اللي بيكتب مع رفئاتو ويجينا باجمل أبياتو بنحبه وبنضل نئلو ( شاعر شاعر )

[فخر أهلها]

السلام عليكم

مساء الخير الجميع بدون استثناء

السالفه ومافيها سلمكم الله نوع من الترفيه وتغيير الروتين والنمط المعتاد هنا بالقسم

هذا الموضوع فكرته بسيطه وممكن تكون مسليه بنفس الوقت

كل القضيه اول واحد يدخل الله لايهينه يحط لنا بيت في اي موضوع واي قافيه واي بحر يختاره بيت واحد بس

واللي يدخل بعده يجيب بيت وهكذا لين تكتمل قصيده من كذا عضو وتكون قصيدة الاسبوع او قصيدة غرابيل سموها باللي يعجبكم

طبعا اي بيت مو موافق باللحن او فيه كسر او اي خلل مايضاف للابيات الا اذا غيره الشاعر

اتمنى يكون موضوع حلو

واتمنى يلقى تجاوب منكم وان ماعجبكم قولو لي ولايهمكم نحذفه وماصار الا الخير :wink:

تحياتي لكل من بيمر ويشارك وكل اللي يمر ومايشارك بعد :مزون:

[محمد الدغيري]

يعطيك العافيه

وإن شاء الله نجد التفاعل من الاخوان


تحيه ع ــطره

[النوري]

حياك يافخر
وافكارك ونشاطك يالقرمه< انا قايلة هالبنت سنعه منذو ذاك الحين المبطي
تامرين يالغاليه وماطلبتي شي

يقـول من حـده زمانه على الجـور= انا صـويب وصوبتني ظـنوني
اتبع جفاء المقفين ماطعت انا الشور= وقلبي مع الوافين زود طعوني

بإنتظار الشعراء والشاعرات الافاضل

[محمد بن ضاوي]

يقول من حده زمانه على الجـور=انا صويـب وصوبتنـي ظنونـي
اتبع جفاء المقفين ماطعت انا الشور=وقلبي مع الوافيـن زود طعونـي
أمشي على النيه ولانيب مجبور=أبيح سدي لو تبيحه عيوني


حياك فخر اهلها وشاكر لك على هالموضوع الدسم وايضا شكرا لشاعرتنا النوري على هالمبدا الكايف

بس على فكره يافخر ,, حلو عنوان موضوعك ههههههه

انا اول ماطلعت الغنيه ذي بتلت معي فتره طويله وانا ماير اركب عليها ابيات وانواع الرديات مع الزملاء عليها ههههههههه

اذكر وحده تقول :

اللي بيسرح في غنماتو ,, وعم بيراعي لشواهاتو ,, مابيجلس عند اوخياتو شو بنؤولو

ناشر ,, ناشر
هههههههههههههههههههههه

[الوهبي]

اخواني الأفاضل ادامكم الله
دخلت هذا المنتدى من جمال ماقرأة به ، وأعجبتني فكرة القصيدة وهذه أول مشاركة لي بهذا المنتدى الجميل بأعضائه . . رغم أنني ليس بشاعر وأنما أكتب مقتطفات شعرية .


يقول من حده زمانه على الجـور
انا صويـب وصوبتنـي ظنونـي
اتبع جفاء المقفين ماطعت انا الشور
وقلبي مع الوافيـن زود طعونـي
أمشي على النيه ولانيـب مجبـور
أبيح سـدي لـو تبيحـه عيونـي
كم مرةً راجعت عارف ودكتور
وكل(ن) يقول أدواك خل(ن) حنوني



اخوكم الوهبي:وردة:

[غلا أبوها]

جذبها العنوان ودخلت هووووووووون


وتبين الصدق الموضوع وفكرتك روووعه


وان شاء الله يتفاعلون الشطار معك

[جارح الكسر]

يقول من حده زمانه على الجـور
انا صويـب وصوبتنـي ظنونـي
اتبع جفاء المقفين ماطعت انا الشور
وقلبي مع الوافيـن زود طعونـي
أمشي على النيه ولانيـب مجبـور
أبيح سـدي لـو تبيحـه عيونـي
كم مرةً راجعت عارف ودكتور
وكل(ن) يقول أدواك خل(ن) حنوني
----------------------------------------------------------------
يهدي عليك الديم ويلبس البور
ورد شذاه يداعب الوجد دوني
---------------------------------------------------------------

شكرا فخر أهلها ولاهانوا البقية

وبعدين أنا مادخلت ألا منافسة لبو ضاااااااااااااااوي ابن عمي وصديقي ولكن!!!!

لاماانع من التصادمات ,وو ينك يابو ضاوي

[حامد الروقي]

اخواني الأفاضل ادامكم الله
دخلت هذا المنتدى من جمال ماقرأة به ، وأعجبتني فكرة القصيدة وهذه أول مشاركة لي بهذا المنتدى الجميل بأعضائه . . رغم أنني ليس بشاعر وأنما أكتب مقتطفات شعرية .
يقول من حده زمانه على الجـور
انا صويـب وصوبتنـي ظنونـي
اتبع جفاء المقفين ماطعت انا الشور
وقلبي مع الوافيـن زود طعونـي
أمشي على النيه ولانيـب مجبـور
أبيح سـدي لـو تبيحـه عيونـي
كم مرةً راجعت عارف ودكتور
وكل(ن) يقول أدواك خل(ن) حنوني
اخوكم الوهبي:وردة:

يقول من حده زمانه على الجـور=انا صويـب وصوبتنـي ظنونـي
اتبع جفاء المقفين ماطعت انا الشور=وقلبي مع الوافيـن زود طعونـي
أمشي على النيه ولانيـب مجبـور=أبيح سـدي لـو تبيحـه عيونـي
كم مرةً راجعت عارف ودكتور=وكل(ن) يقول أدواك خل(ن) حنوني
كم مرةٍ سهرت لين انبلج نور = نور الصباح ونادمني لحوني
وجدي عليها وجد من بات مخفور = سجين غرم ومثقلا بالديوني
ولا وجود اللي حفر خمسة اقبور = لبوه واخوانه والام الحنوني
بعد دفنهم قيل مبعد ومهجور = ردوه ربعه لايزور الضعوني
وشلون تسكن بينا وانت مجدور = هذي عوايدنا للانفس نصوني
عربك ماتوا وانت جايلك الدور= قاله كبير القوم. قال اسمعوني
مافيه واحد من قضى الله ماجور= تريثوا لين اهلك ودفنوني


كل الشكر لكاتبة الموضوع


هذي مشاركتي اتمنى تعجبكم


قلتها توجد

تحياتي.

[ماجد]

رهيب ياحامد الروقي

وانا اضييف هالبيت

.................................................
حباً نما في صدق مايقبل الزور
هذي المحبه تحمل اعذب شجوني
................................................
شكراً فخر اهلها
نبضـ االشمالــ

[فهده]

انا من النوع الثاني الي يخش ولا يشارك :مزون:

بس عجبتني الحركه وبتفرج عليكم من بعيد هع

واذا تبغوني اشجع ماعندي مانع

فخر اهلك
يعطيك العافيه

سلام..

[صابر العتيبي]

مـآشـآء الله تبـآرك الله مـآخليتوا لنـآ مجـآل
شـآب القـآف ههههههه

اللـه لآ يهينكم بس الاتفـآق يكون بيت واحد
مو تُكمل القصيدهـ من شاعر واحد


الرآقيه فخر اهلهـآ
موضوع رآقي كشخصك تمـاماً
وهذا ليس بغريب عليك أنتِ شعـآر لتميز وعنوان للأبدآع
واصلي في نثرك للمواضيع التي تفوح منهـآ عبق الزهور
فأنـآ من اشد المعجبين بمـآ تجود به قريحتك الشعريـه
للـه دركّ يـآ فخر أهلهـآ ..،

ودي ووردي ..،

[النوري]

الله عليكم

واصلوا هيك إبدااع

لاهنتووو

[فخر أهلها]

محمد الدغيري

هلا بك والله يعافيك وبانتظار تفاعلك انت بعد :wink:

النوري

حياك الله وانا منذو مبطي اقول هالنوري سنافيه وماللمواضيع هذي الا هي :مزون:

يعطيك العافييه وصح لسانك بداية ولا اروع

ابو ضاوي

صح لساانك ومازلنا نتابع الابداع في انتظار البقيه

وبعدين اعجبتني اغنية ناشر ناشر هههههههههههههه

وانا من خلال معاناتي مع الاسهم اقول ( اللي يفتح عواناتو 00 بالسوق وراحو قريشاتو شو بنئلو ... فاغر فاغر ههههههههههههههههههههههه )

الوهبي

هلا والله حياك الله بين اخوانك واخواتك
والجميل هو حضورك ومشاركتك صح لسانك

غلا وبيّها

هلابك وبتواجدك
يبيلنا نكثر من العناوين هذي عشان نشوفك :wink:

جارح الكسر

هلابك ويعطيك العافيه جارح

ومافي احلى من منافستك انت وابو ضاوي تتحفنا بالابداع هههههه

صح لساانك

حامد الروقي

هلا هلا ياحامد حياك الله عاش من شافك وصح لساانك مدد ابدعت وطلعت لنا قصيده ولا احلى

بس ياولد روق القضيه تجيب بيت واحد وانت كذا وش خليت لغيرك :wink:

ياليت تختار لنا بيت من ابياتك ندرجه مع المجموعه وبامكانك انت تكملة ابياتك ووضعها بالنبطي بموضوع مستقل كقصيده لك باسمك لان هذي ماراح تكون باسم احد معين

شاكره تواجدك :)

نبض الشمال

هلابك نبض

يعطيك العافيه على تواجدك

وصح لسانك على هالبيت الجميل

بنت برقا

حياك الله يابنت برقا تفرجي بس مانبي تشجيع ودوخ راس بالموضوع ناس رايقين ومتهيضين لاتدوخينا هههههههههه

شاكره حضورك

سفوح الامنيات

هلابك سفوح شاكره لك تواجدك وشهادتك اسعدتني وعاد لاتطيريني بالعجه تراني اصدق على طول ههههههه

شاكره مروورك وسعداء بتواجدك في غرابيل معنا ونتمنى نشوف مشاركتك حتى لو شاب القاف ولو انه ماشاب بعد :wink:

النوري

مره ثانيه حياتس الله وخليك متابعه بس عن قرب :)


شاكره للجميع تفاعلهم ولكم اطيب تحيه

[فخر أهلها]

وهذي مشاركتي عساها تجوز لكم بس :)

ياليت مادون الوصل باب(ن) وسور=ليته معي مادام اهو كل كوني


وبكذا تكون الابيات كالتالي حتى الان وبانتظار بيت حامد اللي بيختاره لنا



يقول من حده زمانه على الجـور=انا صويـب وصوبتنـي ظنونـي
اتبع جفاء المقفين ماطعت انا الشور=وقلبي مع الوافيـن زود طعونـي
أمشي على النيه ولانيـب مجبـور=أبيح سـدي لـو تبيحـه عيونـي
كم مرةً راجعت عارف ودكتور=وكل(ن) يقول أدواك خل(ن) حنوني
يهدي عليك الديم ويلبس البور=ورد شذاه يداعب الوجد دوني
حباً نما في صدق مايقبل الزور =هذي المحبه تحمل اعذب شجوني
ياليت مادون الوصل باب(ن) وسور=ليته معي مادام اهو كل كوني

[الوهبي]

فخر أهلها أشكرك على مرورك وعلى ترحيبك الطيب و تستاهلين الفخر
ونحن فخورين بك وبوجودك بهذا المنتدى المفعم بالأخوة الصادقة

أخوك / الوهبي:وردة:

[محمد سالم الهاجري]

اشكرك اختي فخر اهلهااا انجاز في هااذى المنتدى ويظاف لس
ويحسب لس وشكرس على جهود س الجباره


وهااذى بيت مني عسى ان يحوز على رضاكم



ماجور ياقلبي من الصد ماجور....عيت تنساهم ولوهم نسوني

[حامد الروقي]

كم ليلة ٍ سهران ليـن انبلـج نـور====نـور الصبـاح ونادمنـي لحونـي

هذا البيت اللي اختاره


كان ودكم تضيفونه يجي بعد بيت اخوي الوهبي


انا كنت اضن انه اللي تبي تضيف تضيف لك الحريه



تحياتي.

[منتوقة العنق]

الله يعطيك العافيه فخر اهلها

موضووووع رائع

لي عودة تقبلي تحياتي

[عــ قبيلـة ــزوة]

فخر الله يرجتسسسس

والله ان هالموضوع كان يطري علي واستحي اطمر وانزله وانا لا ناقة لي ولا ذلووول بمنتدى

الشعر ههه

مير فكرة حلوه ولابئتلّك كتير كتير << راحت ثوب ماهيب فتسره خخ

وصح الساان كل من كتب وابدع وهذي مشاركتي


وش حيلتي دام اللقا فيه محظووووور = اجداي دمعي يوم هم باعدوووني

[النوري]

يقول من حده زمانه علـى الجـور
انا صويـب وصوبتنـي ظنونـي
اتبع جفاء المقفين ماطعت انا الشور
وقلبي مـع الوافيـن زود طعونـي
أمشي على النيه ولانيـب مجبـور
أبيح سـدي لـو تبيحـه عيونـي
كم مرةً راجعت عـارف ودكتـور
وكل(ن) يقول أدواك خل(ن) حنوني
كم مرةٍ سهرت ليـن انبلـج نـور
نـور الصبـاح ونادمنـي لحونـي
يهدي عليك الديـم ويلبـس البـور
ورد شذاه يداعـب الوجـد دونـي
حباً نما في صدق مايقبـل الـزور
هذي المحبه تحمل اعذب شجونـي
ياليت مادون الوصل باب(ن) وسور
ليته معي مادام اهـو كـل كونـي
ماجـور ياقلبي من الصد ماجـور
عيـت تنسـاهم ولوهم نســوني
وش حيلتي دام اللقا فيه محظـور
اجـداي دمعي يوم هـم باعــدوني

[صالح الروقي]

فكررررررررررررره راااااااااااائعه يافخروووووووووووووووه

ولكم محاولتي ان كان ماتناسب اضربوا بها اقرب زااااااااااااويه :)



دمعاً تهله عين وحساس وشعور=دمعة غلا تكوي محاجر جفوني

[][ سما الدوحه ][]

متابعين لكم


فخر أهلها..

يعطيج العافيه

[ماجد]

مرحبا

فخر اهلها

يجوز المشاركة مرتين ؟؟


ياوقت يكفي خاطري صار مكسور=ارحم جروحي دامهم ما بكوني

[مطنوووووخه]

فخووره حبيبة قلبي صديقتي ياحلوتس وحلو افكارتس لا والعجيب الغريب بالموضوع ان نفس الطاري طرى على عزوه هههههههههههههههههه طلع التوافق بين ثلاثه مو ثنتين بس هههههههههههه
بتهور واحط بيت واخاف يطلع مكسور وتحذفينه انتي ماعندتس فالشغل اي روابط اجتماعيه وصداقات هههههههههههههههه << لايفووتس الشغل بس :مزون:
بيتي يقول
وتزيد غصاتي على قلب مقهور .......... لاغاب خلي والمشاعر حدوووني
ياشرتس لو تحذفينه ههههههههههههههههههههه

[صالح الروقي]

خطيرررررره يالمطنوووووووووخه

[فخر أهلها]

الوهبي
هلابك مرة ثانيه وشاكره متابعتك الكريمة
محمد الهاجري
هلا وحياك المولى اشكرك على هالكلام واشكرك على تجاوبك وصح لساانك على هالبيت
حامد الروقي
هلا مره ثانيه وصح لساانك بصراحه كنت بضيف هالبيت بس قلت تختار انت افضل
شاكره مروورك
منتوقة العنق
ياهلا وغلا يامنتوقه وهلا بمرووورك وبانتظارك يالغلا وعسى مايطول انتظاري :)
عزوة قبيلة
هلا عزوه ويرجتس ههههه لاتدعين ولا تنصبين وتقولين طاريه علي :wink:
وبعدين لاتحشدين الله يهديك اي شي يجي في بالك حياك كل الاقسااام لجميع الاعضاء
وصح لسااانك على مشاركتك وصح بدنك نيابة عن اللي شاركو :)
النوري
يالبا قلبتس ياشيخه :)
شاكرة متابعتك الكريمه لاعدمتك
صالح الروقي
هلا حياك الله وحلو ان الفكره اعجبتكم ولقت هالتجاوب :)
صح لساانك بيت رائع وهالروعه ماتنضرب بالزاويه :wink:
سما
هلا حياك الله والله يعافيك
متابعتك تسعدني شاكره لك
نبض الشمال
يامرحبا يجوز ليه مايجوز :)
حياك هالمره وكل مره وشااكره تواجدك
مطنووخة
يامررحبا ومسهلا ويازين هالموضوع اللي جاابك لي :)
بعدين انتي صدقتي عزوه هههههههههههههههههه
ولا يهمك ياقلبي اللي تبين بس انتي واسطتك قويه وبيتك رهيب لاتخافين مابحذفه :مزون:
حيااك الله مطنوخه ولا تحرمينا طلتك وصح لساانك

[منتوقة العنق]

معذور ياعيني ولو غبت معذوور = كل المشاعر في غلاك اوعدوووني


فخووره قلت لك لي عوده وعساها ترضيك

[فهد الشمري@]

فكره رائعه

الغلا في قلبي وربي مسموووور

تشهد عيونك الي وصوووني

[(( الثريا ))]

اختي الشاعره الرائعه فخر هلها
فكره رهيبه واحسه تقرب اعضاالمندى لبعض
وتحسسهم بالاخوه والترابط ماقصرتي يالغاليه
اقسم انبهرت
امامشاركتي انا

جيتك من الهجران والقلب مأمور=عقلك وقلبك انتبه ينكروني
بعدك الم والقرب لك خير وسرور=وعندك احاسيس الغلا قيدوني
لومااشوف اسمك جبرخاطرالحور=العقل والقلب الوفي يخذلوني

تقبلي اعجابي واابياتي
(( الثريا ))

[قيـس]

فخر أهلها

الله يعطيك العافيه على هالموضوع الرايق

أفـــــــا الشباب قاطين كلهم وأنا ما قطيت



هذي قطتي مع أني محتج على الطاروق مدري اللحن



ماني ليا طاحت على الخد معذور** من اللي ليا صعبت عليهم يجوني
^
^
بـــعد دمعة صالح الروقي على طولـــــــــ

مشـيـــــــــــــــــــــ ـها

[سعيد بن دلهم]

السلام عليكم تقبلوا مشاركتي



جاتك مشاعر حبي اليوم طابور ،،،، والناس بسمك لادعوا يحرجوني

[فخر أهلها]

منتوقة العنق

هلا ومسهلا وحياك للمره الثانيه

صح لساانك

فهد الشمري


شاكره تواجدك ومشاركتك

وللاسف البيت مكسور سيتم استبعاده مشاركتك في حد ذاتها مكسب للجميع

الثريا

هلا والله وحياك المولى

شاكره لك لطفك وهالكلام الرقيق وتواجدك يسعدني لكن بما ان النظام بيت واحد فبنختار بيت واحد يكون قريب من الابيات المطروحه ويضاف

شاكره لك

كافخ لها

حياك الله

لو القطه دراهم ماشفنا وجهك :)

وياليتك وضحت اعتراضك على وش بالضبط في الطرق واللحن

وبالنسبه لبيتك قطتك راحت فيها لان معذور سرت قبلك من منتوقه دئلت

شاكره تواجدك

سعيد بن دلهم

حياك الله وصح لسااانك

وشاكره تواجدك

[حامد الروقي]

سلام عليكم
بيض الله وجيه كل من شارك في القصيده .

اقترح يحط عليها تصويت اجازه للقصيده من الاعضاء بعد ماتكتمل مباشره

ـ وعطونا الاحصاءات كم شاعر وكم شاعره وكم بيت .ونسبة الشاعريه ونسبة الحكمه .

وكم بيت استبعد بسبب تكرار القافيه وكم بيت بسبب الوزن .

وتكلفة الحمله الاعلانيه .

تحيه طيبه .

[عوادالعلي]

بيض الله وجهك اختي

على الفكره


والشعراء ابدعوااااااااااا

وصحت الالسن والقلوب


اعربتني فاعل وانا حال مجرور=وصرفتني بالحب شعرو جنوني

[سلطـان]

يعطيك ألف عافيه

أتحفتمونا بأبيات جميله وعذبه

فقط أحببت الأستمتاع .. وماقصرتم

شكر لك , فخر .. على الموضوع الجميل جدا

ودي وأحترامي

[محمد نايف العتيبي]

ماشالله

والله ابداع الله لا يظركم ياغرابيل ..

انا من رايئ ان اشوف ان القصيده اكتملت ...

الف شكر يافخر

وعسى الله يقومك بالسلامه ان شالله وترجعين لـ غرابيل طيبه ..


دمتم بخير

[فخر أهلها]

حامد الروقي

هلا بك وان شاء الله نجرب نسوي استطلاع واحصائيه مثل ماقلت

شاكره لك تواجدك ومتابعتك

عواد العلي

ووجهك ان شاء الله

شاكره تواجدك ومشاركتك صح لسانك

سلطان

حياك الله ويسعدني تواجدك ومتابعتك

محمد بن نايف

هلا بك والله يسلمك من كل باس ويعافيك

شاكره مرورك