عملية انفي - الدكتور علاء النجار- مستشفى مغربي-الدمام

[حواء غرابيل]

السلام عليكم ورحمة الله وبركاته

كيفكن يا صبايا؟؟ إن شاء الله تكونوا بتمام الصحه والعافية جميعاً

طبعاً أنا من المتابعيين للمنتدى من فترة طويلة لكن من بعيد للبعيد واليوم قررت انقل لكم تجربه عملية خشمي مع الدكتور علاء النجار بمستشفى مغربي بالدمام التابع للمستشفى المواساة من بعد ما مر على عملية انفي سنه وسته اشهر تقريبا كانت عمليتي بالضبط تاريخ 1-10-2012
طبعاً لما قررت اسوي العمليه بحثت كثير عن الدكتور ومالقيت عنه معلومات كثير ولكن بعدين شفت وحده من البنات مسويه خشمها عنده صور لها طبعا وتغيرررت كثير صارت اجمل والخشم ملموم ومقمم
وقررت يوم ثاني على طول اروح لدكتور علاء بمستشفى مغرب بالدمام عملت معاه موعد ورحت ودخلت عنده وسالني ليش تبين تسويين خشمج مو محتاجه بس انا عني ماكنت احبه لانه وجهي حيل ضعيف وخشمي بارز كنت ابيه الم ويكون مقمم اكثر كان طلبي انو مايبين Fake ومايرفعه لي مثل مايكل جاكسون والهام الفضاله وقال لي طيب انا راح اسوي لك اللي يناسب وجهك ويكون طبيعي قلت له دكتور انا ابيه اصغر وابي لما اصور يبين اجمل :yaaaaaarb: يمكن تستغربون من طلبي بس احنا البنات جذي عقدتنا الخشم بالصورة
طلعت منه وعملت تحاليل وكل شيء
وكانت عمليتي يوم ثاني الصباح الساعه 10 رحت وعملت العمليه وترقدت بالمستشفى يوم طبعا تعرفون يابنات الوضع بعد العمليه ومايحتاج اشرح من تورم الخشم تورم الوجه والكدمات بالوجه وكل تفاصيل مرحله بعد العمليه
وظلت الجبيره على خشمي 10 ايام وبعد 10 ايام رحت له يشيلها شالها وعطاني مرايه اشوف خشمي كانت مفاجئه لي خشمي وارم حيل ومنتفخ حيل ومومبين شكله اصلا طبعا ضغط عليه حيل وقال لي النتيجه تبلش تبين شوي شوي وتقريبا بعد 6 اشهر يبلش يبان شكله ويستقر من سنه لسنتين
طبعا يوم شال الجبيره قعدت ادقق بخشمي وكانت
كل فتحه غير عن الثانيه ومبين كل جهه غير كأنه جهه اطول من الثانيه كانه مايل قلت له دكتور شلون جذي قال ماتخفيش كلو حيبقى تمام وزي الفل ان شاء الله
قلت اوكي يمكن متورم ومو مبين شكله لانه لسه ماصار لي شيء من بعد العمليه يا دوب ايام
وبعد شهر رحت له وكان خشمي نفس الشيء ورام حيل وما تغير
وشالي باقي الخيوط اللي ماطاحت وعلمني شلون اسوي مساج لخشمي بمعدل يومي عشان ينزل
ورجعت وقلت له دكتور ماتلاحظ كل فتحه غير عن الثانيه ومايل واحسه كبر ماصغر جلس يضحك وقال لي صبري عليه وراح يبين شكله بعد 6 اشهر طبعا هالدكتور ما يعطي لا حق ولا باطل ومستعجل ومايعطي الواحد مجال يتكلم او يسأل
صبرنا وصرت كل يوم اعمل مساج وابحث بالنت عن الناس اللي عامله عمليه تجميل للانف وشكل خشومهم شلون صايره احس اهما غير وشلون بلشت تلتم قلت يمكن انا غير وعلى حسب طبيعه الجلد والجسم
مرت الشهور بلشت تنزل الارنبه شوي شوي ويتحدد شكله ولسه انا مو راضيه عن النتيجه طبعا ظل متورم الى 8 شهور ومن بعد الشهر 9 بلش يتحدد شكله عدل ويتغير تغيرت الفتحات وصار مايبن كثير ان كل فتحه غير غير لما احد يدقق على حسب كلام صاحباتي
طبعا كل جهه غير وكل مابلش يتغير شكله يبن ان خشمي مايل وجهه اطول من جهه على جنب واستنيت مرت سنه وظل خشمي مثل مااهو
بإختصار دكتور علاء النجار خرب خشمي وصار قبيح
بعد سنه وخمسه اشهر رحت له عشان ابي تقرير شنو عمل بخشمي بالضبط وطلبت التقرير من المستشفى لاني نويت اسويها الحين مره ثانيه واعدل خشمي
بس طبعا في ايران مستحيل اسلم خشمي لدكتور عربي
اقترح عليي دكتور علاء يعدل خشمي بنصف سعر العمليه ياراجل بعد ماخربته حسبي الله
لكن يحلم اسلمه خشمي مره ثانيه بعد ماخربه صراحه كان الاختيار للدكتور سيء وكرهت خشمي اكثر
والحين خايفه اسويها كل ماتذكرت شلون تعبت بعد العمليه ومعانه على مايبن شكل الخشم ويأخذ شكله
وبنفس الوقت محتاره عند اي دكتور دكتور لطف علي زاده او بور صادق بمشهد او خلعتبيري بشيراز وبين كثير اسماء البنات بالمنتدى حاطين اسمائهم وبما انها العمليه الثانيه بتكون لي وبعد تجربه لازم اختار الدكتور صح وانا مقتنعه ان راح احصل على الشكل اللي ابيه وشغله يكون احترافي
طبعا انا حبيت انقل لكم تجربتي بكل اماانه بعد ماشفت كثير بنات بيسألوا عن الدكتور علاء النجار
غير جذي حتى صاحباتي خرب خشومهم اللي رجع نفش مره ثانيه ولا كأنها عامله العمليه واللي مثلي مايل مااقول غير حسبي الله ونعم الوكيل دكتور فاشل وللاسف طحنا فيه

اذا ممكن يا بنات مثل ماا انا نقلت لكم تجربتي باامانه مع الدكتور علاء النجار تفيدوني اللي عملوا خشومهم تجميل ب ايران عن تجاربهم مع دكاترتهم ومنو تقترحون علي اسماء دكاتره محترفين؟
وتكلفه العمليه؟
وبليز بنات ماابي شيء تجاري او تسويق الله يعطيكم العافية ويعوض عليي وعلى كل بنت اختارت دكتور فاشل