[glint]سلااااااااااااااااام
سررت باستضافتك لي في " يوم في حياتي" ....جعل الله أيامك سعيدة
تحياتي لك أختك
....الذهبية.....[/glint]
.................................................. ..............................
الموقف الاول
مرة من المرات وانا بايام التطبيق كنا جالسين في ساحة المدرسة ..
وهم مركبين فيها سراميك جديد..
ومن كثر مازهقت ومليت من حفظ الدرس ومراجعته.. طفشت وطقت فيوزي
وانا ماشية حسيت السراميك يزحلق<<<= ياحبني للتزلج والتفحيط
قعدت افحط واروكض وعقب امسك بريك حووو..علشان اتزحلق تش<<= يالله لك الحمد لو
يشوفوني الطالبات كان طحت من عينهم ..لاني مسويه عليهم اني رزة وشخصية رزينة..
احم احم طبعا هذا الحقيقة لكن تجيني حالات طفاقة يخف فيها العـ.........
كل هالحركتات وانا لالبسة بوت اكعب به<<=مصطلح خنفشاري من عندي يعني ضعيف وعالي
وانا في قمه اندماجي مع التزلج .... ينكسرالكعب قرررررربع على ظهري... ااااخ ياظهري
حسيت ان العمود الفقري انسل و تفكك فقرة فقرة
في ذيك اللحظة ...ماهمني الالم كل اللي همني الطيحة قمت اطالع في ربعي ....
كلهم قالو بسم الله عليك ..
وماسكين الضحكه بس تختض كتوفهم...مراعيه لمشاعري على بالهم اني ابزعل وانا .....
وانا اللي فطست من الضحك على حالتي هههههههههههههههه
شافوني اضحك عقبها هم ماقصرو فيني ....
بعدها رحت غرفة الفنية وصمغت الكعب ولا كلأن صاير شئ ...
*******
الموقف الثاني
وفي يوم من الايام انتهيت من محاضراتي بالكلية وكانت الساعة 3 العصر...والكل كانو مستعجلين على الطلعة
وانا مالقيت شيلتي..قلت دوري زين يابنت يمكن طاحت مني وانا ماشية بالطريق ماسكتها او
بالصندوق وماشلتها معي...لكن بلا جدوى ماشئ... :icon_ques
افترعقلي قمت اهوجس ليكون جيت بدون شيله اليوم ..<<= ايه هين.. معصي..
يؤة جت الساعة 3 وربع والكلية فضت مابقى الا أنا وخويتي والحارس برى
ياربي...تاخرنا عالباص...وانا اكيد ماراح اطلع بدون شيلة ...
وش اسوي وش اسوي حاست فيني الدنيا ..
وإذ بي....خطرت ببالي فكرة جهنمية<<=كل يوم عباية خلاص بلاها العباية اليوم...
<<= اللهم لك الحمد
دقتني خويتي على راسي.. بخ بخ.. من صدقك..
اووووووووف امزح معك..على طول تصدقين
المهم خويتي لابسه جاكيت صوف لونه اسود موغامق ..
قمت اطالع فيها وفي الجاكيت واحرك حواجبي وابتسم .. :غمزه:
عقب فصختها الجاكيت..<<=لايروح فكركم لبيعد قربوة هنيا هي عليها بلوزة بيضاء تحته...
واحطه على راسي وعليه البرقع والعباية والقفاز في يدي..وشكله واضح انه جاكيت
يابختي علي.. ما أروعني باللوك المصروع...
أصلح غلاف لمجلة العباية الخنفشارية لعام الناقة <<على وزن عام الفيل
وه ياويل قلبي باقي عنوني كيف استرها!! ياستار
قمت وغطيتها بيدي<<= نفس الحركه لما تغطيها عن الشمس...
يوم خلصت وطلعنا بالشارع شافني واحد مار بجنب الكليه...طينها علي.. تهي تهي
<<= ماقول غير الله يهداهم هالشباب السَعْ وَدِي (السعودي) مايتركون بنات خلق الله في حالهم
قال: الله الله ياقلبي حرررريق.....<<حسبي الله عليه من رجال
وجهي طاح في الأرض من االفشله
واللي معي كركركركركر :11ughboun <<= يغربلها ياهي عليها ضحكة موبطبيعية شراخي يفرقع ..
روحي يا.... شوف فيك يوم
بس كل اللي ابي اعرفه وين اختفت هالشيله :icon_ques
********
الموقف الثالث
مرة من الامرار وانا باول ثانوي كنت جالسة احورف داخل غرفتي خاشه جو مع الرسم وناسيه
نفسي .... واسمع صوت امي تناديني تدورعلي تحت ....
يوم جات ترقى فوق تدور بالغرف اسمع صوتها قلت يالله خلني العب مع امي شوي ....
وانخش بداخل الدولاب دخلت الغرفه...وشافت العفسه قايمه فيها
مافي مكان تحط رجولها عليه كل شئ مقطوط عالارض ...<<=هذا حال غرفتي لما
ارتاعت علي مالقتني والغرفه معفوسه قليها طاحت في بطنها....<<= يمكن جاء على بالها اني انخطفت ولا شئ الله العالم....
اطلعت تسأل اخواتي وقامو يدورون على في البيت كله في السطح والتهويه <<= احب اختلي
بحالي عند السطح والتهويه
حتى دوروني عند باب الشارع
كل هذا وانا في الدولاب اسمعهم واضحك مبسوطة اني اسوي لهم كاميرا خفية
واخوي اللي اصغر مني قام يصيح علي
<<= ماهقيت ان الامور بتوصل لكذا
خفت من اللي بيجيني عقب مايدرون ان السالفه لعب
طلعت اطل عليهم واشوف حالتهم
انتبهت لي اختي مسكتني ونادتهم هذا هي هنا لقيتها ...
سالتني امي وين كنت وقلت وانا فرحانه اضحك عليها اني العب عليك
شرشحوني تشرشح ماخلوني اسوى هلله احد يلعب مع امه كذا ويطير قلبها...
وانقلبت السالفه علي. دئلت
*******
الموقف الرابع
صحيت الصباح كالمعتاد والمزاج اخر روقان والوناسة موصله حدها ...
واختي سهرانه من التعب نامت عالكنبه
ومن اللعانه اللي فيني الا تقعد معي ماتنام كل اساليب التعذيب اتبعتها
من لعب بالمنديل في اذنها الى رش الماء...
يئست منها هجعت .. علشان اخذ لي راحة وانا الله يهداني...<<= قولو آمين ..
فيني طبيعة ادخل أيدي في وسط الفتحات اللي بالكنب ذيك اللي في ذاك
شيسمونه..عرفتوها ولا :بفكر:
اسوي بحث واستكشاف يمكن القى شئ مفقود كنت ادورعليه..<< وش بيكون فيه كنزعلي بابا
كلها قلم او مشبك شعر وان صار كلش ريال ولا ريالين معتقين
ايه وبعدينا كني لقيت شئ غير ملمسة وامسكه بيدي اليسرى بين السبابة والابهام
وش ذا.. شفته وياليتني ماشفته ولادخلت ايدي ولا فكرت اني اجي واصحي اختي من الاساس
اكيد هذي حوبتها وعقوبه من ربي فيني على اللي سويت فيها ...
عيوني طلعت من مكانها .. والوحة يم اختي<<= ما تجوز ابد ....
واصرخ ذيك الصرخة اللي تهزجدران الغرفه وتشلخ نوافذها لآآآآآآآآآآآآ يع يع لا لا لا وع وع
ابي اقطع أيدي مابيها قصوها تهي تهي يع يع ....الخ
جتني حاله هستيريه من الصراخ ونوبات من لوعان الكبد
يخ تدرون وش طلع .. يخ يخ بريعصي ميت وع مقرف ..
طبعا ماراح اوصف لكم الشكل اوالريحه مراعاة لذوي القلوب الرقيقة
<<= هع اصلا مايبي لها رقه وضعف..
على طول رحت ونقعتها بباديه فيها ماي مع كلوركس وصابون وديتول
بغيت احط فلاش بس تعوذت من ابليس....
وتميت يومين مالمس شئ بيدي اليسرى وطول الوقت فاتحتها ومبعدة بين الصبعين
رافعتها عن الارض حتى في النوم ابعدها عن جسمي ماكنها يدي ...
ولا اقعد في الكنبه اللي كان هو فيه..<<= هع اللهم لك الحمد ...
ولا اكل شي عايشة عالماي والعصاير لايعن كبدي
ومن بعدها هونت توبه ادخل ايدي في داخل الكنب
****************
الموقف الأخير
بالليل وانا نايمه في الصاله على الارض حسيت باصوات وهمسات وكان احد بجنبي
فتحت عيوني .. شهقت شهقه طلعت روحي معاها .. <<بسم الله علي
اخوي ماسك ضب من وراه ومعلقه فوقي
جمدت مكاني من الروعه وقلبي طاح في رجولي
وعقب قمت اتدربى على الارض وانا منسدحه اليما بعدت عنه.. ماابي اجلس علشان مايلمسني
وقمت اروكض طرقن طرقن مثل الحوصان في التهويه
واخوي وراي وانا اصايح والايط تكفى لااااا وخرةه عني يلا وخرة عني.. يمه شوفيه
واركب الدرج وهو وراي
والله كني في فيلم مرعب ..... وهم الخونه كاكاكاكاكا :11ughboun
وادخل غرفتي بسرعه وسكر الباب في وجهه زين لحقت واقفل الباب وادخل في داخل دولابي
واسكره علي واحط الملابس فوقي..
يمه والله اني ميته من الخوف اتنافض واسناني تصقع في بعض
ظليت ساعه بالغرفه وهم يحاولون معي خلاص طلعي راح اخوي.. طلعه برى البيت
فتحت الباب بطلع ...الا يجي اخوي وفررر ..واقفل الغرفه مرة ثانيه جاء يقول انه ماعنده شئ
خذة صاحبه...ذا المقرف الوسخ... يخ
وانا احلف فيهم واقولهم قولو قسم بالله واهدد واوعد فيهم... ياويلكم ان كذبتو
يوم اني طلعت... وفي وجهي اخوي حاط يده ورا ظهره... جيت بسكرالباب الايرفعها مافيها
شئ بس يخوفني...
طول اليوم عايشة برعب وقلق ان يجي الضب مرة ثانيه <<<مسوي لي كابوس
اوووووووووووووف الله لايعودة من يوم :بايو:
.................................................. ............
وبـــــ ــــس
تحية عطرة