واتل قلبي منك يالطرف الحنون
اللي خذا قلبي بنظراتن منه
اللي سحر قلبي بنظرات العيون
المترفه كل الحلا منه وعنه
ترسل سهام الحب من ذيك الجفون
تقول للعاشق رماحن تطعنه
طيفي وشعري كلها جاتك بهون
والعاشق الولهان جر لك لحنه
تهون لاوالله عندي ماتهون
غالي وذكرك وسط قلبي يسكنه
تمون ياخلي على روحي تمون
والقلب ياخلي رهينه وارهنه
القلب لا من غبت يطفي يافتون
وترى على فكره وصالك يشحنه
لاجيت انا بوصفك شعري لك يخون
مايكتفي بالوصف لو جاب احسنه
فاق الجمال وفاقت اوصاف الهتون
وتعجز على وصفه جميع الالسنه
ترضون ياحساد ولاتزعلون
غلاه في قلبي وسره دافنه