عيش صنوايت ( هذا احلى عيش للمحشي ) و لا غيره ما راح يطلع حلو سمعيها مني و شوفي ...
عصير ليمونتين...

طبعا اول شي غسلي العيش عدل و تقعيه لمدة نص ساعه و عقب خلطي جميع المقادير مع البعض من دون طبخ ... يعني حشي فيه العيش و اهوه مو مطبوخ..
و أبتدي لفي الورق العنب عقب ما تغسلينه عدل من الغبار..

نيي للصلصله ألي راح تحطينها على الورق عنب عشان ينطبخ:
في الخلاط المولينكس تحطين ( قبضة يد اوراق نعناع و عصير 4 ليمونات كبار و 3 ملاعق طعام صلصة طمام و فصين ثوم و 3 ملاعق دبس الرمان ) و رشة ملح و فلفل اسود و ملح ليمون و ملعقه صغيره شكر ... و صبي الخلطه على الورق عنب في الجدر و زيديه ماي يعني خلي الماي بمستوى الورق عنب و عقب صبي عليه نص كوب زيت الزيتون...

و في قاع الجدر حطي بطاطس و بين الطبقات حطي بصل شرايح و حطي على الورق عنب تقل و غطي الجدر بورق الألمنيوم و اول 20 دقيقه خليه نار شوي عاليه عقب كلش وطي على النار و خليه يطبخ على نار هاديه لمدة ساتين و نص...
و لا تكشفين الجدر و اهوه حار خلي يبرد على راحه لأنه أذا كشفتي الجدر و اهوه حار راح يصير لونه أسود...

و جربي و شوفي الطعم...
و راح تدعين لي...