يا شعر

[سيف الدوسري]

عقب البكا (ياشعر) وش لون الأحوال=(ياشعـر) مـن يهـواك ياعزتيلـه
أسج عنّك يـوم واليـوم لـو طـال=أجيـك همـي فالخفـايـا أشيـلـه
والقلب حزنـه باقيـن فيـه لا زال=يلعب به الطـاروق فـي كـل ليلـه
البارحة والصمـت جـارح وقتـال=الدمـع للراحـة خذيتـه وسيـلـة
هبت علي النـود وجريـت مـوال=وغيّبت عـن وعـي دقايـق قليلـه
ذكرت من حبه خذا القلـب مدهـال=والثاني أللـي فـي عيونـي مقيلـه
(ياشعر) روّح صاحبي ذرب الأفعال=وعقبه أعز النـاس جانـي رحيلـه
تلعب بي الأقدار من جـال لا جـال=وش حيلتي؟؟ مالي على الموت حيله
من جيت فالدنيا وانا أشوف الأهوال=ودقايـق الفرحـة عليّـه بخيـلـه
تفارقـوا الغاليـن والدمـع هـمّـال=وأسمع حصان الحزن يرفع صهيلـه
وحتى القرايب مابقى بينهـا وصـال=ماكنّهـم نفـس اللحـم والفصيلـة؟؟
غفلة ورى الدنيا ندور ورى المـال=وندري بـأن المـوت يقـدر يزيلـه
لو بالحلال نجمّعـه مافـي أشكـال=المشكلة لو بالحـرام نعـدي لـه؟؟
وحنّا ورانـا يـوم يشيّـب أطفـال=وكلـن بيلاقـي فـي كتابـه فعيلـه
يارب سترك لأنكشف ستر الأفعـال=ويارب عفوك عن ذنـوب الرذيلـة
وتلومني (ياشعر) لو أشكي الحـال؟=ماعندي أغلى منك لجل أشتكـي لـه
أخاف وقتـي يحدنـي يـم الأنـذال=والنفس تبقـى فـي جزاهـم ذليلـه
منه من الله خير من بعض الأشكـال=بعض البشـر (منّتـه) تبقـى ثقيلـه
((أكبر قهر لا خانك الوقت وأحتال))=((وحدّك على أللي ماتمنّى تجي له))

[احلى كلاام]

صح لسااانكـ