صرت أول لا أنظر للرجال أنظر لتعامله مع أهله ..!!
لأننا أصبحنا نقرأ ونسمع ..[ المصايب ] لناس ظنينا إن مافيه أزين من معاملتهم لأهلهم ؛ لأن الطاغي على السطح يقول إن معاملتهم للناس وخدمتهم لهم ممتازه ؛ لكن يوم نشوف حالهم نبصم إن مافيه أردى من معاملتهم لأهلهم ..!!
- فيـه واحد من الربع جالس يسولف لخوياه يقولهم .. [ الثانيـه جايه في الطريق ]
قالو له يافلان : طيب أم العيال وين بتروح !!
رد وقال لين أصغر العيال يوصل لـ 8 سنين بعدها برسلها لبيت أهلها
<<<( يبيهم يوصلون لسنهم الثامن حتي مايحق لأمهم إنها تطالب بحضانتهم , على حسب قوله !! )
مثل هالآدمي نقول عليه رجال .. ؟
- شخص ليل نهار حابس أم عياله في البيت , يعاملها أشين معامله
خارج البيت مايسمعون غير بالعزايم إلي يسويها هالكريم من ذبح التيوس وغيره , وفي البيت مايشوفون منه شيء ..!!
عند ام عياله , كل دقيقه والثانيه ساب في أهلها وشاتم قرايبها .
مثل هالآدمي نقول عليه رجال .. ؟
- زوج أول ماتزوج مافيه أزين منه , قام ياخذ من راتب حرمته ويخليها تساعده في [ أقساط السياره , بناء العماره , مقاضي البيت , .... ]
بعد كم سنه , تزوج عليها ورماها عند عيالها .
مثل هالآدمي نقول عليه رجال .. ؟
ونسمع ونقرأ كثير مثل هالمواقف وأردى .. الله يكون بالعون ويصبر الأهل !!
هل هؤلاء هم رجال بمعني الكلمة ؟
إذاً ماهو معنى الرجولة الحقَّة في نظركم ؟
هل لساننا يعجز أن يقول لأحد من هؤلاء الرجال [رجلا] ؟
هل المرجلة تقاس بالأفعال ؟ أم بالعضلات والشخصية ؟
موضوع عجبني ونقلته