مرحباً بالأعضاء الكرام ...
تحية طيبة للجميع وبـعد :-
السبب اللي خلاني أقول إن المتزوجين أعداء المنتديات ..
البارح بالليل كنت أكلم واحد مشهور من هذا المنتدى وجلس يحكيني عن معاناته مع حرمته
وإنها كل شوي تطب عليه ..
أنا فرحت من كلامه وابتسمت زي ابتسامة (( شرشبيل )) مع ضحكة صفراء :)
وجالس أقول في قلبي يارب تدخل عليه حرمته .. :D
خصوصا إن (( الاسم المستعار )) بالماسنجر (( قيثارة الشرق )) يعني المدام لو شافت
اسمي راح تمسكه وتمصع أذانيه وتقوله مين هذي البنت قيثارة الشرق ياشاطر
لأن اسمي صراحة سبب لي مشاكل نفسية لأن واحد مرة هنا بالمنتدى رسل لي رسالة إعجاب
على أساس إني بنت لدرجة إنه يتمنى إنه يتزوج وحده بثقافتي على حد قوله |3|
ندخل بالموضوع :
طبعا الكل يعلم ما وصل إليه هذا المنتدى الرائع من تقدم وتطور طيب.
لكن ما أخشاه على هذا المنتدى هو الانحدار في الردود بسبب الزوجات.
يعني مثلا تكون دوبك صاحي من النوم ومافي دوام والبال آخر حلاوة تدخل تقرأ كم موضوع تعجبك ويا دوبك تبغى تكتب الرد تتفاجأ بدخول زوجتك وتقول لك ايش رأيك بكرة نروح للخياطة |3|
المزاج كله يتنكب وترد مثلا على موضوع قوي كقوة مواضيع (( حر المشاعر والقلم ))
وتقول له : شكرا لك حر المشاعر على هذا الفستان الجيد ويعطيك ربي العافية على تطريزه بهذا الشكل.
ولا ويكون تبغى ترد على موضوع للسيدة المثقفة الرهيبة وجاي جري عشان تبغى تسجل اسمك
كمجرد توقيع لإبداع الرهيبة تقول : الرهيبة موضوعك هذا مو زي الموضوع القديم قوي لأنك
مارحتي الخياط زي ما أنا رحت ولاجربتي التردد للخياط مليون مرة لتعديل الفستان !!
والا في أمان الله داخل المنتدى تبغى تشوف رد على موضوع انت نزلته مثلا (( خاطرة )) وكل شوي
تفتح المنتدى وكلك لهفة وشوق لمشاهدة ردود الأعضاء وتبغى ترد عليهم وحصلت كمية طيبة من الردود
وتبغى تقدم الشكر للمشاركين وفجأة !!
ايش رأيك توديني سوق الحجـــــــاز عنده تخفيض |3|
وانت وانت بتكتب الرد تلاقيه.
أشكر كل من شارك في الرد على العيسائي ,اشكر جميع الزبائن الكرام على مشاركتهم الرائعة. وأيضا أشكر أخي (( سهم المنايا )) الخصم الخاص اللي عمله وأيضا أخص بالشكر اخي الغالي (( السيف )) على
الموديلات الرائعة اللي عرضها في الفاترينا وهذا ليس غريب عليه.
ويجي (( الكايد )) وينزل قصيدة رائعة كعادته وتلاقيه منزل القصيدة هذي بعد ماتردد إنه ينزلها وتكون
متحمس جدا للرد وتبدأ عزيزي الكايد الحقيقة القصيدة رائعة وفي هذه اللحظة تدخل الزوجة كعادتها من جدار الغرفة وليس من الباب وتقول لك :-
وديني عند أمي اليوم |3|
تقول طيب :o وتكمل الرد عالكايد وتقوله القصيدة زي ماقلت لك رائعة وياليت تكون عندك
قصيدة لحماتي أكون لك من الشاكرين ..
وفي النهاية اشكر رحيمي العزيز على هذا الموضوع وننتظر منه المزيد ..
ولا تكون تبغى ترد على واحد وتدعي له في الرد وفجأة اليوم سابع أختي متى توديني؟ تقول الساعة كذا. وتكمل دعوتك لصاحب الموضوع تشكر يا عسيب والله يوفقك ويا رب يا رحماني بارك لنا في الغلامي الله سعدنا وهنانا وأعطانا مولود جيد. من فرحة قلوبنا غنينا مبروك سابع سعيد.
وأنا أطالب بإبعاد المتزوجين عن هذا المنتدى حفاظا عليه.
رد مع اقتباس
