تجربتي مع الريجيم

السلام عليكم ورحمة الله وبركاته واسعد الله صباحكم او مساءكم بكل خير في البداية حبيت انقل تجربتي مع الريجيم عبر منتدى غرابيل الجميل وارجوا من الله ان تعم الفائدة على الجميع
كانت البداية في شهر ربيع الاول لعام 1430هـ كان وزني حينها 155 كيلو جرام وكنت اعاني حرج وتعب وضيق نفسي ومعنوي فقررت ان اخوض التجربة بكل قوة وعنف وياما حاولت قبلها وفشلت
اول شي عملته كنت امشي 15 دقيقة فقط وكان الاكل اقل من المعتاد بشي بسيط ومع مرور الوقت بدأت امشي 20 دقيقة ثم 25 دقيقة ثم نصف ساعة الين الحمد لله ما تغلبت على التعب وصرت امشي ساعة كاملة (مشي فقط) وتنازلت عن وجبة العشاء بعد مرور شهرين بدأت بدلة العمل بالتوسع شيء بسيط واعجبني ذلك وازداد حماسي وصرت امشي ساعة طبعا المشي في كل مكان حتى لو حول البيت مو شرط مضمار او نادي صحي عشان الكسل فقللت من الاكل صرت افطر قبل الدوام سندويشته وحده فقط وكوب شاهي او حليب سكر وسط وبعد ما ارجع من الدوام اتسلى بأي نوع من الفاكهة نوع واحد فقط حتى لا اشعر بالجوع وانام وقبل صلاة العشاء اتعشى سندويتشه وحده وكوب عصير طبيعي واستمريت على هذا المنوال قرابة سنة ونصف (طبعا ماكنت احرم نفسي اذا كنت معزوم عند الجيران او احد الاقارب كنت اكل معهم) لان الحرمان يزيدك ضعف ولكن اعوض ذلك بالمشي بعد العشاء ورحت نادي رياضي لشد الجلد المترهل وفي شهر رمضان لعام 1431هـ صار وزني 79 كيلو جرام (يعني نزلت 76 كيلو جرام) تقريبا نصف الوزن رااااااااح
ياعالم والله راحه نفسيه غير طبيعية طلعت بلوك جديد 50% من العالم ما عرفوني قالوا مستحيل كيف سويت كذا وكيف وكيف
في الاخير احب اقول للي يبي يسوي ريجيم الهمة والعزيمة فوق كل شيء وهي اساس النجاح نصيحة لا احد يسوي اي نوع من العمليات الجراحية سواء قص معدة او ربط او بالون او او او لان اي شيء يجي بالسهوله يروح بالسهوله ونصيحة ثانية لا تحرم نفسك من اي شيء خلال ماتسوي الريجيم لان الحرمان يقلل من العزيمة بس لا تخربها مثلا اعط نفسك في الاسبوع يوم تتعشى فيه سواء اذا كنت معزوم عند احد او تتعشى في مطعم
معليش طولت عليكم واي استفسار بخصوص الريجيم انا جاهز واسأل الله لي ولكم التوفيق