للشعر نزوه وثوره وجموح لايكبح
تغزونى كل مساء
فا ليكم هذه المتواضعه
عسي أن تنال الرضا فقط
[poem=font="Simplified Arabic,4,blue,bold,normal" bkcolor="white" bkimage="" border="outset,4,gray" type=2 line=0 align=center use=sp num="0,black"]
بعض الاصوات تشرح خاطري ياسعد= وبعض الاصوات ماودي بسمعانهـا
بعد صوت الحبيب اللي لحبـي جحـد= عافت النفس كـل اصـوات خلانهـا
وعافت العيـن من عقبـه لذيـذ السهـد=واستعـادت مواجعهـا وحرمانـهـا
وكل جرحن قديم من الغـرام استجـد=والعـروق النديـه جفـت اغصانهـا
لاذكرتـة وجفنـي ساهـر مـارقـد = من عيونـي دموعـي هـل هتانهـا
اتعـوذ واردد قـل هــو الله احــد =قبل يستحـوذ الاعصـاب شيطانهـا
ياسعـد كـل ماراجـن حمـام البلـد = كـن قلبـي علـى خفـاق جنحانهـا
وكني الفاقد اللـي مـادرا وش فقـد = يقتلـب والهجـوس اقـرع ببيبانهـا
غلطة العاشق اللي في هـواه انقـرد = يوم غاص البحور وصـار غرقانهـا
حكمة الوقت ومن ثابر وجـد. وجـد = وحكمة الحب تبكـي العيـن حبانهـا
بس ياللاسف وش حصّـل المجتهـد = غيـر تحطيـم رغباتـه وكتمانـهـا
هية ياللـي ملكـت الـروح لاتبتعـد = لاترجـع لنفسـي ماضـي احزانهـا
انت وجه السعد ون غبت غاب السعـد = السعـادة علـى غرتـك عنوانـهـا
والشفايـف بنفسـج والثنايـا بــرد = والشعر ذيـل شقـراُ طـال ميدانهـا
تفتـن النـاس يافتـان بنـت وولـد = وتسمعك صمهـا تنظـرك عميانهـا
الله انة يفكـك مـن عيـون الحسـد = ومن نفوس ضعيف نـازع إيمانهـا
من خدودك بروق وفي خفوقي رعـد = غيمةٌ هـل وسـط الجـاش هتانهـا
واثق انـك بحسنـك والبهـا منفـرد = واثق انك نظـر عينـي وسلطانهـا
اطلب اللي تبـي منـي وانـا مستعـد = لعنبو مـن نطـق كلمـه ولاصانهـا
لك عيوني وقلبي ويـش باقـي بعـد = كان منوتك روحـي جـود عنانهـا
انت لك جبروت الحسن قـام وسجـد = والقصايـد عليـك تزيـن قيفانـهـا
ويالعـل العيـون ان خانتـك للرمـد = وانت منزلك خابر بيـن حجانهـا
انت غيرك بكل الكون ماحـب احـد = واهـل مكـة هـم الادرى بشعبانهـا
والله انـي لحبـك يالغضـي للابـد = لين تنكر ظهـور الخيـل فرسانهـا
ولين الف بكفن ثـم اروح يـم اللحـد = ثـم يالله علـى الدنـيـا وسكانـهـا
طف نار المعذب مـل صبـر وجلـد = وانـت تقـدح فتيلتهـا بصوانـهـا
خلني بـس ليـن اذوق طعـم الشهـد = واتمـتـع بمشمشـهـا ورمانـهـا
لايطمنـك بركـان الغلا لوخـمـد = .لاذكرتك هجوسـي ثـار بركانهـا
البعوضـة تسيـل دم راس الاســد = والمحبـه تنـزل روس شيخانـهـا
والمحب الحقيقـي لاعشـق مازهـد = لو عليه الارض ضاقـت وريعانهـا
من زرع خير بين الناس خير حصـد = ومن زرع شر تاترضيـه قشرانهـا [/poem]
رد مع اقتباس
