ابتدا ليلي وضاقت بي بريده
العيون اتلد وادموعي سكايب
صوب لي داره من دياري بعيده
واحدٍ من ناظري والشوف غايب
ماشكيت البعد والنفس الوحيده
من زمان الغربة وبُعد القرايب
غير شوقه ماشعل فيني وقيده
وغير بعده ماهوب لضيقي سبايب
افتقدته حاكمٍ قلبي وسيده
ورحت للموتر ونطّحت الهبايب
هزني فرقاه يالله لاتعيده
سقتها والا التعب على الركايب
فاضي ومقرش وسيارة جديده
وش يرد العين من شوف الحبايب
واستوالي الخط والخطوة بعيده
موتري بطران واشواقي لهايب
سرعته ميتين وارّصه وازيده
عارفٍ مامن وراها الّا المصايب
مرخصٍ عمري لجل فرصه سعيده
ماحسبت لعمري الباقي حسايب
بيده الاعمار والأقدار بيده
اتكلت ولاني امن الموت هايب
ليت تدريبي حكومتنا الرشيده
كان ماحطوا على السرعه ضرايب
عاقبوني بالعقوبات الشديده
وان طلبنا مانفع كثر الطلايب
ماارتخا عزمي ولو شفت المكيده
لجل عينه تسهل كبار الصعايب
راس مالي ماهو البنك ورصيده
راس مالي شوف مجدول الذوايب
فرحتي مثل الطفل في يوم عيده
لا التقيت بمنوتي واغلى الصحايب
لو نظره امحرّر اسطور الجريده
سطّره في سلّم السبع العجايب
من إبداع
محمد العطريز
رد مع اقتباس
