يعزك الله لو تذلك خلايق !

[االزعيم الهلالي]

يعزك الله
http://up.graaam.com/img/08b25db09ee677a34659c605e2a7b5c3.jpg
يعـــــــــــــــزّك الله.. لو تذلّك خلايق
يا قلبـــي اللي مثلهم.. وانت مخلوق
ما فادتـــــك خُــــوّه وكثـــرة صدايق
لو انت وافــي في حياتك، ومصدوق
ياما على العـشْـــــرَه سبقت السبايق
الاوّل انت، وصرت يا القلب مسبوق
أحـسّـكْ بـصــــــدري بلاَ ذنب ضايق
من فـقـدة اللي بَعدهم عشت مضيوق
ياما عـلـيـهـم شـوقـك اشـعـل حرايق
والمشكلــه، كـلٍّ نجَـا وانـت محروق
ما قـدّرَوا ذيــــــــــك السّنين العتايق
يا قـلـب.. ليتك بَعدهم صرت معتوق
واللي خذوا هالحب كــــذب وسرايق
الحب نبض القلب، يا قـلـب مسروق
لاَ تـنـزعــــج’‘ من غـدرهم والنّفايق
أمّا جـمـيــــــل الحــب للحـب منفوق
يا قـلـب.. فـيـك الشّوق يفـرق فرايق
بـيـنـك وبـيـن اللي غَـدوا عـنّـك فروق
حـبّـك بَـحَــر صَـافـي ولاَ بـه غرايق
أنت السّفينه،، وانت بـ الـود مغروق
يا قـلـــــب.. لاَ يشغـلك فـتح الغلايق
كلّك عـطا،، ما فـيـك لو بَـاب مغلوق
اللي يـبــي مَـسـكَـنـك،، دَلّ الطّرايق
واللي وصلك بطِيب والدّرب مطروق
يا قلب.. عشْ وقتك.. ولو هو دقايق
وش بك؟ تعيش بعالمــك رَق مدقوق
أنـت الـوحـيــــد اللي حفظت الوثايق
واشقاك من هو كان بالأمس موثوق
كـذّبـتــها فـيـهـم ،، وجَـتـك الحقايق
وابـعَـدتــها عـنهم ،ولاَ عَادت حقوق
صَارَت جمَايـلك العظيــــــــمه بوايق
هذا جـزا من يـحـفـظ الـحـب، مبيوق
وهـذي هـي الـدّنـيـا.. وذولاَ الخلايق
وهذا انت يا قلبي مثل ماانت مخلوق
بندر الخنيفر
BandarHabob
http://up.graaam.com/img/05a69abdf1f3422d2bce59ebe1edd9e8.jpg