حضرت المباراة أمس .. وهذه أبرز النقاط التي شاهدتها ..

[االزعيم الهلالي]

بسم الله الرحمن الرحيم ..

السلام عليكم ورحمة الله وبركاته ..

أعزائي جماهير الهلال في كل مكان .. بداية أبارك لكم الفوز .. والحمدلله تأهلنا وبصداره للمجموعه :ba:

بالأمس حضرت المباراة في الملعب ومعي 2 من الأصحاب وهذي أبرز النقاط اللي شفتها من المدرجات ..

- دخلت الملعب الساعه 6 ونصف (قبل المباراه بساعتين ونصف) وكانت الواجهه مليانه على الاخر وبالامكان مشاهدة ذلك من خارج الملعب ..

- الدخول للملعب يسير وسريع ومافيه مشاكل (فيه عسكري يفتشك فقط وبعدها تدخل الملعب مباشره)

- قريت بالأخبار اليوم ان الهلال الأحمر يوزع اكثر من 70 الف كمامه عند البوابات والحقيقه الكلام مو صحيح لأني دخلت الملعب وماشفت اي توزيع .. بل على العكس كان فيه واحد يبيع كمامات بريال وقاعد يردد "كمامة كورونا كمامة كورونا" :s2: .. ممكن كانوا متواجدين بس انا ماشفتهم .. بس عموماً نشكرهم على جهودهم ..

- بالطريق للملعب فيه بزران باسطين قدام الملعب يبيعون اعلام .. قال لي واحد منهم انت هلالي؟ انا نثراوي < قالها بالثاء

- الجمهور كان متفاعل طول الوقت ويشجع .. والفريق الايراني حاولوا ينزلون كم لاعب للملعب قبل المباراه عشان يصورون وينسون رهبة الجماهير ويتعودون على الوضع .. بس تعجبك الجماهير اذا نزل اي لاعب منهم تقابله صيحات استهجان :d

- دخلوا اللاعبين ورفعنا التيفو .. طبعاً الجزء السفلي من الواجهه فيه كلمة Defeat 'em بمعنى اهزموهم .. وباقي المدرجات (الجزء العلوي في الواجهه وخلف المرميين) كان شكل التيفو تبعهم على شكل أمواج ..

- كان فيه لافته جميله صراحه بعرض مدرج الواجهه مكتوب فيها "Let us fight together to rewrite our glorious history" ومعناها "لنقاتل سوياً لنعيد كتابة تاريخنا العظيم" .. لافته جميله صراحه :ba:

- قبل بداية المباراه امتلت كل المدرجات ماعدا المدرج المخصص للفريق الايراني ..

- المباراة مافيها تذاكر والدخول تفتيش بس وتدخل .. وعند البوابات مافيه عدادات تحسب الداخلين .. صراحه ما ادري كيف حسبوا ان الحضور 49600 وباين ان الحسبه تقديريه .. شخصياً اتوقع الحضور اكثر بكثير من 50 الف ..

- قريت بتويتر اشاعات ان فيه بنات حاضرين بالملعب والحقيقه انها اشاعه من متخلفين ومافيه اي حضور نسائي نهائياً ماعدا بنوتات صغيرات الله يخليهم لأهلهم :d

- بدأت المباراه وكان الهلال هو الافضل في البدايه وللأسف ضيعنا فرص كثير وسالم الدوسري كان مستعجل كثير ويمرر باستعجال ..

- الشوط الأول كان سيطرة هلاليه وتمنيت نسجل قبل نهاية الشوط والحمدلله وفقنا ربي :ba:

- قبل بداية الشوط الثاني جاء نيفيز من غرفة الملابس متجه للمنصه ومعه شخص ثاني .. نيفيز جته تحيه كبيره من الجماهير ورددوا اسمه .. وفي طريقه للمنصه وقفه واحد يبغى يصور معه على المضمار ومباشره اخذ وضعية التصوير بدون اي تردد :s2:

- لما جاء احتياطي الهلال بين الشوطين لمنطقة التسخين كان معهم نواف العابد وهتفت الجماهير باسمه كثير ..

- بدأ الشوط الثاني وكان فيه تغيير من البداية من الفريق الايراني وكان واضح انهم بيهاجمون لأن مافي لهم اي حل ثاني .. سامي كان ذكي وتوقع هالشي وبرضو عمل تبديل مع بداية الشوط وطلع سلمان المحور الهجومي ودخل كاستيو الدفاعي ..

- الشوط الثاني اندفع الفريق الايراني واندفاعهم شكل ضغط على دفاع الهلال .. الضغط بيّن تميز اغلب المدافعين ماعدا سلطان البيشي اللي للاسف كان منفذ للفريق الايراني وخصوصاً اللاعبين رقم 7 و 28 .. وجود كواك بخبرته جنب سلطان افاده كثير صراحه وانقذ كثير من هفواته .. الجميل ان سامي شاف ضعف سلطان بالجهه هذي وادخل الدعيع مكانه بعد مابلغ السيل الزبى وكثرت هجماتهم الخطيره وعرضياتهم ..

- كواك تاي هي .. هذا اللاعب فنااااااان :ba: .. شخصيته قياديه وطوال الوقت يوجه اللاعبين ويدخل بالتحامات جسديه ويستخلص كور كثير .. وطول الوقت محافظ على هدوئه وماكان متنرفز او مرتبك وهذا الشيء مهم جداً عشان مايسبب اخطاء او بلنتيات ..

- ديقاو برضو كان متحمس كثير وابدع في استخلاص كور كثير والدفاع عن المرمى .. كان حماسي لدرجه انه بعد استخلاصه لأحد الكور اتجه لنا ورفع يدينه يبغانا نشجع زياده وتفاعلوا معه الجماهير مباشره ..

- سعود كريري امس ابدع كثييير واستخلص كور كثيره خصوصياً ركنيات او كور على راس المنطقه .. الصراحه سعود ادى أداء كبير وشخصياً اشوف هذي احسن مباراه له من جاء للهلال ويستاهل الملايين اللي اندفعت فيه صراحه ويكفيكم صناعته للهدف بس ..

- عبدالله السديري واصل تألقه وابدع في الدفاع عن مرماه وكان مصدر اطمئنان صراحه .. خلال الشوط الاول وقت ضغط الهلال كان قاعد يسخن داخل المنطقه :s2: .. نفس الحركه عملها حارس سباهان في الشوط الثاني ..

- ياسر الشهراني كان ممتاز صراحه وقتالي بس يعاب عليه عرضياته كانت سيئه صراحه و ولا وحده منها كانت مضبوطه .. بس تحسب له قتاليته صراحه وكان يحتك بالكور الهوائيه مع لاعبين سباهان مع انه قصير وجسمه اضعف بس كان يكسب كثير من الكور ..

- الثلاثي كواك و ديقاو و كريري كانوا الافضل صراحه وابدعوا جداً جداً :ba: شالوا كثير كور سواء هوائيه من ركنيات او عرضيات او من هجمات بالعمق .. وصراحه اختيار احسن لاعب بالمباراه منهم صعب جداً بس شخصياً باختار كواك عشان شخصيته القياديه وتوجيهاته للاعبين والله حسيته صالح النعيمه :d .. يكفيكم انه باحد الكرات لما استلمها بالشوط الاول اشر للاعبي الفريق بيدينه وطلب منهم الهدوء باللعب والتركيز :ba:

- سالم الدوسري كان له اختراقات حلوه امس .. اللي لاحظته ان له توجيهات خاصه بالضغط على الجهة اليسرى لسباهان عشان يمنع الهجمات منها ويخفف الضغط على سلطان .. تحركاته بدون كوره كانت كثيره صراحه واشوفها مهمه جداً وابدع كثير في الضغط عليهم في ملعبهم وقطع منهم كرات ..

- خلال مجريات الشوط الثاني و وسط ضغط سباهان .. لاعبي الاحتياط اللي كانوا بمنطقة التسخين وقفوا تسخين وجلسوا يتابعون المباراه .. وشوي الا جاهم ذاك الاشقر اللي مع طاقم التدريب (ما ادري اذا هو مدرب اللياقه او لا) وقام يهاوشهم ويرفع رجلينه بحركه ويقول لهم تمرنوا .. بعض منهم يوم هاوشهم رجعوا يسخنون وبعضهم كان مفهي مع المباراه :s2: .. هاوشهم شوي ورجع للدكه :d

- سامي كان اغلب المباراه واقف (قلت اغلب لاني قاعد اتفرج على المباراه ما اتفرج عليه :d) بس كل ماطالعته خلال المباراه حصلته واقف ..

- شخصياً اشوف تبديلاته سليمه وفي مكانها الصحيح و كلها منطقيه ..

- حضور الجماهير كان رائع جداً ونشيطين طول وقت المباراه .. فيه عيب وحيد بس وهو انه احيان الواجهه هم اللي يشجعون بس والسبب ان باقي المدرجات مفصولين عنهم ومانسمع وش يقولون :d

- التشجيع كان حلو وحماسي انبح حلقي وتكسرت يديني من ضرب الكراسي ..

- لما دخلوا العساكر للملعب و وقفوا قدام المدرجات الجماهير قامت تشجعهم والعساكر يضحكون < تحشيش

- الحضور كان متخوف من كورونا وكثير جايين بكمامات بس كان الجو حر وكتمه وشالوها ..

- كان فيه اباء كثير جايين للمدرجات بعيالهم الصغار مع اننا وقت دراسه وبوسط الاسبوع .. اهنيهم صراحه :ba:

- التيفو كان جميل (مع انه اقل مستوى من سابقيه) والجميع كان متعاون في رفعه ..

- الحكم الياباني كان جيد الى حد ما وكان صارم بتطبيق القانون بالنسبه للوقت بس! في اخر المباراه بعد مامسك السديري الكوره كم لاعب من سباهان رمى نفسه على الارض على باله خلاص خسروا والحكم بيصفر .. بس الحكم اشر للسديري وقال له العب وقاموا لاعبين سباهان ..

- الجماهير عصبت كثير لما ناصر كان طايح مصاب وسباهان ماطلعوا الكوره .. :ranting:

- في الملعب كان فيه باعه متجولين يبيعون حب وتشيبسات واتوقع كت كات .. بس المويه مافيه ولازم تطلع تشتريها برا والجو كان حر صراحه زياده على حماسة التشجيع .. :to:

- الجمهور من قبل تبدأ المباراه لين بعد النهايه وهم يشجعون باستمرار ويصفقون لكل كورة تتخلص او لعبه حلوه تنلعب .. باستمرار كنا نضرب الكراسي وهالحركه حلوه صراحه لانها تهز الملعب هز مو المدرجات بس والصوت هيبه هيبه هيبه :ba:

- مدرج الواجهه كله مليان على الاخر وفيه ناس جالسين على الجدران .. المدرجات خلف الابواب برضو مليانه بس في كل صف ممكن تحصل كراسي فاضيه .. s13s

- في المدرجات فيه جماهير معهم لافتات واعلام هلاليه كبيره وفيه مشجع هلالي وشكله سعودي رفع علم ثورة سوريا :ba: .. للي مايعرف .. سباهان ايراني .. وايران تدعم بشار :d

- جماهير الملكي كانوا راقين صراحه وماشفت اي سب او الفاظ او مشاكل بين الجمهور .. بل على العكس متعاونين جداً ومحترمين .. ملكيين حتى بالاخلاق ..:ba:

- واحد من الشباب معي مو سعودي ومايتابع الكوره بالسعوديه ويتابع دوريات اوروبا بس .. وسألني وحنا رايحين للملعب عن خالد عزيز .. بس بعد ماشاف المباراة اعجب كثير بكواك و ديقاو و الشهراني .. :alzaeem:

- في الخروج من الملعب كان فيه زحمه سيارات بس فيه تواجد حلو للمرور ونظموا الطريق وماشفت اي مشاكل ..


ختاماً المباراة كانت جميله صراحه من المدرجات و ذكرى حلوه .. والحمدلله اللي وفقنا وتأهلنا وتصدرنا المجموعه ويالله يارب توفيقك في دور الـ 16 ويارب توفيقك ونفوز بالبطوله .. :ba:

ان شاء الله استمتعوا بالموضوع .. حاولت قد ما اقدر انقل لكم الصوره من الملعب وان شاء الله قدرتوا تعيشون جو الملعب .. مبروك مجدداً على الفوز واشكر اللعيبه صراحه على روحهم القتاليه ورغبتهم الكبيره بالفوز .. :ba:

الحمدلله .. الحمدلله .. الحمدلله ..