ياضلع

[فايز بن علي]

يا ضلع يالي صدى صوتي لي ترده
يالي عليك استند و ابث شكوايه
جيتك و انا صاحبك قد باحلك سده
ما عادلي في وجيه الناس لي غايه
يا ضلع و الله ما غيرك لي اعده
الشامخ الي لا طاحت من لهم رايه
حالي نحتها الزمن و الهم لي هده
امشي مع الناس مشيت و احدن تايه
و اسج سج الهوا لا زاد بالشده
و افيق من سجة الكابوس و دعايه
مليت اجامل ومن جا ما قدر ارده
الطيب ماله حدودن عندي و نهايه
و الشي لا زاد في حده قلب ضده
جاملت ناسن كثيره و صاروا اعدايه
و اللي نساني عليه نذر ما ارده
طرد المقفي عظيمه و اكبر بلايه
يا هاجسي لا سريت وجهتك جده
شمال شرقي بعد مكه خذ و صايه
سلم على راس عود وحب لي يده
وقله تراني عليهم زايد ظمايه
البعد بيني و بينه راكزن حده
ابطى زماني يقرب خطوة خطايه
العين تذرف دموع البعد من مده
مدري بعدها على الله سنيني الجايه
و أليا وصلت الضلع يا هاجسي عنده
بلغ سلامي عليه و قله كفايه