شعر قصيدة مختارة لعيون الطيبين

[الاسهم السعودية]

افطن ترى نيبان بقعا مشاويك
حذراك من بقعا تعضك بنيبان
دنياك يابن آدم تراها شرابيك
لوسانعت لازم تقودك بالارسان
لو اضحكتك ايام لابد تبكيك
غداره وفيها وساويس شيطان
حذراك منها وعدها من اعاديك
دنيا الشقا ماوفرت كل ديقان
كان انت جاهلها بها اخبرك وادريك
مادامت لقيصر وكسرى وكنعان
دالت بحكم الشاه والباش والبيك
ومالت على قارون قبلك وهامان
العمر يفنى والليالي تهاليك
وبقدرة الله كل من فوقها فان
يوم الحشر يالعبد مافيه تشكيك
فيه إيتساوى كل راعي وسلطان
في ساعة" ماينفعونك بنيخيك
ولا اظن يفزعلك قرايب وخلان
تنهج خلاوي ماتجد من يخاويك
اذكر مصيرك يوم تدرج بالأكفان
حسبك عملك الى تضايقت ينجيك
ولا فلا غيره رفاقه وصدقان
عملك في كل الطرايق ايباريك
في يوم ينصب لك على الحق ميزان
لاتنخدع بالمال حاذور يغريك
من ينخدع بالمال خاسر وندمان
ولاتغتبط لو الخلايق اتهنيك
لابد مايأتي للافلاك دوران
اصبر على ماقدر الله واليك
رب العباد الي ضمن رزق الانسان
اصبر الى ضاقت عليك المساليك
وافطن ترى عند الولي رفعة الشان
وطلب ولي الكون بالمد يغنيك
إنصه ولاتركن على فلان وفلان
والى شكيت مكون الكون يشفيك
الي شفا ايوب من عل الابدان
ولا ترتجي بصرت حكيم" يداويك
لو كان عنده طب ماطاح مرضان
وانذرك عن رفقة خطاة الصعاليك
هل الغدر ماسلمهم سلم عربان
ولاتخالط الاجرب حذاريك يعديك
مااظن يبرى لو طليته بقطران
تصير مثله من قربته ايهبيك
عن القراح من الظما تشرب اسيان
وترى الطغاه الي عن الحق تعميك
اهل القلوب الي عن الحق عميان
الي على علوم الرذايل أتربيك
أدنا خطاهم واهونه شرب دخان
بالناس تلقى البوم والصقر والديك
والثعلب المحتال والذيب سرحان
وابعد عن الي مايحبون طاريك
لازم يعيبونك لو انك كحيلان
وراعي الهدف كنه رفيق"امصافيك
الى بدت له لازمه جاك شفقان
مهما سعيت بحاجته حين ياتيك
حزت قضى من لازمه قال جحدان
لو قلت وش داعي الجفا قال مابيك
وإلى ذكرت السابقه قال منان
قله تقلع لاتجيني ولا أجيك
وش عاد لو كنتم رفاقه وجيران
خلن تقيرب له وهو دوم يقصيك
خله يولي رفقته فود عوجان
لو تزبنه ملزوم يخلف هقاويك
لو كان جيبه بالدنانير مليان
ولو تشتكي له هقوتي ماايشكيك
اعطيك عن قربه تعاميم واعلان
عليك بالطيب قباله ايعليك
ولا الردي قربه يحطك بالاطمان
عليك بالي بالبشاشه ايحييك
يضحك احجاجه بالندى كل الاحيان
عليك بالي بالكرامه ايباديك
تعتز في قربه ولا قرب كوبان
الى بدت لك لازمه قال لبيك
خلن صدوق وصادق" فيك ماخان
لو تزبنه مظيوم بالروح يحميك
حيثه مجرب من صماصيم شجعان
انص الذي قربه يسرك ويرضيك
الحيص شيال المحامل بليهان
والى حداك الظيم دور معانيك
ازبن هل الجودا صواريم حوران
ولا الردي لو جيت زابن ايجليك
مثل الكداده مابها وكر عقبان
ولد الردي لاتجعله من مراكيك
خله يولي مثل طير ابن برمان
مالك ومال اللاش لو هو غدا بيك
لازم يتله من معاميق رديان
وحاذورك النمام بالك ايحديك
يكيد مابين البنيخي والاخوان
حيثه يفكك شمل الاصحاب تفكيك
يفرح ان كانه شاف الاقراب عدوان
لاتحسب انه منصح لك ويغليك
اعرف ترى قلبه على الشر ضرمان
وافطن ترى الشراث لابد شانيك
مايقتنع لو تحمله فوق الامتان
لو كان ماتاجد ريال بمخابيك
مايأسف لحالك ولاراح قنعان
وإلى حكيت احفظ قرايض مهاجيك
واوزن كلامك لايقولون كذبان
واعرف ترى الثرثار هرجه تماتيك
كأن في جوفه مسجل وشرطان
لو تزهمه بالصوت ماتقل يوحيك
وإلى نصحته صد غاضب وزعلان
يثرثر ولا عنده علوم تسليك
يفرا الكلام بلا دلايل وبرهان
والفاهم المدرك برايه ايقديك
واهل الجهل دايم عن الحق عميان
وإلى ظهر علمك ترى الناس توذيك
احفظ كرامة سمعتك قدر الامكان
والخاتمه اطلب وليك وباريك
وصلوا على خير البشر نسل عدنان

الشاعر/ عبدالله عبار العنزي
_________________