يرتاح بال المسير

[مسلم ابن غبيشان]

يالله بنوٍ زمى نصبه مسياني=يضفي على الخرمه ويسقي ضواحيها



زمى سحابه توال عصير ثم زاني=ثم هلت الماء مزونه من مناشيها



في ليلةٍ من ليال الصيف وداني=هطل عليها بديمٍ لين يرويها



من ليلةٍ عم فيها كل الاوطاني=يعجبك لا شفت مجرى سيل واديها



يسقي لنا ديرةٍ وقتٍ لها ازماني=اسنت وصارت دهر محدٍ بيبغيها



منولٍ برها عشبٍ وغدراني=واليوم طال الدهر والوقت عاضيها



نظرت ما شفت فيها دوج قطعاني=سرابها يطرد والنزل مخليها



مدهل هل الطيب صارت فج خلاياني=كلٍ تركها وكنه ما نزل فيها



الارض صارت غبار وجوها شاني=في كل صبح وعصر تذري ذواريها



دارٍ لنا برها مدهل ومسكاني==اوفيت في حبها ماني بناسيها



ديار ربعي هل العليا لهم شاني=دار الرجال العريبه من مجانيها



يازين لا ربعت تكسيها الالواني=من خير ربي تشوف العشب كاسيها



يسجع بها ساجع القمري بالالحاني=من فرحته يسجع الفرحه ويثنيها



فـ الفيضه المخضره من بين ودياني=من رائح المزن جاها ما يكفيها



تسلي النفس لا بِليت بالاحزاني=وتدله النفس لاجتها طواريها



بأسج فيها وبأدله والعمر فاني=واسلي النفس دام الله محييها