كل واحد يكتب مواقف طريفة من حياته:mf_popean
ابدا انا اولكم ــــــــــــــــ < احتكار
اول فلم : دقت علي ميمتي (( تصغير امي مو بوحدة ))
الله يخليها لي ويعافيها قولوا امين
قالت لي رح جب خيتك (( اختك)) من الكلية هذا وقت طلعتها
قلت ابشري ياميمتي
الحاصل اني رحت ووقفت عند الكلية استناها بعز القايلة
استنيت ربع ساعة ... نص ساعة ماطلعت وصلت معي اتش((يعني غضبت غضبا شديدا)) ..... فصيح
وشوي الا ركبت السيارة وانا على طول اصرخ عليها : ليش تاخرتي
الا تناظر لي وشهقت هالشهقة وصرخت بعدين انزلت بسرعة وركضت لمن دخلت الكلية
وانا محتار وش السالفة ؟؟؟ وشفيها هالخبلة ؟؟؟ وليش سوت كذا؟؟؟ ـــــــــــ < انرجيت:كلوش:
المهم وانا محتار الا هاذي اختي رجعت وركبت السيارة
قلت لها : ليش تسوين كذا قالت وش سويت قلت كذا وكذا قالت والله ماهي انا
اثاريها مو اختي طلعت وحده ثانية مضيعة بالقايلة
ثاني فلم : ان وصاحبي رحنا لمحل حلويات فاتح جديد وماتشوف الا الكشخة
المهم نمشي بجنب بعض نبي ندخل المحل انا دخلت مع الباب الا واسمع الطاخ
واشوف الناس اللي بالمحل انفجروا من الضحك واناظر الا صاحبي على الارض طايح اثاريه لطخ بالقزاز (( واجهة المحل )) انا مت من الضحك عليه
ثالث فلم : صار معي موقف وانا صغير 14 لا 13 لا 12 سنة === يصغر نفسه
ابوي وخوياه الشياب مجتمعين عندنا بالمجلس
الحاصل قال لي ابوي : ياوليدي
قلت : سم يبه ======= عامل فيها مرجلة
قال : جب لنا بطاريات
قلت : ابشر ====== ولد مطيع
وانا اطير وماتشوف الا غبرتي
ورجعت قلت : خذ يبه
قال : وش هذيلي (( هذه ))
قلت : اللي طلبته يبه
قال : انا قلت جب بطاريات للرادو
اخوكم بالله جايب بطانيات على بالي الشياب يبون يقيلون:icon_redf
وهات ضحك وتعليقات من هالشياب ماصدقوا على الله يلقون لهم سالفة (( العتب على السمع ))
خلصت الافلام اللي بعده