تنسج العلّمنه وخيوطها من حرير...لـــجـــل تنّزع بنات الناس جلبابها

[عبد الرحمن آل بهيش]

السلام عليكم ورحمة الله وبركاته

جديدي للشعر وأهله




بين بلع الشهيق وبين نفخ الزفير= موبقاتٍ وتأبا النفس ترضا بها
كلما قلت ابنطق اختبص واستخير=والتعاليل حولي تفتح ابوابها
والله إني على درئ المفاسد خبير=مير بعض القضايا ربي أدرا بها
تختلف في قضاياها ونفس المصير=من فتح بابها بالحال يشقابها
لكن ابرى بنفسي من زمانٍ مرير=واطلب الله يصلح حال ينتابها
حين صار الشجاع اليوم ماله خشير=والجبان انحنت له روس برقابها
واصبح القوم تاخذ كل ناقص شوير=والمنافق من اهل الراي واصحابها
والمجالس تريّسها كذوبٍ حقير =والكفو ما يُجالس من ورى اعتابها
راح وقت البراءه لن مابه غرير=تقنياتٍ تبث السم بلبابها
اصبح الورع يقلط قبل شيخٍ كبير=ما حشم شيبت الشايب ولا يابها
واصبح الخايف الملهوف ماله مجير=يطلب الغوث والعالم تسَّلا بها
الذيابه تموت من العطش والهجير=والثعالب تحوش الرزق بذنابها
وقت فيه المغني للنوايا سفير=والملايين بلحانه تغنابها
من بقا فيه ذمه عاش فوق الحصير=عزته ودته للعيز يصلابها
والبصير بزمنا صار مثل الضرير=لو يشاهد بعينه تجحد اهدابها
والمصالح تبدى لو يموت الفقير=دام راعي الجمايل مات كسابها
راحو احفاد طه والحسن والزبير=والندايم بيوم الحشر وحسابها
يا جميع النشاما ضم حشدٍ غفير=وين راحت شيَمّنا الي جبلنا بها
النعارات زادت والحدث يستثير=والشعارات زاغت عقل يزهابها
الخَبَث منتشر والوضع صعب وخطير=والشريعه ذريعه ما مشينا بها
من ثلاثة قرون اوضاعنا تستدير=والأمم من حوالينا بلشنا بها
ترسل اهل الكتاب بشرها المستطير=واقبلو الفرس قوه تفتل اشنابها
فوق مليار مسلم ما تطيق المسير=صاروا اعجاز نخلٍ والضما صابها
غرنا زخرف الدنيا وعمرٍ قصير=واتعبتنا وعـــانينا تقّلاّبها
اشغلتنا المزاين وارتفاع الشعير=والمقاهي وجمرتها وشبابها
لا متى الحال وجناح العروبه كسير=والعدا يشهرون السيف وحرابها
ذوقتنا الشعوب اقصى عذابٍ يصير=ما بقى ميّسم إلا ونكوينا بها
اضطهاداتنا في كل صقعٍ محير=والعروبه غدت بيدين قصابها
تنسج العلّمنه وخيوطها من حرير=لجل تنّزع بنات الناس جلبابها
في فلسطين يُهتك كل جفنٍ قرير=وفي فرنسا قرارٍ يمنع حجابها
هاتو الحل يكفيني عذاب الضمير=عل شورٍ يجي ويريح مرتابها



وسلامتكم