XX تحدي الطواريق XX

[خالد السهلي]

السلام عليكم ورحمة الله وبركاته
صبحكم الله ومساكم بالخير جميع
ودنا نتبادل الفايدة والمعرفة والطواريق مع من يهتوون الطروق العسرة او الجديدة
والمقصد تسلي وفايدة والله يحيي الجميع والطواريق هذي من الترف الشعري وكم شاعر كبير ماتعود عليها والعتب مرفوع

أبدأ بالبيتين التاليين وسبق قبل سنوات ان طرحتها بإسم مستعار في منتدى آخر

من يجي مرحبا واللي يروح ِ يْسمحِ الله دربهُ ولا يصادف ما يعوقه=من يريد العلوم الطيبه يتعب لها رجليه والنور جلاي الظلامي
لا يخاويني الا شاعرا يفهم معان الشعْر وسلومهِ وْيحكم طروقه =ياعسى صومكم مقبول ياشعار وابارك بالاعياد قدام الزحامي

نرجو تشكيل الأبيات بالحروف ولايحق لأحد طرح طرق جديد إلا بعد الرد ببيتين ويطرح طرقه في بيتين مشكلة الكلمات المهمة بالحروف
تحياتي لكمن جميعا

ملاحظة لفظ الجلالة في الشطر الأول غير ممدود يعني مهوب اللاه

[محمد بن ضاوي]

وعليكم السلام ورحمة الله وبركاته


مرحبا ياخالد


موضوع حقيقه اكثر من رائع وراح اكون احد رواده بإذن الله لأني بحاول استفيد منه بقدر المستطاع واكشف على لياقتي الشعريه :)


بس ياخالد كان بديت ببيتين مقبلات هههههههه انت ماشالله جايب بيتين دسماااااات بالحيل هههه

ولكن ان قاله الله معك معك :)

بانتظار بقية شعارنا ...

[محمد بن ضاوي]

من يجي مرحبا واللي يروح ِ يْسمحِ الله دربهُ ولا يصادف ما يعوقه
من يريد العلوم الطيبه يتعب لها رجليه والنور جلاي الظلامي
لا يخاويني الا شاعرا يفهم معان الشعْر وسلومهِ وْيحكم طروقه
ياعسى صومكم مقبول ياشعار وابارك بالاعياد قدام الزحامي


وش هالبيتين يابو غنام؟؟ هههههههه دفيكلت على ماقالو الانقليزيين لكن علاها معونتن بالله ههههه


استلم مشاركتي في مجاراتها وعساني حول القده




البقا بك يابوغنام وانت القاف لاجا منك نطرب له وكلن وذوقه=العلوم الثمينه ماتهيا لْكلّ من عاش الحياة احلام وجوه عسامي
جاك شاعر ليا منّه حضر يِعْرف حضوره منْهِ وليا غاب ماطاح سوقه=مار لا عيّد بشهر الصيام ويتعب المفتين في فتواي وغيري صيامي



على فكره يابو غنام لو طلع فيه مافيه ترى بعيد الكره ولن استسلم ههههه


لكن تبي الصدق فعلا محتاجين مثل هالموضوع لنختبر قدراتنا الشعريه ولزيادة اللياقه الشعريه بعد :)

وانا على يقين انه من خلال هالمتصفح راح تنولد طواريق جديده ماسبق ان غني عليها وشعراء غرابيل فيهم الخير والبركه

[خالد السهلي]

يامرحبا والله ملايين يابوضاوي
ابرك الساعات

الشطر الأول ممكن ينوزن صح على قراءة وممكن يكون مثل بقية الأشطر

انحرفت عجلات القطار عن سكته قليلا رغم أني خابرك متمكن جدا

أعد الكرة كماوعدتني وحياك الله
انت بالبيتين أعطيتنا طرق عسر آخر يختلف شي بسيط

[محمد بن ضاوي]

8
8
كلام صحيح يابو غنام

بعد التدقيق شفت اني جايب طرق ثاني ولكن اهم شي انه موزون هههههه


وهذي المحاوله الثانيه وانشالله تكون حسب الطلب واذا ماجت تراه طرق جديد بعد ههههههههه


البقا بك يابوغنام وانت القاف لاجا منك نطرب له وكلن وذوقه=العلوم الثمينه ماتهيا لْكلّ من عاش الحياة بْحلومه في المنامي
جاك شاعر ليا منّه حضر يِعْرف حضوره منْهِ ون غاب لا ماطاح سوقه=مار لا عيّد بشهر الصيام ويتعب المفتين في عيدي وغيري صيامي

[خالد السهلي]

هالله الله

صح لساااانك

جبته جبته

الحين عندك والله يعيين

[محمد بن ضاوي]

الحين عندك والله يعيين


انا ببدا بالاسلحه الخفيفه والرشاشه

ماني مسوي مثلك اول مابديت ضربتنا بالنووي ماتلقى ماتطلبنا هههههههههههههههههههه



استلمو استلمو ياشعار غرابيل ....



يامن يجاريني ابّيت ولاّ=بيتين لكنْ ماتاصل ثلاثه
تمرين شعري ومنْهِ نْتسلاّ=ويمكن نوضّح معاني الحداثه

[خالد السهلي]

الله الله



ماكان قصدي عليك اتبلا=ماني من اهل العيا والغثاثة
لاوالله الا ولاوالله الا=حصلت لك ياابن ضاوي معاثة

[محمد بن ضاوي]

ممتاز الممتاز ياخالد


بس وش معنى كلمة معاثة؟ هل هي رفع الصوت بالتغني او شي من هالنوع؟ ولا غيره؟


ننتظرك يابو غنام

وبعدين وين شعارنا عن المشاركه؟؟؟


لازم كلن يجي يفحص ويجدد ههههههههههههههههههههههههه هههههه

[خالد السهلي]

ارحب

عاث يعيث في معاثة


ملك ملوك افريقيا طيحه ملك ملوك الملوك=زلزل عظيم العرش عرشه على فرشه وصف اربعه
راس الزناديق السفيه الحقيرولابكفره شكوك=انحاش صفر يدين من منزله ومجربعٍ جربعه

[أبوعبدالرحمن]

يعطيك العافيه ياخالد

أمتعتنا باختيارك لهذا الموضوع الذي من خلاله ستعم الفائده على مرتاديه

وسأكون متابع له بشكل مستمر


واستلم مشاركتي على الطاروق الاخير



إن قاله الله تاتشوفونه مربط بوسط الشبوك=ماهو تفرّح لكن الظالمين قلوبهم مطبعه

ماعاد يملك امر نفسه ولو كثرت بيديه الصكوك=قنع من الدنيا ويبغى السلامه وحْدَها تشبعه

[خالد السهلي]

ابوعبدالرحمن
صح الله لسانك ملايين
لله درك
هالحين عطنا طرق من عندك ان تيسر

[شمال شرقي]

صبّحك الله بالخير يالضاوي اسمحلي بمداخله مع خالد فالبيت الأول اهداء لكم الاثنين ونطلب من الله

أن ينال اعجابكم البيت الثاني ,,,

بخصوص الطرق لا أعلـــّـــق عليه حاليـــّـــا , أمـــّـــا الاحتياطات التي كان عليّ الأخذ بها فهي كأي

احتياطات (سوّاق) أو بمعنى آخر (طاره) , يعبر له على طرقه جديده , واستلم يا خالــد :


هقوتي مع جنبها والنجم يتعـــلا ّ بــَـاسباب زرع(ن) عــَلــَــي ّ اِ جـْـــتثاثه

القاع وســْــطه بذرة (ن) ماتخلّى عسى الأمـر ما به دبرة (ن) للغثاثـــــــه

[عبدالرحمن الحميدي]

موضوع ممتع وجميل جداً
ولا فيك حيله يا خالد صح
لسانك وألسنة ابو عبدالرحمن
وابن ضاوي يشهد الله كلكم مبدعين وعاجز
عن مجاراتكم.

[الممرض]

الله الله وووووووافين .. وننتظر طرق جديد لمجاراتة معكم

[خالد السهلي]

لاهنتوا جميع على المشاركة وبيض الله وجيهكم

هذا تغيير بسيط في طرق معروف

واروحي اللي غدت لامنٍّ وْلاسوم واروحي=لانيب حيٍّ بها وْ ولاميتٍ مرتاح في قبري
ستة عوام ايتلاعب بي الهوى من غير مصلوحي=باصبر مدامه هذا حظي ومقسومي وهو ثبري

[محمد بن ضاوي]

اسف عن انقطاع البث المفاجئ ( من المصدر طبعا ههههههه ) وتأخري في الحضور في هذا الموضوع والردود عليه

<= كان ياخذ حبوب منع ردود هههههههههههههههههههه

,
,
,

واروحي اللي غدت لامنٍّ وْلاسوم واروحي
لانيب حيٍّ بها وْ ولاميتٍ مرتاح في قبري
ستة عوام ايتلاعب بي الهوى من غير مصلوحي
باصبر مدامه هذا حظي ومقسومي وهو ثبري


طرق رائع يابو غنام واستلم المجاراه لاهنت وعساني وفقت فيها





الحب دربه كليف وسيرته تْجدد جْروحي=كم فرصتن لاحت لْقلبي وبغاها وْعوّدت كبري
من عقب ماكنت في درب الهوى أشيّد صروحي=هالحين انا كل من يعرض علي امشي معه عِبري



وان كان تبغى النصيحه خلك عبري مثلي ههههههههه

[محمد بن ضاوي]

صبّحك الله بالخير يالضاوي اسمحلي بمداخله مع خالد فالبيت الأول اهداء لكم الاثنين ونطلب من الله

أن ينال اعجابكم البيت الثاني ,,,

بخصوص الطرق لا أعلـــّـــق عليه حاليـــّـــا , أمـــّـــا الاحتياطات التي كان عليّ الأخذ بها فهي كأي

احتياطات (سوّاق) أو بمعنى آخر (طاره) , يعبر له على طرقه جديده , واستلم يا خالــد :


هقوتي مع جنبها والنجم يتعـــلا ّ بــَـاسباب زرع(ن) عــَلــَــي ّ اِ جـْـــتثاثه

القاع وســْــطه بذرة (ن) ماتخلّى عسى الأمـر ما به دبرة (ن) للغثاثـــــــه


مرحبا اخوي شمال شرقي

البيتين اللي كتبتهم مجاراه فيه شطر واحد مطابق للابيات المجاراه اللي هو هذا :


بــَـاسباب زرع(ن) عــَلــَــي ّ اِ جـْـــتثاثه

ومدامك كتبت شطر صحيح فأنت قادر بإذن الله مع شوي تركيز ان تكتب كل الابيات بالوزن المطلوب.

تحيتي لكـ

[خالد السهلي]

صح لسانك يابوضاوي ولاانت معذور على الغياب لو تقول اللي تقول

ننتظر منك انت طرق جديد

[محمد بن ضاوي]

الدور واقف علي :)


استلمو لاهنتو




ياللي تحبون القصيد وتبخصون اوزانه=الطرق هذا من يِجاريه ويفك رموزه
طرقن خفيفن من لدنّا كامله اركانه=نبغى الذي يصيب الهدف بالضبط ولا يْهوزه

[мαηѕoя]

::






كلآم يابس ّ
:11_horror:


وآصلو و إني لمن المتابعين
:flowers:


لآ هنت ( و )

[درموح]

فكره ولا اروع بيض الله وجهك يالسهلي



ابو ضاوي اسمحلي بالمشاركه وان شاء الله اني ما اخطيت الدرب



ياللي تحدى وانت فوق ارض ٍ هشاش وشانه=خلّك على عزاز لا تفقد يداك الحوزه
الغلطه اليا جات من شاعر ثقيل ودانه=ياكبرها كبراه خصـــاً لا بقت مرزوزه

[محمد بن ضاوي]

بالتمام يادرموح وصح لسانك وعسى الله يستر من الغلطه المقصوده ههههههههههه


بعدين العتب على اللي في الميدان ولا على اللي برا الميدان ههههههه



,
,

ننتظر مشاركتك يادرموح وحاول تفحمنا بشي صعب :)

[خالد السهلي]

حنانجاريه ونميز وزنته والحانه/والشعر مانجهل معانيه وثمين كنوزه
حنا لياطال التحدي واحتمى ميدانه/عليك ركز اهدافك ونطرح لك المركوزة

[خالد السهلي]

استلموا ياشعار


من هاجس(ن)كلماهجرس وغنى يعجب الذويق ذوقه/سلام يااهل التحدي والحدا والحد والدنيا مدية

الشوط حنا ترانا فاوله كل يورينا طروقه/ثم الوعد لاتساوى للسباق الخد والدنيا مدية

[سلطانة غرام]

متابعة
للتعلم

[خالد السهلي]

وجهك ابيض يادرموح ومرحبابك


هلابسلطانة

[محمد بن ضاوي]

من هاجس(ن)كلماهجرس وغنى يعجب الذويق ذوقه/سلام يااهل التحدي والحدا والحد والدنيا مدية

الشوط حنا ترانا فاوله كل يورينا طروقه/ثم الوعد لاتساوى للسباق الخد والدنيا مدية


يامرحبا ياخالد ومساك الله بالخير انت وجميع الشعار اللي شاركونا التحدي واللي ماشاركوا

استلم لاهنت ...


يامرحبا بالهجوس اللي تجيب الشعْر وتوفّي حْقوقه=وانا بوقت التحدي موقفي ينعد والدنيا مديه
الماد توّه ولوّ البعْض عن ميداننا مدري اش يعوقه=احراج مدري تخوّف لايبيح السد والدنيا مديه


وعسانا اصبنا الهدف واذا اخطأنا نعيد الكره ولاهو عيب

[خالد السهلي]

صح لسانك واصبت كعادتك

[محمد بن ضاوي]

صح بدنك ..


استلموا ياهل التحدي :


يالله انّك ترحم الحال يارحيم=يارجا اللي انقطعت اسبابه الا منْك
اهدني ربي صراطك المستقيم=واعف عن من جالك مسلّم وزبنْك


الطرق هذا على حسب اطلاعي ماسبق ان قريت عليه شي

[خالد السهلي]

ابوضاوي لاهنت على المشاركة

تأكد من الشطر الثالث لاهنت

[محمد بن ضاوي]

ابوضاوي لاهنت على المشاركة

تأكد من الشطر الثالث لاهنت

ولا تهون ياخالد ..

اشطر الثالث هل هو هذا : (( اهدني ربي صراطك المستقيم ))

اذا كان هو فبالامكان المجاراه على الاشطر الاخرى مع اني ما ارى فيه شي من وجهة نظري


تحيتي لك ..

[خالد السهلي]

ابوضاوي استلم وعطني رايك ولاناب متعدين هالبيتين لين واحد منا يتراجع عن رايه ويتبين له الصواب
ولاجينا الا نتعلم ونستفيد

يابن ضاوي بالتفاعيل والتقسيم=معْي ميزان الذهب وانت مدري عنك
شطرك الثالث يبي فزعة وترميم=اعط للخباز خبزه ولو يغبنك

[خالد السهلي]

يابوضاوي ماجينا الا نتعلم ونستفيد وعطنا مرئياتك على الرد

كاني أصبته فشطرك الثالث اللي آخره(المستقيم) مهوب مثل اخوياه

استلم لاهنت

يابن ضاوي بالتفاعيل والتقسيم=معْي ميزان الذهب وانت مدري عنك
شطرك الثالث يبي فزعة وترميم=اعط للخباز خبزك ولو يغبنك

[محمد بن ضاوي]

ابوضاوي استلم وعطني رايك ولاناب متعدين هالبيتين لين واحد منا يتراجع عن رايه ويتبين له الصواب
ولاجينا الا نتعلم ونستفيد

ابد ماحنا متعدينه لين تضع الحرب اوزارها ههههههه

يابن ضاوي بالتفاعيل والتقسيم=معْي ميزان الذهب وانت مدري عنك
شطرك الثالث يبي فزعة وترميم=اعط للخباز خبزه ولو يغبنك

ابياتك موزونه ياخالد وانا عارف التفعيله اللي كتبت عليها وايضا التفعيله اللي انا كتبت عليها

مثلا عندك الشطر هذا .. (( اعط للخباز خبزه ولو يغبنك )) لو غيرنا كلمة (يغبنك) الى (غبنك) تتضح الرؤيا في اختلاف وجهات النظر والاختلاف بين القراءات.

[خالد السهلي]

اذا غيرتها من يغبنك إلى غبنك ماتغير الوزن لكن فقط يكون هناك مايسمى ب(الزحاف)


بتقسيم الحركات والسكون الذي هو ادق من التفعيلات بل التفعيلات تبنى عليه عندي أن الشطر الثالث عندك مختلف عن اخوياه

للتقريب
أضف أول كل شطر كلمة(ألا) يطلع هو البحر المسمى بالمنكوس
بيركب عليها كلها الا الثالث
وإن خالفتني في هذا أتمنى تكتب لي تقسيمك للشطر الثالث مقارنة بأي شطر آخر

وان كانك مصر إن تفعيلتي غير تفعيلتك فحبذا لو توضح وتفصل بارك الله فيك

[خالد السهلي]

وينك يابوضاوي ماعاد رديت

[خالد السهلي]

نتابع الموضوع

[مسلم ابن غبيشان]

الله الله
موضوع ممتع جداً

الله يعطيكم العافيه

[شمال شرقي]

المعذره على التأخير لكن من اليوم سجلوني من المتابعين يا مبدعين صحت الألسن وبارك فيكم

يا بن ضاوي أنت وخالد مبدعين , وهذي مشاركه على آخر ماتوصّلتوا له

ارجو ان تنال على استحسانكم :

السموحه يا رجُالن للوفا تصميم = الحواله كلبوها تنتمي للبنــــــــــك

ي بن ضاوي لايغرك للخطا تعميم = بتركك مع خالد الــّي ما قدر يعلنك


آرائكم تهمــــّــــنا خصوصا خالد وبن ضاوي

[خالد السهلي]

ابن ضاوي
الخلل عندك من وجهة نظري أنك بنيت على الزحاف آخر البيت فاعتبرته وزنا مختلفا وهذا لايمكن
فلايمكن أن آخذ بحرا معروفا وأثبت زحافا فيه وأقول هو وزن جديد لأن الزحاف من حق الشاعر

الاخ الجديد حياك الله
وقبل ماتدخل البحور الصعبة أتقن التعبير :)

وش لون (ماقدر يعلنك)؟
والله مافهمتها معذرة

[شمال شرقي]

ما قدر = لم يستطع , يعلنك= بمعنى يجيزك : لم يستطع ان يجيزك


ونبي رايكم

[محمد الجبريني]

ماشالله خالد السهلي محمد ضاوي

امتعتونا لاهنتم سجلو متابعتي لكم

ومشاركتي معكم


ماشالله يامحمد وياخالد امتعتووونا
كل منكم يشهد الله ربي انه وافي


والقصيد الجزل له معنى وله مضمونا
ودي اعرف يالنشاما رايكم في قافي

ودمتم بخير