اكتم همومك وان تضايقت لاتبوح .. مصافحه اولى

[عزف الشهري]

لغة العيون لايفهمها الا من يحب وخصوصا بعد طول فراق قد لا اكون مسهبا في وصف
مارايت من خلالها ولكني حاولت واجتهدت ان اصف مالمحت فيها من اعتذار وشوق وحنين
ابيات كتبتها كمصافحة اولى واتمنى ان تنال اعجابكم محبكم :عزف الشهري ( عزف منفرد )


ياصاحبي لاهنت يكفيك ماجاك
اكتم همومك وان تضايقت لاتبوح


ارسم طريقك واتبعه وين وداك
ترى الهوى لعبه ومافيه مصلوح


كم واحدٍ خالط سمومه مع دواك
يشَرّبك امراار واحزان وجروح


ادري مريض وبان لي في محياك
توي عرفتك مابها ضحك ومزووح


ياماظلمتك واندفن حزن جواااك
لا لا تظاهر بالصبر وانت مفضوح


طيبتك مع هالناس احلى مزايااك
تنسى خطاهم وانت ضامي ومجروح


ياصاحبي هالضيق سيف بيمناك
يقطع عروق القلب والجرح مفتوح


عزي لحالك يوم انا كنت واياك
نبني من الاحـلام امجـاد وطمووح


تذكر زمان فات ماكثر حكايااك
تعطيني الالهاام وابني لك صروح


ماكنت اتصور مع الوقت رؤياك
تلبس هدوم الحزن واشوفك تنوح


ياصاحبي والله مافيه شرواك
مافيه مثلك وانت غالي ومسموح


ارجع ترى ماعيش لحظه بلياك
يفداك كل الخلق شين ٍ ومملوح


ياصاحبي ماجاك من قل الادراك
كانت تجارب والذي فات مدموح


ياصاحبي وان كان حظك تعدااك
لاتشتكي للناس والصمت ممدوح


ارفق بحالك لاتـطـول بشكواك
هذا القدر مكتوب في خافي اللوح


ياصاحبي لا قلت في يوم بنساك
هذي دموعي تشرح الشوق بوضوح


هذا كلامي جاك والروح تفداك
مـزيـن بالـورد وعـطوره تفووح

[سامي العطاوي]

يآسلام

صح لسآنك ملآيين ولا يكفون

وحيآك الله بين اهلك وأخوانك

مصآفحه اولى رآئعه

لكن إعذرني اخوي على نقل القصيده لوجوب ذكر الاسم الصريح

اتمنى تزويد الاداره بإسمك الصريح حتى نعيدها للقسم

[احمدسبيتان]

صح لسانك ويعطيك العافيه

[بيان الغنامي]

يـــــــــ ع ـــــــــطيك العافيه

وبالتوفيق

[كاسب العز]

صح لسانك وقلبك

ابدعت

[الهوى والنور]

صح لساانك اخوي


قصيده رااائعه جداً


بالتوفيق