تابع المحطة الثالثة :
تكدي
الحلقة الثانية
.
.
خرجنا من أكواخنا مع شأشأة الضوء .. وفيئة العصافير :)
فطرنا وخرجنا لأول أنشطة برنامجنا
رحلة سفاري
وأي رحلة .. من جد كأني في فلم .. جيب مكشوف .. طرق جبلية وعرة .. طبيعة خلابة .. صوت الطبيعة .. طيور أشكال وألوان تطير هنا وهناك .. سناجب تراقبنا من فوق الأشجار .. باختصار .. حلم ..
ركبت الجيب دا .. ووقفت على المقعدة .. ونص جسمي فوق .. وجوالي في يدي .. أحاول القط كل شي في طريقي ..
وكان سواق الجيب ولد حلال .. يوقفنا عند كل منظر حلو عشان نصور .. وننزل نستمتع بهوا الصباح المنعش .. والمناظر الخيالية
ومشينا شوية ..
وقابلنا بقراتهم اللي شايفين نفسهم :)
وشوية الا احنا قدام الموقف دا
شاحنة في وجهنا والطريق يادووووب يكفي سيارة وحدة .. ايش نسوي دحين ؟؟ اضطرينا بما اننا احنا الصغار نرجع ورا مساااافة .. وبغينا نتزحلق ونطيح من الطريق .. بس الحمدلله ربي سلم .. وعدت المحنة .. قصدي الشاحنة .. على خير .. وكملنا طريقنا
وقفنا عند بداية طريق موحل .. يودي لفوق .. وقال السواق السيارة ما تقدر تطلع هنا بسبب الوحل .. حتتزحلق .. فحنطلع برجولنا .. وطلعنا برجولنا .. ووقع حادث بسيط .. اتزحلق أحد أفراد فريقنا هنا .. يريت كنت انا فديتهم كلهم
اتجاوزنا الموقف بسرعة .. وكملنا طرقنا لفوق .. كان الطريق طويل شوية .. بس خياااااااااااال
ووصلنا لقمة الجبل .. هنا اسيبكم مع الصور .. لأني أعجز صراحة عن الوصف .. ما اقول غير .. سبحان الله .. الله لا يحرمنا الجنة
وبعد ما متعنا أنظارنا بالمنظر .. وأسماعنا بنغم الطبيعة .. وأجسامنا وأنفاسنا بأنقى هوا .. رجعنا نازلين لجيبنا .. وفي الطريق لقطتلي كم لقطة لبعض النباتات والاشجار
شجرة فلفل أسود
موز
وركبنا جيبنا وكملنا طريقنا ..
وفي الطريق قابلنا كشك يبيع شاهي و خفايف .. أخدنا شاهي وطلعنا استمتعنا بيه في الجلسة الحلوة دي ..
وكملنا طريقنا راجعين لتكدي .. ومن هناك التقطنا سونين .. وودانا للفقرة التانية من برنامج اليوم .. اللي هيا الـ boating ..
ووصلنا للمدخل ووقفنا السيارة وكملنا الطريق مشي .. وكان المجال خصب للتصوير .. كل شي في طريقي حلو ويستاهل التصوير .. وطبعا انا ما قصرت :)
قطعنا التذاكر .. وجلسنا في الاستراحة نستنى البوتات تجي
وهادا الأخ شكلو جالس يستنى معانا
وركبنا البوت .. ونسيت اصورو مدري ليش .. ومشينا في النهر ومرينا بجزر محمية .. شفنا فيها غزلان ع الطبيعة .. المرة دي غزلان من جد مو وعول .. وهادا اللي خلاني انقهر بزيادة ع الكاميرا .. لأني ما قدرت اقرب الصورة وآخدلها صور واضحة ..
شوفوا قطيع غزلان هنااااااااااااااك .. شايفينهم ؟؟
ودا بيت في وسط جزيرة منعزلة .. روووووووعة ..
غزالتين يرعوا ..
برضو غزالتين يرعوا ..
غزالة .. لا لا غزال يرعى
هنا شكلو منتجع في جزيرة منعزلة .. اتمنيت ادخل .. بس البوت فيه يمكن 100 واحد .. وما حيمشي على كيفي .. والا كان سويتها :)
ورجعنا مرسى القوارب .. ونزلنا على ضفة النهر .. استمتعنا شويتين بالموية وصفاءها ..
ترا دي مو كرة جولف .. هادا فطر :)
ولما بعدنا شوية
وفي طريق رجعتنا للسيارة ماما تعبت .. قام بابا وقفلنا تاكسي ..
أخيرا ركبت التاكسي أبو تلاتة عجلات .. اللي نشوفو في الأفلام الهندية
حتى الدركسون .. حقت دباب
مرينا السوق .. واشترينا شوية هدايا .. و شفت عشق النساء الأبدي .. الألماس .. وما قدرت اقاوم .. واشتريت لنفسي تعليقة ذهبية مرصعة بالألماس والياقوت ..
ورجعنا كوخنا الحبيب .. و ........ ياللهول ... تمساح فوق سريرنا
اكتشفنا بعدين انو مجرد مناشف
ونمنا استعدادا لرحلتنا الى محطتنا الرابعة .. كوماراكوم
.
.
و من الهند .. .. لكل من مر وسيمر من هنا :)